Cilësitë e prijësit të mirë

[amari]

Gazeta Epoka e Re

Shkruan :Dr. Shefqet Krasniqi

"Çfarë përgjegjësie ka kryetari, a është pozita privilegj apo përgjegjësi, çfarë cilësish duhet ketë një prijës i mirë"

Gjatë disa jave të kaluara pamë një garë mjaft të madhe, e herë edhe të fortë rreth asaj se cili do të vijë në pushtet, gara këto që në shumë aspekte ndaj tyre kamë rezervë, si fyerjet dhe akuzat ndaj njëri tjetrit, pastaj premtimet e shumta dhe shumë herë të hiperbolizuara e shumë aspekte te tjera të cilat as që po duam ti cekim tash e as të merremi me to, ashtu siç nuk do të ndërhyjë në atë se cili ka merituar më shumë e cili më pak, ngase ato tashmë kanë kaluar, bile shfrytëzoi rastin që të gjithë atyre që kanë fituar tua urojmë fitoren duke filluar nga dr. Isa Mustafa këtu në Prishtinë e radhazi të tjerëve, duke ju deshiruar suksese të shumta në punën e tyre dhe duke e lutur Allahun që t’ju ndihmoj në realizimin e punëve të mira.
Por desha të them së pari se pushteti është një dhuratë nga i Madhi Allah i cili kujt do ja jap, por edhe kujt do ia merr, siç ka thënë Allahu: "Thuaj: "O Allah, Sundues i çdo sendi, Ti ia jep pushtetin atij që do, Ti ia heq prej dore pushtetin atij që do, e lartëson atë që do dhe e përul atë që do. çdo e mirë është vetëm në dorën Tënde, vërtet, Ti ke mundësi për çdo gjë"! (Ali imran:26). Pastaj desha ta ceki në shpejtësi përgjegjësinë e madhe që ka pushtetari, e në veçanti kryetari, ngase përgjegjësia vjen edhe sipas pozitës që e ka njeriu, ashtu që sa më e madhe pozita aq më e madhe përgjegjësia. Kryetari është njeriu i parë në shtet, apo në atë zonë, regjion, komunë etj, nga kjo ai ka përgjegjësi më të madhe sesa të gjithë qytetarët tjerë. Ai është përgjegjës për çdo njeri, plak e të ri, gra e fëmijë, ai është përgjegjës edhe për shtazët dhe shpezët, ai është përgjegjës edhe për natyrën, është përgjegjës për çdo gjë. Ai është përgjegjës për çdo dukuri negative që lejon të bëhet nën pushtetin e tij. Çdo e keqe, apo e dëmshme që bëhet gjatë mandatit të tij me dijen e tij, ai do të jap llogari për te. Ai asnjë hap para nuk do mund ta qes Ditën e Kiametit pa u pyetur për atë përgjegjësi që iu është besuar, sesi e ka kryer atë amanet, me çfarë nderi dhe përgjegjësie. Prijësi i mirë është ai që më së shumti ka frikë Allahun, që më së shumti ka devotshmëri dhe sinqeritet, ai i cili nuk e merr pozitën si privilegj, por si përgjegjësi dhe ngarkesë, shërbim për ata që i ka nën pushtetin e tij. Prijësi i mirë është ai i cili i pyet dhe konsultohet me njerëzit e dijshëm e të mençur, njerëzit të cilët ia kujtojnë atë çka e ka harruar, ia mësojnë atë që nuk e ka ditur, nuk e lënë të gabojë, e lavdërojnë kur t’ia qëllon. Prijësi i mirë është ai i cili pajiset me cilësi të mira, përpiqet të jetë më i ngritur dhe më i formuar sesa njerëzit e tjerë.
Umer Bin Abdul Azizi kur ka ardhur në pushtet dërgoi një letër te një dijetar i asaj kohe dhe kërkoi nga ai që t’ia cek cilësitë e prijësit të drejt, e ai ia ktheu përgjigjen, ku mes tjerash shënoi: "Dije o prijësi i myslimanëve se Allahu ka sjell kryetarin –prijësin- në pushtet për ta forcuar çdo të dobët, për ta ndalur kriminelin, për ta përmirësuar çdo të prishur, për t’ia marr hakun çdo të dëmtuari. Prijësi i vërtet është sikurse bariu që kujdeset për tufën e tij, është i butë ndaj tyre, i dërgon atje ku ka kullosa të mira, i largon nga çdo vend ku mund të jetë rrezik për to, i ruan ato nga ujqit, i ruan nga vapa dhe ftohti i madh. Prijësi i mirë është sikurse babai që kujdeset për fëmijët e tij sa të jen të vogël, pastaj i edukon e mëson, interesohet për furnizimin –rrizkun- e tyre, ashtu siç punon edhe për ahiretin –botën tjetër- të tyre. Prijësi i mirë është sikurse nëna e butë ndaj fëmijës së saj, e ka bartë atë një kohë në barkun e saj, pastaj e rritë si foshnje, rin zgjuar kur fëmija nuk flenë, po edhe pushon e flenë kur fëmija është i qetë. Herë jap gji e herë e ushqen, gëzohet kur fëmija është i shendosh dhe mërzitet kur ai është i sëmur. Prijësi i mirë është përgjegjës për jetimë, i ushqen të varfrit, kujdeset për të vegjlit e tyre dhe nuk i len të humbin e treten të mëdhenjtë e tyre. Prijësi i mirë është sikurse zemra në mes gjymtyrëve të tjera, nëse ajo është e mirë dhe e shendosh, edhe gjymtyrët e tjera janë të shëndosha e të mira. Po nëse ajo prishet, prishen edhe gjymtyrët e tjera.... mos u bë o prijës sikurse një rob të cilit ia besoi zotëriu i tij familjen dhe pasurinë e tij, e ai robi ia harxhoi pasurinë, ia varfëroi familjen... dije o prijës se para vetes ke një pozitë tjetër nga kjo që je tani në të. Atje do të qëndrosh gjatë, të dashurit e tu do të lënë vetëm e do të kthehen, andaj përgatitu për atë ditë që të kesh çka shoqëron... kujto atë ditë kur do të dalim nga varrezat për të dhënë llogari, atë ditë kur asgjë nuk fshihet. Tash ke mundësi të veprosh para ardhjes së engjëllit, andaj mos u sill me injorancë ndaj njerëzve, mos ju bëj atyre të padrejtën,... mos u mashtro me kompetencat dhe mundësitë që i ke sot, por mendo nesër kur do të merren ato kompetenca, kur do të jemi te lidhur me qefin... o prijës merri këto këshilla dhe vepro me to ashtu siç vepron një mjek ndaj një pacienti që shumë është i interesuar për ta shëruar, andaj edhe detyrohet ti jap barëra të ithta, por atë e bënë duke shpresuar në shërimin e tij.
Nga kjo po kuptojmë se prijësi i mirë me cilësi të mira na qenka dhuratë e madhe e Zotit xh.sh..