Pirro Cako: Merr 3 shtëpi nga Inva për divorcin

[Idila]

Pirro Cako: Merr 3 shtëpi nga Inva për divorcin, por nuk mjaftonet

21/03/2010 - 09:02






Divorci i dy personazheve VIP, Inva Mula dhe Pirro Çako prej më se një viti është bërë pjesë e kronikave rozë. Dhe padyshim, me arsye. Ajo është sopranoja që ka korrur sukses mbarëkombëtar dhe që nderon emrin Shqipëri, dhe ai një nga kantautorët e njohur shqiptarë. Të dy fëmijë të dy familjeve me emër në vend në fushën e muzikës. Një arsye që do të bënte bujë që prej dekadash kur çifti u dashura, fejua, martua dhe u largua nga Shqipëria. Gjithë këta faktorë justifikojnë zhurmën që bëri divorci i tyre. prej më se një viti, në Gjykatën e Tiranës ka nisur procesi i divorcit mes çiftit. Prej mbi një viti Inva Mula është dashuruar dhe gati të martohet me supermiliarderin kosovar, Et’hem Ramadani. Prej mbi dy vjetësh Pirro Çako ra në dashuri me vajzën Anja, së cilës i kushtoi edhe këngën “Anjushka”. Por çfarë ka ndodhur tashmë me divorcin e tyre? Përse ai është tejzgjatur kaq shumë, në një kohë që të dy personazhet jetojnë jetët përkatëse larg njëri-tjetrit?
Divorci
Para se divorci të mediatizohej, çifti Inva Mula dhe Pirro Çako kishin rënë dakord për ndarjen. Prej mbi katër vjetësh Pirro Çako u kthye në Shqipëri për të vazhduar jetën e vet, ashtu sikurse edhe Inva të sajën, mes suksesit dhe fitimeve marramendëse. Pirro nisi kështu t’u kthehej si dikur këngëve, kompozimeve, dashurive pse jo, si një djalosh beqar. Pakti ishte bërë; ndarje pa bujë. Më pas Inva do të binte në dashuri me një miliarder, që ia vlente pse jo edhe të martohej. Lidhja u publikua shpejt dhe kjo duket se e irritoi këngëtarin Çako. Nuk kaloi shumë dhe Inva mendoi ta konkretizonte marrëdhënien e saj në martesë me Et’hemin. Por për këtë, më parë i duhej të divorcohej nga Pirro. Kështu në fund të marsit të vitit që shkoi (Dt. e regjistrimit: 31.03.2009), Inva Mula dorëzoi në Gjykatën e Tiranës kërkesën për divorc nga bashkëshorti dhe në datë 22 prill 2009 u zhvillua seanca e parë gjyqësore. Aktualisht janë zhvilluar rreth 14 seanca mes dy palëve. Ende nuk është arritur divorci. Seancën e të mërkurës avokatët e Çakos kërkuan që të vijë djali Anthony që të zgjedhë se me cilin nga prindërit do të jetojë, për shkak se ai është në shkollë. Aktualisht është vendosur që ai të vijë në seancën e radhës në 15 maj.
Arsyet e vonesës
Por, cilat janë arsyet e tejzgjatjes së këtij divorci të shumëpërfolur dhe të kërkuar me insistim të mbyllej sa më shpejt. “Bluetooth” ka investiguar së fundmi dhe ka zbuluar se gjithë vonesat vijnë nga kantautori Pirro Çako. Pak para se të niste divorci, Inva kishte rënë dakord me Pirron për t’u ndarë pa zhurmë. Ishte bërë edhe një marrëveshje mes të dyve, e cila zbulohet sot për herë të parë në faqet e suplementit tonë. Dihet që Inva ka të ardhura të majme nga puna e saj. Përveç pasurisë së saj, vetëm në Shqipëri numërohen tri vendbanime të sopranos; një vilë në fshatin turistik pranë Golemit, një apartament në zonën e Golemit dhe një shtëpi shumë e madhe pranë liqenit në Tiranë. Akordi mes çiftit ishte, që Pirro të mbante dy shtëpitë; apartamentin në Golem, (ku kalojnë pushimet çdo vit prindërit e Pirros) atë tek zona e liqenit (ku aktualisht jeton Pirro), si edhe një apartament të vogël në Paris, të cilin Inva ia ka falur Pirros. Kjo ishte marrëveshja. Dhuratë tri shtëpi për një firmë divorci. Fillimisht Pirro ishte dakord. Aq më tepër që nuk ishin gjëra të fituara me djersën e tij, por dhurata të mirëfillta nga bashkëshortja, Inva. Por ja që rrugës marrëveshja u thye nga Pirro. Ai nuk u kënaq me kaq. Thuhet se Pirro i kërkon më tepër se kaq Invës. Ai po e stërzgjat divorcin me pretendimin se do të marrë kujdestarinë e të birit, Anthony, në një kohë që prej 4 vjetësh ai shihet shumë rrallë me të birin (hera e fundit, Anthony erdhi të ndiqte të atin në Festivalin në RTSH në fund të dhjetorit), pasi ai jeton në Paris me të ëmën, e cila i ka krijuar të gjitha kushtet për një jetesë më se luksoze. Siç thonë njerëzit, ai vetë dëshiron të jetojë me Invën. Megjithatë, avokatët e Çakos dhe ky vetë, këtë përgjigje e kërkojnë nga vetë Anthony, i cili pritet ta pohojë dëshirën e tij këtë mars.

Inva dhe Et'hemi
Historia e dashurisë, e lindur në dasmën e vajzës së regjisores Vera Grabocka dhe aktorit Timo Flloko në Jerusalem, (vend ku u zhvillua dasma) mes sopranos Inva Mula dhe biznesmenit kosovar Et’hem Ramadani, vazhdon me të njëjtin pasion edhe sot. Ajo që u tha si nisje e një bashkëpunimi në ndihmë të artit mes dy personazheve u kurorëzua në një lidhje, që sot pretendon altarin. Por gjatë kësaj rruge, pengesa e kësaj dëshire mbetet divorci ende i parealizuar mes Invës dhe Pirros. Pas tij ndoshta do të kemi një dasmë vërtet madhështore, siç edhe e kanë pohuar miqtë e përbashkët të çiftit.

balkanweb