Peshkop Smoki trondit Belgjikën

[roadrunner]

Rrëfimi i ish-peshkopit për abuzimet seksuale rrëqeth Belgjikën

Bruksel, Belgjikë, 15 prill – Dëshmia e transmetuar në televizionet belge e një ish-peshkopi për abuzimet seksuale të dy nipërve të tij kanë shkaktuar të premten zhurmë të madhe në Belgjikë, prej kryeministrit, klerit të lartë dhe prokuroria, që u shprehën të tronditur për mënyrën se si ish-shërbyesi i udhës së zotit i tregonte abuzimet e tij.
Në një intervistë të transmetuar të enjten, Roger Vangheluwe, ish-peshkop në Bruge, foli për abuzimet seksuale si “një lojë e vogël”, në të cilën kishte prekje, por jo “seks të vrazhdë”.
“Kurrë nuk kam qëndruar lakuriq” dhe abuzimet kurrë nuk kishin të bënin me “seksualitet real”, tregonte Vangheluwe (74), transmeton AFP. Ai ka dhënë dorëheqje nga detyra më 2010, pasi kishte pranuar abuzimin e njërit nga nipërit e tij për 13 vjet – derisa djaloshi nuk i mbushi 18 vjet. Në intervistën televizive të transmetuar të enjten, ai zbuloi se kishte abuzuar edhe nipin e dytë “disa herë, disa dhjetëra herë, por jo për vite me radhë”.
Vangheluwe kërkoi falje për vuajtjet që ka shkaktuar, por mohoi të jetë një pedofil.
“Kurrë nuk e kam ndjerë as më të voglën tërheqje ndaj ndonjë fëmije”, ka thënë ai. “Dhe akoma nuk ndjej. Mes meje dhe atij (nipit) ka pasur një intimitet, i cili ndodhte secilën herë që ne shikonim njëri-tjetrin. Dhe për të cilën ne më pastaj thamë: ‘Kjo gjë nuk është në rregull’”.
Abuzimi ka ndodhur gjatë tubimeve familjare, ka thënë Vangheluwe.
Reagimet nga Kisha belge – e cila është vërshuar nga qindra raste abuzimi dhe akuza – përfshinin një dënim të ashpër.
Guy Harpigny, peshkopi i Tournai, tha se në kohën kur Kisha po përpiqet t’i shuajë dhembjet e viktimave të abuzimit, “del një ish-peshkop që thotë se ato ishin vetëm lojëra të vogla. Ky njeri ose është i sëmurë, ose ky është një reagim normal për një pedofil”.
Patrick Hoogmartens, peshkop i Hasseltit, tha se “e vajton” mënyrën në të cilën Vangheluwe “u hedh dritë” abuzimeve të tij seksuale. “Të gjithë peshkopët (belgë) kanë mbetur të habitur”, tha Josef De Kesel, peshkop aktual i Brugesit. Mirëpo Vangheluwe tha se kurrë nuk do të linte vullnetarisht priftërinë.
Kryeministri belg, Yves Leterme menjëherë kërkoi veprimin e Vatikanit.
“Është e tmerrshme ajo që ky njeri tregon. Kisha duhet të marrë përgjegjësinë që i takon. Kjo gjë nuk mund të vazhdojë më tutje”, ka thënë Leterme.
Prokurori i Bruges, Jean-Marie Berkvens tha të premten se abuzimi i nipit të dytë ka zgjatur për dy vjet. Viktima ishte vetëm 8 vjeç. Të dyja rastet kanë ndodhur shumë kohë më parë, që të mund të persekutohen.
Berkvens thotë të jetë “shokuar” nga mënyra se si Vangheluwe “i trajton të gjitha sikur të bëhej fjalë për imtësi. Mund t’ju siguroj se nuk është”.
Vangheluwe u ankua në intervistën njëorëshe se Kisha është në shënjestër të hetimeve për abuzime, ndërsa sektorët e tjerë, si organizatat sportive, janë lënë të kalojnë shumë lehtë.
“Pse duhet të jetë ndryshe kur bëhet fjalë për priftërinj? Pse duhet Kisha të paguajë kompensim, ndërsa për profesionet e tjera jo”, pyeti ai. “Kisha nuk duhet të zihet ngushtë në mënyrë më të veçantë”.
Intervista është zhvilluar në një qendër të vogël katolike në Ferte-Imbault në Francën Qendrore, ku ai u dërgua nga Vatikani. Gjatë gjithë intervistës prifti pedofil ishte i relaksuar, ndonjëherë i buzëqeshur dhe kohë pas kohe i hapte supet sikur donte të sinjalizonte se gjërat për të cilat ai fliste nuk ishin edhe ndonjë gjë aq serioze.