Gara për Presidentin e Shqipërisë

[Kercovari]

E djathta, Bushati: Topalli të garojë për Presidente

Kryetarja e Kuvendit, Jozefina Topalli, është propozuar dje zyrtarisht nga Partia Aleanca Demokristiane si kandidate për postin e Presidentit të Republikës së Shqipërisë. Një ditë më parë ishte PDK-ja e Nard Ndokës që deklaroi hapur mbështetjen për një mandat të dytë të Bamir Topit në funksionin që mban aktualisht. Në një deklaratë publike Partia Aleanca Demokristiane thotë se po ndjek me vëmendje procesin e vetëdeklarimit dhe të mbështetjes që individë të veçantë apo përfaqësues të subjekteve të vogla politike në Tiranë kanë filluar të bëjnë në prag të zgjedhjes së Presidentit të Republikës në pranverën e vitit të ardhshëm. “Vlerësojmë se Bamir Topi u zgjodh në detyrën e Presidentit i propozuar nga kryeministri Berisha dhe Partia Demokratike, duke qenë i angazhuar në politike në detyrën e nënkryetarit të PD-së dhe kryetar i grupi parlamentar. Topit në asnjë rast nuk i është kërkuar nga forcat e djathta politike të mazhorancës qeverisëse, që gjatë ushtrimit të detyrës së Presidentit të dekretojë ligje apo akte të tjera, që rrjedhin nga funksioni kushtetues i Presidentit, me ngarkesa politike të krahut te djathtë”, thuhet në deklaratën e ADK-së së Zef Bushatit. Ai nënvizon se Bamir Topi përkundrazi, e në kundërshtim me funksionin, ka shprehur hapur bashkëpunimin me të majtët socialistë opozitarë, çka kulmoi dhe me votën e hedhur prej tij për kryesocialistin Edi Rama. Demokristianët thonë se Topi demonstroi paaftësi dhe inkompetencë në kryerjen e detyrës, ndërsa qëndrimet e tij me influenca të qarta politike, duke mbështetur haptas të majtën socialiste, nuk i kanë shërbyer rolit kushtetues të Presidentit si përfaqësues i unitetit të popullit. Aleanca Demokristiane konfirmon se do të mbështesë fuqimisht nëpërmjet një lobingu intensiv kandidaturën e zonjës Jozefina Topalli për Presidente të Republikës së Shqipërisë. “Zonja Topalli është një kandidaturë e plotësuar, e cila ka demonstruar një pjekuri politike e diplomatike si një grua e fortë e me mjaft autoritet kombëtar e ndërkombëtar”, thotë Bushati. Partia Aleanca Demokristiane shpreh gjithashtu bindjen se zonja Topalli me kandidaturën e saj plotëson atë boshllëk në historinë e Presidentëve shqiptare nga viti 1912 që, për herë të parë në historinë e Shqipërisë Presidenti të jetë një zonjë, si dhe një personalitet nga komuniteti katolik shqiptar. “Duke kërkuar mirëkuptimin e vëllezërve tanë shqiptarë të komunitetit mysliman, me të cilët na bashkon gjaku, gjuha e kombi, kërkojmë që edhe ata të mbështesin kandidaturën e zonjës Topalli për Presidente të Republikës së Shqipërisë”, përfundon deklarata. Një ditë më parë ishte një tjetër demokristian, kreu i PDK-së, Nard Ndoka, ai që deklaroi mbështetjen publike dhe politike për rikandidimin e Bamir Topit. Ndoka tha se do t’i kërkonte Partisë Socialiste që të mbështeste këtë kandidat në votimin për kreun e ri të shtetit korrikun e vitit 2012. Nga Partia Socialiste ende nuk ka patur asnjë reagim në lidhje me emrin e kandidatit për President apo rreth faktit nëse do të mbështetet rikandidimi i Topit apo jo për një mandat të dytë.

/Mapo Online/

[Kercovari]

Për Presidentin e Republikës - partitë e vogla shprehen të gatshme të mbështesin kandidaturën më të mirë

24-08-2011 /



"Ethet" për zgjedhjen e Presidentit të Republikës në vitin 2012 kanë përfshirë edhe kryetarët e partive të vogla. Eksponentë të së djathtës, pjesë e formacionit qeveritar në rang zv/ministrash përmes një prononcimi për mediat deklarojnë se debati për presidentin e ri dhe emrat e kandidatëve është i parakohshëm, por nga ana tjetër nuk ngurojnë të hedhin në terrenin politik emrat e parë për kreun e ri të shtetit. Arjan Starova, kreu i Partisë Bashkimi Liberal Demokratë thotë se ky vend ka shumë kandidatura, ku mes meshkujve është koha kur Shqipëria të provojë në drejtimin e saj një president femër. Ndërsa Ekrem Spahia, drejtuesi i partisë Lëvizja e Legalitetit bën me dije se alternativa e tyre është që në krye të shtetit të jetë Leka i Parë. "E rëndësishme është që ky vend ka kandidatura. Nuk ka vetëm një ose dy, por ka shumë kandidatura të cilat mundet që të përfaqësonin vërtet me dinjitet presidencën shqiptare në pesë vitet që vijnë. Gjithmonë do të jetë mundësia, shanset janë të barabarta si për femrat dhe për meshkujt"- deklaroi Starova. "Partia Lëvizja e Legalitetit është një parti me specifikë shumë të veçantë sepse ne jemi mbretërorë dhe ne kemi alternativën tonë. Demokraci do të thotë edhe alternativë dhe alternativa jonë është që në krye të shtetit të jetë mbreti Leka I"- theksoi me tej kreu i Lëvizjes së Legalitetit, Spahia.

Ndërsa lidhur me kodin zgjedhor si Partia Bashkimi Liberal i Demokratëve ashtu edhe Partia Lëvizja e Legalitetit, të dyja aleate të demokratëve sugjerojnë edhe skema të reja për kodin zgjedhor. Starova kërkon një korrigjim të formulës së llogaritjes së vendeve në parlament, ndërsa Spahiu sugjeron që numërimi i fletëve të votimit të bëhet me skanim në rast se nuk arrihet votimi elektronik deri në 2013-ën.
"Nëse është e pamundur për të filluar që nga zgjedhjet e ardhshme parlamentare votimin me elektronikë, është domosdoshmëri që numërimi i fletëve të votimit të bëhet me skanim"- u shpreh Spahia. "Duhet të ketë një korrigjim të mënyrës së llogaritjes së vendeve në parlament duke marrë për bazë sidomos partitë e vogla, kuotat e votave që ata marrin në shkallë kombëtare. Pra, nga gjithë lista e deputetëve në parlament duhet të ketë kuota të caktuara, 20-30-40 të cilat të mund të llogariten në bazë të kuotave apo përqindjeve në rang kombëtar për partitë e vogla apo parti të tjera"- tha Starova.
Referuar ndryshimeve në Kushtetutë, krerët e dy partive të vogla theksojnë se dokumenti themeltar i shtetit nuk mund të ndryshohet për kapriço.
Sipas tyre, ndryshimi i kushtetutës nuk mund të bëhet për të ricikluar kriza parlamentare në Shqipëri.
/Gazeta 55/

[Kercovari]

Godo: Berisha president, Basha kryeministër dhe lider i së djathtës
Presidenti i Nderit i republikanëve, Sabri Godo, ka befasuar mbrëmë në emisionin e Çim Pekës, "Fakt", kur deklaroi se Berisha duhet të bëhet President dhe Basha Kryeministër dhe lider i së djathtës. Godo për herë të parë kritikoi edhe presidentin Topi për rolin e tij të vakët në krizën politike dhe parashikoi se lëvizja e tij e re politike për një parti të re nuk do të funksiononte.
Intervistoi Çlirim Peka
Në emisionin e fundit që kemi pasur bashkë, i cili ka hapur shumë debate, jeni shprehur publikisht se unë me dëshirë do të ndihmoja dhe jam pro Lulëzim Bashës për kryetar bashkie. Zoti Basha prej afërsisht 1 muaji e gjysmë ka filluar punën si kryetar i Bashkisë. Cili është perceptimi dhe mendimi juaj për performancën e zotit Basha?
Ai pothuajse nuk ka filluar punë, unë i uroj punë të mbarë, dhe vazhdoj të kem bindjen se Basha do të jetë njeriu i ndryshimeve. Vura re disa gjëra që shpalli gjatë fushatës elektorale dhe që më bënë përshtypje të veçantë. E para, një herë Basha nuk ka ndërmend që të zhvillojë luftë politike në Tiranë. Do ta nisë mandatin duke i bërë një ftesë opozitës në Këshillin Bashkiak që të miratojnë vendimet sa herë ato do jenë transparente, të qarta dhe të pranueshme, dhe ta kritikojnë sa herë që nuk është bindës në gjërat që thotë. Në qoftë se ai do të arrijë ta sigurojë këtë bashkëpunim, them se do të sjellë një gjë të re, jo vetëm në Tiranë, por me ndikim në të gjithë Shqipërinë. Sepse ndodh që për 6 muaj me radhë të bllokohet Bashkia e Durrësit, sepse mazhoranca dhe opozita nuk bien dakord për ato vendime që kërkojnë një votim të cilësuar. Dhe kështu mbeten pa u bërë punët e bashkisë, bllokohen investimet, bllokohet qyteti dhe këto kalojnë pa u zënë në gojë, por kjo nuk ndodh vetëm në Durrës. Pastaj Fieri merr shembull nga Durrësi dhe kështu përhapet kjo në të gjithë Shqipërinë duke sjellë një dëm që është vështirë të kalkulohet. Në qoftë se Basha arrin të krijojë këtë lloj bashkëpunimi nga i cili duhet të marrin dhe të tjerët si shembull, atëherë mund të themi se solli diçka të re në politikën administrative të shtetit.
Pra, ju duket se Lulëzim Basha e ka këtë fillim?
Ky e ka të ngulitur këtë, tani varet dhe nga pala tjetër, se për të bërë paqe dhe për të bërë luftë duhen gjithnjë dy palë.
Po e akuzojnë për spastrime politike nga bashkia?
Në një takim elektoral iu bë një pyetje e drejtpërdrejtë, sesi do të sillej ai me një aktivist të partisë apo me mikun e tij që do të shkojë t’i kërkojë një favor. Iu përgjigj aty për aty në mënyrë të drejtpërdrejtë, me aktivistin e partisë dhe mikun jam i gatshëm të ndaj plaçkat e shtëpisë, por ajo që është e qytetit nuk më përket mua, që do të thotë që ky njeri është i vendosur të luftojë korrupsionin. Tani kjo nuk do të thotë që me ardhjen e Bashës në bashki do të zhduket korrupsioni, por me frymën që po fut kryetari i ri, nuk do të punojë më ryshfeti në Bashkinë e Tiranës. Ai do të bëjë decentralizimin dhe do të fuqizojë veten duke u dhënë kompetenca 11 njësive bashkiake dhe qytetarët nuk do të sillen rreth bashkisë me një letër në dorë, por do të mund të mbarojnë punë te rajoni i tyre. Kjo është thënë dhe përsëritur, por Basha është i vendosur ta bëjë këtë dhe në këtë mënyrë fuqizon potencën e vet të qeverisjes. Ai ka vendosur të bëjë konsulta me qytetarët, duke u bazuar te fjala e urtë që thotë se, nëse nuk ke kohë të dëgjosh njerëzit nuk ke kohë të qeverisësh. Ai është i vendosur të dëgjojë qytetarët dhe të kërkojë forma të reja në zgjidhjen e problemeve të përbashkëta. Këto duken ide të thjeshta, por që lëvizin punë të mëdha dhe unë them ky njeri duhet të lihet të punojë dhe duhet ndihmuar. Brenda 3-4 vjetëve do të arrijë të formojë veten dhe të dallohet si një lider i së djathtës duke qenë një masë koke më lart se ata që e rrethojnë.
E keni për gjatësinë një mase koke më lart?
Qesh...jo jo, sepse ne historikisht kemi vuajtur gjithmonë nga njerëzit e gjatë. Nuk ka të bëjë shtati fare, e thashë në mënyrë figurative. Nuk e di nëse unë do të arrij ta shikoj Bashën në krye të qeverisë për 3-4 vite, por për mua do ishte një hap më tej drejt Europës, jo se kam ndonjë problem me Berishën, por mbase ka ardhur koha të bëhen ndryshime. Mua nuk do më dukej çudi e madhe sikur Berisha të bëhej President. Shumë njerëz që më dëgjojnë mund të thonë që e ka mendjen në vend ky apo jo, por unë i them gjërat si i mendoj dhe nuk të them mendo si unë, unë e mendoj kështu dhe besoj se është një zgjidhje.
Ju e mendoni si zgjidhje Sali Berishën President për t’i liruar vendin Lulëzim Bashës si lider i së djathtës, apo e mendoni zgjidhje formatin e Sali Berishës për të drejtuar institucionin e Presidentit?
Basha është një burrë fisnik, që ka sjelljen e duhur për këdo dhe që ka ndjenjën e mirënjohjes, që është shumë e rrallë te politikanët e sotëm, të cilët marrin atë që u duhet dhe nuk e kthejnë më kokën mbrapa të shikojnë se ç’bëhet. Unë shikoj dhe majtas dhe djathtas, por nuk shikoj ndonjë figurë më bindëse se Lulëzim Basha për të marrë drejtimin e vendit, për tërë formimin e tij kulturor, drejtimin e tij perëndimor dhe gjithçka që ka të bëjë me figurën e tij. Si institucion, deri tani Presidenca është nënvlerësuar, duke i bërë një dëm shumë të madh këtij vendi. Një President i vullnetshëm dhe i fuqishëm si Berisha në personalitetin e tij do të mund të vendoste shtetin ligjor në Shqipëri, që është një nga problemet nr.1 të këtij vendi, dhe do të çonte përpara dhe shtetin e së drejtës që është më i vështirë se shteti ligjor. Gjithashtu, Berisha do të mbronte Kushtetutën dhe të drejtat e qytetareve, veti të cilat nuk i kam parë te asnjë President........

Mapo Online/