Perurohet Muzeu "Shtepia e Pavaresise"

[Arb]

U përurua muzeu "Shtëpia e Pavarësisë -Ibrahim Rugova", ku u vunë themelet e shtetit

Prishtinë, 3 dhjetor - Në 63-vjetorin e lindjes së Presidentit historik të Kosovës, Dr. Ibrahim Rugova, me një ceremoni solemne dje pasdite në Prishtinë u përurua muzeu "Shtëpia e Pavarësisë së Kosovës -Ibrahim Rugova", ku dikur ishte selia e Shoqatës së Shkrimtarëve të Kosovës.

Ky objekt për dhjet vjet është konsideruar si bazë e rezistencës, e aktiviteteve të shumta politike e kultorore, seli e LDK së. Aty Presidenti Ibrahim Rugova zhvilloi aktivitetet e rregullat politike dhe takoi diplomatë e personalitet të ndryshme nga bota. Pra, me një fjalë aty ku janë vënë themelet e shtetit të Kosovës. Kështu u vlerësua me rastin e përurimit të këtij muzeu që do të quhet "Shtëpia e Pavarësisë - Ibrahim Rugova", të cilin e përuruan Presidenti i Kosovës Fatmir Sejdiu, Ministri i Kulturës Astrit Haraçia dhe bashkëshortja e Presidentit të ndjerë Ibrahim Rugova, Fana Rugova.

Me këtë rast u zbulua edhe busti i Ibrahim Rugovës, vepër e skulptorit Ismet Jonuzi. Presidenti Fatmir Sejdiu me këtë rast tha sot, në inaugurimin e kësaj shtëpie, na mungojnë Ibrahim Rugova, Fehmi Agani, Xhemail Mustafa, Enver Maloku, Sali Çeku e shumë të tjerë.

"Eshtë hap shumë i mirë që mbështesim kështu këtë kujtesë të fuqishme me këtë monument që ka qenë bazë e rezistencës dhe organizimit politik, bazë e diplomacisë shqiptare, e parlamentit, e akteve më të rëndësishme që ka nxjerrë Kosova në këtë periudhë të vlimeve të mëdha, në këtë periudhë të paepur të rrugëtimit të Dr. Ibrahim Rugovës, apo njeriut që ne e quajmë Ati i Kombit politik të shtetit të pavarur të Kosovës në kuptimin politik", tha Presidenti Sejdiu, duke shprehur keqardhje që në këtë ditë kur po ofrohet finalizimi i procesit për statusin, nuk janë gjallë promotorët e saj.

"Rugova ishte themeltar i këtyre parimeve, themeltar i kësaj ndërtese të fuqishme dhe e quajti ndërtesa e Pavarësisë së Kosovës. Pikërisht në këtë objekt, janë bërë gjithë ato zhvillime të natyrave të nduarnduarshme dhe është dëm i madh që sot nuk do të kemi mundësinë që në këtë prezencë të kemi edhe njerëzit që ishin promotorë të këtyre lëvizjeve të mëdha", vlerësoi Presidenti Sejdiu.

Ndërkaq, Ministri i Kulturës, Astrit Haraçia, duke publikuar vendimin për shpalljen muze të "Shtëpisë së Pavarësisë - Ibrahim Rugova", tha se pikërisht në këtë shtëpi, ka punuar më se një dekadë Ibrahim Rugova. "Për të hedhur dhe ndërtuar themelet e pavarësisë së Kosovës, projekt ky të cilin e hartoi dhe udhëhoqi me guxim Presidenti ynë i nderuar, rreth të cilit u mblodhën aso kohe mendjet më të ndritura të këtij vendi të ndihmuar dhe përkrahura fuqishëm edhe nga pop ulli i Kosovës, që i qëndroi besnik liderit të vet, të kthyer tashmë në legjendë", theksoi Haraçia.

Ai tha se kjo shtëpi tash e tutje do të marrë një rol dhe funksion tjetër, duke u kthyer në Muze të Pavarësisë, me emrin e Ibrahim Rugovës, i cili do të jetë nën përkujdesjen dhe menaxhimin e Qeverisë së Kosovës, përkatësisht Ministrisë së Kulturës, Rinisë dhe Sportit.

"Kjo shtëpi do të jetë pjesë përbërëse e politikës së qeverisë sonë dhe institucioneve përkatëse, të cilat për mision kanë ruajtjen dhe mbrojtjen e letrave, dokumentacionit që ka të bëjë me aktivitetin e shkruar dhe promovuar për pavarësinë e Kosovës si trashëgimi historike e politike", tha ministri Haraçia. Drejtori i Muzeut Kombëtar, Arbër Hadri tha se ndërtesa dhe përmbajtja tematike e këtij muzeu është dhe do të jetë shenjë urë lidhëse dhe unifikuese në përpjekjet e të gjithë qytetarëve për liri, pavarësi dhe demokraci, si qëllimi ynë parësor dhe i përbashkët drejtë një jetë të pavarur dhe të lumtur.

"Vizioni i Presidentit historik Ibrahim Rugova për emërtimin e objektit, në cilin fillimisht ishte Shoqata e Shkrimtarëve të Kosovës, Pen Qendra shqiptare, selia e lëvizjes paqësore gjithë popullore për liri dhe pavarësi, selia e LDK së, shtëpie demokracisë dhe shtëpi unifikuese për gjithë faktorët politikë gjatë kohërave më të vështira për Kosovën, dhe tani me emërtimin Shtëpia e Pavarësisë së Kosovës, flet më së miri edhe një herë për largpamësinë e burrështetasit të Kosovës për paraqitjen e rrugëtimit të Kosovës drejt pavarësisë, për të cilin presidenti ynë aq shumë kontribuoi dhe sakrifikoi", tha Hadri, duke shtuar se pikërisht ky ideal që e shoqëroi gjatë gjithë jetës, edhe në kohën më të vështirë jetësore me përballimin e sëmundjes së pashërueshme, nxori edhe një herë në sipërfaqe vetitë qenësore të presidentit tonë historik, pathyeshmërinë për punën drejt realizimit të idesë, që është sinonim i pavarësisë së Kosovës.

Para të pranishmëve me këtë rast u promovua edhe video klipi i grupit "ING Band" i titulluar "Presidenti", kushtuar jetës dhe veprës së Presidentit Ibrahim Rugova. Këngën, tekstin dhe muzikën e kanë bërë tre anëtarë të bendit - Valton Ajeti, Krenar Xhaferi dhe Enlirat Ibishi, orkestrimin e ka Nexhat Macula, kurse regjinë Atdhe Muriqi. Në fund të themi se pak para se përfundonte ceremonia e përurimit dikush nga KEK-u me një gjest primitiv u "përkujdes" që ta ndërpresë energjinë elektrike në minutën 16.20. Ndërkaq një person tjetër, vetëm nja 20 metra larg nga vendi i përurimit, gjatë tërë kohës që po zhvillohej ceremonia solemne, i binte borisë nga vetura e tij, duke bërë zhurmë!

QIK-u

[Fshatari]

Përurimi i këtij muzeu u bë nga Kryetari i Kosovës, Fatmir Sejdiu, trashgimtar i denjë i presidentit të ndjerë, I.Rugova.
Mungonte në ceremoni Nexhat Daci i cili poashtu, me themelimin e LDD-së pati rivendikuar trashgëminë e I.Rugovës.
NJëri nga këta du personazhe nuk është i sinqertë, po cili nuk po i bie n'filli.
Dikush ka rrejtë! E rrena në politikë diskrediton e zhgënjen thellë elektoratin.

[Bjeshka1]

Njerz me aftesi dhe vizion qe ka pasur i ndjeri Ibrahim Rugova nuk lindin shpesh.
Shpresoj qe mos te jet rilindasi i fundit, por kam frike...