NËNSHKRIMI I MADH I KOSUMIT TË VOGËL

[GASHI75]

Shkruan : Xhevat Bislimi

Dëshira për t’u treguar i madh dhe i fuqishëm e përzier me ndjenjën e të qenurit i vogël dhe I pafuqishëm po e shtynë Bajram Kosumin të bëjë gabime dhe faje të rënda ndaj Kosovës dhe popullit të saj. Nuk është hera e parë që Kryeministri i Vogël i Kosovës nënshkruan vendime në dëm të vendit dhe të shumicës absolute (popullit shqiptar) për “hatër” të atyre që nuk ia duan të mirën vendit dhe popullit tonë dhe për “hatër” të atyre që nuk duan qëndrueshmëri, paqë dhe siguri afatgjate në rajon e më gjerë. I njëjti Kryeministër ka nënshkruar shumë vendime edhe në dëm të bugjetit të Kosovës, duke shpërdoruar paranë e mbledhur nga qytetarët tanë (taksapaguesit). Shembulli më i mirë është nënshkrimi i vendimit për ta “shpërblyer” Simon Hazelokun me mbi njëqindëmijë euro në muaj!!! Pastaj sa e sa vendime të tjera më shumë a më pak të dëmshme që ka nënshkruar dhe vazhdon t’i nënshkruaj Kosumi…

Bajram Kosumi këto ditë ka nënshkruar edhe vendimin për zbatimin e projektit për “decentralizimin” ose “reformimin” e pushtetit vendor. Për këtë project janë thënë dhe shqiptuar fjalët dhe kritikat më të rënda nga shumica absolute e deputetëve në Kuvendin e Kosovës. Ky project është vlerësuar dhe shpallur tejet i dëmshëm dhe me pasoja afatgjate për Kosovën dhe lirinë e saj edhe nga analistë të ndryshëm dhe nga shoqëria civile. Pas debatit në Kuvendin e Kosovës grupet parlamentare u morën vesh që ky project (pas përmirësimeve të nevojshme) të kthehet për miratim në organin e vetëm të zgjedhur me votën e lirë të qytetarit, në Kuvendin e Kosovës. Grupi parlamentar i PDK-së dhe i ORA-së patën kërkuar muaj të tërë që ky project të kalonte nëpërmjet Kuvendit dhe “decentralizimi” i pushtetit vendor të bëhejë me ligj ose ligje të miratuara nga Kuvendi. Tash po duket hapur se ky project është sjellur në Kuvend sa për sy e faqe (nga trysnia), për t’ua bërë “qejfin” deputetëve. Kosumi ka mbet peng i partisë që e ka bërë Kryeministër dhe i ambicjeve dhe pretendimeve të tij të shfrenuara. Sjellja dhe veprimet e papërgjegjshme (axhamillaku) të Kosumit po i habisin edhe të afërmit, shokët dhe miqtë e Bajramit ! Janë të habitur dhe të zhgënjyer edhe qytetarët e zakonshëm! Si ka mundësi, pyesin njerëzit, që Bajram Kosumi, i dënuar me shumë vite burg, të lëshohet në këto aventura kaq të rrezikshme për Kosovën dhe të ardhmen e saj të lirë e demokratike?! Ku e merr ai gjithë këtë guxim për të nënshkruar vendime të këtilla të një rëndësie të veçantë politike dhe historike pa pëlqimin e Kuvendit dhe në kundërshtim të plotë me vullnetin dhe interesatë e qytetarëve dhe të Kosovës? A e kupton ai se UNMIK-u dhe kushdo qoftë tjetër janë të përkohshëm në Kosovë? Vetëm populli i Kosovës është i përjetshëm në këtë vend, siç u dëshmua edhe gjatë shekujve…

Angazhimi i Qeverisë dhe i Kosovës në projekte të këtilla (si ky i “decentralizimit”) ka dhe do të ketë konsekuenca të paparashikueshme për qeverisjen normale, të qetë dhe demokratike të vendit. Bugjeti i varfër i Kosovës do të rëndohet tej mase me këtë project dhe me projekte të tjera (si ai i “dërrzhavni jezikut”) dhe do të çojë në destabilitet dhe tensionime të reja ekonomike e sociale.

Komuna e Hanit të Elezit dhe ndonjë tjetër me popullsi shqiptare ose turke (Mamusha) po krijohen vetëm për ta mbuluar dhe maskuar projektin fund e krye antishqiptar për krijimin e komunave etnike serbe që do të shpie edhe në ndarjen e Kosovës. Këtë qëllim dhe karakter ka edhe projektligji për përdorimin e gjuhëve. Prandaj populli i Hanit të Elezit nuk do të duhej të pranononte që ky fshat të bëhet komunë dhe ndihmesë e projektit të rrezikshëm për “decentralizimin”… Pavarësisht se Kosumi e ka nënshkruar tashmë vendimin për krijimin e “komunave pilote” qytetarët e Hanit të Elezit do të duhej të kundërshtonin zbatimin e tij. Në thelb ky project nuk është as në interes të qytetarëve serbë që duan të jetojnë në Kosovë. Nëse Bajram Kosumi dhe qeverisja LDK-AAK këmbëngulin që ky project të vihet në jetë pa ligj-e dhe pa miratimin e Kuvendit, dhe më e rëndësishmja në kundërshtim me vullnetin e popullit të Kosovës, dështimi i tij është i sigurtë. Për pasojat e mundshme përgjegjës i drejtëpërdrejtë do të jetë Kosumi dhe koalicioni qeverisës