Masakra për kujdestarinë e vajzave

Linka_pz · 18-10-07, 20:27

Masakra për kujdestarinë e vajzave

a.bogdani
18-10-2007

Çlirim Fejzo ka qëlluar me 25 plumba të shoqen, vëllanë e saj, 2 policë e avokatë në gjykatën e Rexhio Emilias
Motivi i krimit, kujdestaria e vajzave. Vjollca Fejzo strehohej prej një viti në qendrën e grave
ITALI- Tragjedi shqiptare në gjykatën e Rexhio Emilias. Gjatë një seance divorci mes një çifti shqiptarësh, burri ka qëlluar më shumë se 25 herë me pistoletë, duke vrarë të shoqen, vëllanë e saj dhe plagosur katër persona, mes të cilëve edhe avokaten e njohur Xhovana Fava. Ngjarja e djeshme, e ndodhur rreth orës 11.00 të paradites ka shkaktuar shumë panik në ambientet e gjykatës, prej të cilave janë munduar të largohen me vrap personat e pranishëm gjatë tragjedisë. 40-vjeçari nga Durrësi, pasi ka qëlluar të shoqen dhe kunatin ka tentuar të largohet, por arratisja është mbyllur edhe me ekzekutimin e tij nga një punonjës policie, i cili po transportonte një të pandehur. Vrasësi quhej Çlirim Fejzo, 40-vjeç, nga Durrësi, resident në rrugën “Andreini” të Rexhio Emilias. E shoqja, Vjollca Fejzo, 37-vjeç, edhe ajo nga Durrësi, sipas mjekëve është e vdekur klinikisht, por mbahet në jetë me anën e aparaturave. Gjatë tragjedisë së djeshme mbeti i vrarë edhe vëllai i saj, Arjan Demcolli.Çifti shqiptar, i cili kishte shkuar dje në gjykatë për t’u divorcuar, kishte dy fëmijë.
Avokati: Ai sillej si burrë i mirë
Vjollca Fejzo është dërguar në gjendje të rëndë në spital, ku sipas mjekëve është në rrezik për jetën. Megjithë operacionin e kryer, ajo është vlerësuar prej mjekëve si e vdekur klinikisht, ndërkohë që trupat e pajetë të Demcollit dhe Fejzos, të cilët vdiqën në vend, janë lëvizur nga vendi i ngjarjes, vetëm pas ekspertizës mjeko-ligjore dhe autorizimit të prokurorisë. Sipas rrëfimit të avokatit të vrasësit, Galileo Konti, Fejzo ia ka drejtuar fillimisht armën gruas të tij, më pas vëllait të saj, avokates Fava, e madje edhe vetë atij dhe asistentit, të cilët mundën të largohen me vrap pa u plagosur. Po a kishte dhënë sinjale më parë Çlirim Fejzo për tragjedinë? “Jo. Ai sillej gjithnjë mirë. Vetëm sikur ta kishit imagjinuar, o zot…për fat të keq, këta shtiren edhe me avokatët”,-ka thënë avokati Konti për median italiane.
Tragjedi para syve të së bijës…
“Ka pritur në gjykatë mbërritjen e së shoqes dhe dy vajzave. Pak minuta pasi ato hynë në sallën e gjyqit, ka qëlluar rreth 25 herë”,-ka pohuar një dëshmitar i ngjarjes. Çlirim Fejzo e ka vendosur pistoletën në kokën e së shoqes, Vjosës, të cilën e ka qëlluar. Më pas ka ekzekutuar edhe të kunatin, i cili është përpjekur ta çarmatosë.Është ky rindërtimi i tragjedisë së ndodhur në gjykatën e Rexhio Emilias. Pas këtij momenti, 40-vjeçari ka hapur zjarr ndaj gjithkujt që i gjendej vërdallë, përfshirë këtu avokatët e tij, ndërsa plagosi dy policë, avokaten e së shoqes dhe një tjetër person, identiteti i të cilit ende nuk është qartësuar. Më pas, Fejzo është vrarë teksa po tentonte të arratisej nga salla e gjyqit drejt ambienteve të jashtme të gjykatës. Fejzo, i cili jetonte prej 10 vitesh në Itali dhe prej 7 vitesh në Rexhio Emilia ishte konsideruar i rrezikshëm, pasi kishte disa histori të dhunshme brenda familjes. Për këto motive, e shoqja ishte mysafire prej një viti e “Shtëpisë së Grave”, e trajtuar nga kjo organizatë. “Dhe jo vetëm kjo”,-pohon avokatja e njohur, Xhovana Fava, e plagosur lehtë në shpatull, e cila ka dashur të lërë spitalin për t’u marrë me atë që kishte ndodhur, histori e një vdekjeje të paralajmëruar. Sipas dëshmive të marra në gjykatë, motivi i kësaj tragjedie duket se është kujdestaria e vajzave, ndërsa shkaku nxitës është bërë vizita surprizë e Fejzos tek njëra prej vajzave, dy ditë më parë. Mësohet se ai kishte shkuar për të marrë të bijën nga shkolla pa lajmëruar, ndërkohë që ishte përplasur për këtë gjë me të shoqen. Një tjetër gjyqtar, Luka Guerzoni, i pyetur rreth polemikave të hapur për futjen e një personi të armatosur në gjykatë pohoi dje se në fund të vitit 2001 ka qenë gati një plan për të vendosur telekamera dhe një kontrollues të metaleve, duke shtuar se ky plan ka mbetur në letër. Përgatiti:
Avokati i Fejzos
“Fejzo ia ka drejtuar fillimisht armën gruas të tij, më pas vëllait të saj, avokates Fava, e madje edhe mua dhe asistentit, që mundëm të largoheshim me vrap pa u plagosur. Po a kishte dhënë sinjale më parë Çlirim Fejzo për tragjedinë? “Jo. Ai sillej gjithnjë mirë. Vetëm sikur ta kishit imagjinuar, o zot…për fat të keq, këta shtiren edhe me avokatët”
Xhovana Favo
Avokatja e njohur, Xhovana Fava, e plagosur lehtë në shpatull, ka dashur të lërë spitalin për t’u marrë me atë që kishte ndodhur, të cilën e ka quajturhistori të një vdekjeje të paralajmëruar. Fava, një avokate e njohur e çështjeve civile, mbronte Vjollca Fejzon në procesin gjyqësor që po zhvillohej në sallën e gjyqit të Rexhio Emilios, ku edhe mbeti e plagosur
Motivi
Sipas dëshmive të marra në gjykatë, motivi i kësaj tragjedie duket se është kujdestaria e vajzave, ndërsa shkaku nxitës është bërë vizita surprizë e Fejzos tek njëra prej vajzave, dy ditë më parë. Ai ka shkuar në shkollë për të marrë të bijën, por është denoncuar nga Vjollca, e cila nuk ishte njoftuar për këtë gjë. Pas këtij incidenti, Fejzo ka shkuar me armë në gjykatë
Bashkëshortët janë njohur që fëmijë. Aventura italiane e ktheu dashurinë e tyre në tragjedi
Çlirimi dhe Vjollca, një histori
dashurie e mbyllur në tragjedi
Njiheshin që fëmijë, kohë kur luanin së bashku rrugicave të qytezës së quajtur Sukth, rreth 10 kilometra larg Durrësit. E ndihmuar edhe nga afërsia e shtëpive të tyre, miqësia e fëmijërisë u kthye në dashuri gjatë adoleshencës. Çlirimi dhe Vjollca janë martuar, duke u zhvendosur në një shtëpi që ai e ndërtoi thuajse ngjitur prindërve të saj. Për shumë vjet, kanë qenë gjithnjë bashkë, derisa vendosën të tentonin aventurën italiane, ku jetonin katër vëllezërit e Vjollcës. Kjo ëndërr u mbyll dje në mënyrë dramatike në pallatin e drejtësisë së Rexhio Emilias. Fillimisht mungesë besimi e më pas tronditje. Janë këto reagimet e njerëzve që njihnin mirë Çlirimin, Vjollcën dhe Arjanin, teksa mësonin tragjedinë e ndodhur në Itali. Të tre personat njihen në Sukth si punëtorë, ndërsa Çlirimi si një djalë i mirë. Në Sukth jeton vetëm Diturie Demcolli, nëna 57-vjeçare në pension e Vjollcës dhe Arjanit. Një i afërm, Servet Përfundi, i ka treguar një gënjeshtër. "Vjollca dhe Arjani kanë mbetur të plagosur në rrethana ende të paqarta dhe janë të dy në spital”,-i ka thënë ai, duke shtuar për mediat shqiptare se nevojitej kurajo e madhe për t’i treguar të vërtetën. Çlirim Fejzo ishte në Sukth gushtin e kaluar, kur fjeti në shtëpinë e tij që nuk ka dashur ta japë asnjëherë me qera, megjithëse ndodhet në Itali prej 10 vitesh. “Ishte mjaft i lidhur me atë shtëpi të vogël”,-tregojnë në Sukth, ku mesa duket kërkonte të gjente thelbin e një dashurie të humbur. “I njihja të dy. Ai ishte person shumë i qetë, një djalë flori që s’i ka bërë keq kujt. Kushedi se çfarë i ka kaluar nëpër kokë”,-thotë Edison Maraj.
Deputetë të partive të djathta: Emigrantët e kanë kthyer Italinë në Far West. Mungon siguria për vendasit
Tragjedia në gjykatë hap
debatin për emigrantët
ITALI-Tragjedia e ndodhur paraditen e djeshme në gjykatën e Rexhio Emilias ka ndarë në dy pjesë opinionin publik në Itali. E ndërsa debati është fokusuar më shumë tek niveli i sigurisë në gjykata, një pjesë e politikanëve kanë rikthyer diskutimet për emigrantët e huaj në Itali. Deputetë të “Forza Italia-s” dhe “Lega Nord” e kanë cilësuar vërshimin e emigrantëve si kërcënim për sigurinë e vendit. Izabela Bertolini e “Forza Italia” ka komentuar dje tragjedinë, duke akuzuar të majtën për favorizimin e emigrantëve. “Invazioni i emigrantëve, i favorizuar nga e majta në qeveri e ka transformuar vendin tonë në një Far Ëest. Vrasjet e bëra nga një shqiptar, ditën për diell, në gjykatën e Rexhio Emilias tregojnë sesa dramatike është siguria në qytetet tona”,-ka thënë ajo, duke i kërkuar shpjegime qeverisë për italianët, që sipas saj janë gjithnjë e më të terrorizuar prej vrasjeve të kryera nga ekstrakomunitarët.
***
Në të njëjtën linjë, madje edhe më i ashpër ka qenë edhe Angelo Alessandri, deputet i “Lega Nord” në reagimin e tij. “Duhej një tjetër tragjedi për të kuptuar se nuk mund ta tolerojmë më emigracionin”,-ka thënë ai.“Taninë Emilia, çdo ditë gjen një buletin lufte”,-ka pohuar ai, duke kujtuar përplasjet entike, episode të dhunës kundër grave, shpërndarjen e drogës në territor e tashmë edhe vrasje në një sallë gjyqi, duke e kthyer tragjedinë e djeshme në një debat politik mes të majtës dhe të djathtës për emigrantët. Ndërkohë, shumë deputetë të tjerë janë fokusuar tek mungesa e sigurisë në gjykatat italiane, çka sipas tyre është edhe debati më i frytshëm që duhet bërë për këtë ngjarje të rëndë.
***

Linka_pz · 18-10-07, 20:29

Tragjedia e ndodhur dje në Rexhio Emilia të Italisë ka hapur debat për nivelin e sigurisë në gjykata. Ngjarja e rëndë, e ndodhur në një sallë gjyqi, prej së cilës mbetën të vrarë tre shqiptarë, pjesëtarë të një familjeje dhe u plagosën dy policë dhe një avokate ka rikthyer në qendër të vëmendjes masat e sigurisë nëpër të ashtuquajturat pallate të drejtësisë në Itali. Njëri prej gjyqtarëve ka pohuar se në vitin 2001 ka pasur një plan për pajisjen e gjykatës së Rexhio Emilias me kamera sigurie dhe një aparat kontrolli për metalet, por ky plan mbeti në letër. Ndërkohë, ngjarja e djeshme me protagonist një shqiptar pritet të debatohet gjatë në Itali, jo më shumë për atë që ndodhi sesa për kushtet e sigurisë nëpër gjykata. Përg: a.bogdani
TRAGJEDIA
Nëna e Demcollëve, e
panjoftuar për tragjedinë
Banorët eSukthit janë të tronditur për tragjedinë e ndodhur paraditen e djeshme në Rexhio Emilia në Itali.E ndërsa shkaktari i tragjedisë së djeshme ka plot të afërm në Sukth, nga familja Demcolli gjen vetëm nënën e Vjollcës dhe Arjanit. Dituria ishte ndër të vetmit banorë të Sukthit që nuk e dinte ç’kishte ndodhur me dy fëmijët e saj në Itali. Nëna e 6 fëmijëve ishte njoftuar se Vjollca dhe Arjani ishin plagosur në rrethana ende të paqarta, por gruas në pension i kishin thënë se atyre nuk iu rrezikohej jeta. Të afërmit dhe fqinjët që e kanë marrë vesh më parë ngjarjen, kanë treguar se nuk ia kanë thënë ende. "Ajo është është e moshuardhe nuk dihet se si e pret këtë lajm",-kanë pohuar ata për mediat. Nga ana tjetër, po këta persona kanë marrë masat për përgatitjen e shtëpisë njëkatëshe dhe hapjen e dyerve për mortin e dyfishtë.
Gjyle Bina pohon se Çlirimi i kishte thënë që Vjollca nuk i jepte divorcin
Motra e autorit: Biseda e
fundit me Çlirimin në telefon
SUKTH- Gjyle Bina, e motra e protagonistit të tragjedisë së djeshme në Itali ka justifikuar dje aktin e të vëllait, duke ia hedhur fajin kunatës së saj. Bina pohon se është njoftuar për vdekjen e Çlirimit dhe gruas së tij nga vëllai tjetër, që edhe ky banon prej kohësh në Itali. Ajo pohon për mediat se kishte pasur dijeni për sherret e vazhdueshme midis vëllait dhe kunatës së saj, ndonëse siç pohon vetë, kishin afro 22 vjet të martuar dhe nga kjo martesë kishin lindur dy vajzat e tyre 11 dhe 16 vjeçe. Gjyle Bina pohon për median se grindjet mes dy bashkëshortëve janë ashpërsuar gjatë dy viteve të fundit, kohë kur ishte depozituar edhe padia për divorc në gjykatë. “Para dy vitesh, grindjet janë ashpërsuar tepër dhe në këtë mënyrë, çështja ka shkuar në gjykatë”,-thotë e motra e protagonistit të tragjedisë. Gjyle Bina është shprehur se kishte folur para një jave me të vëllanë e saj, Çlirimin në telefondhe ai i kishte thënë: "Vjollca nuk pranon që të më japë divorcin. Arsyeja janë vajzat që kanë pranuar të rrinë me mua dhe në këtë mënyrë ajo do që të më acarojë që unë të bëj veprime të dhunshme në mënyrë që të njoftojë policinë". Sipas Gjyle Bibës, shkak i kësaj ngjarjeje që përfundoi me tre të vdekur është kunata e saj, Vjollca Demcolli, pasi me sjelljen e saj ka sjellë shkatërrimin efamiljes, duke lënë jetime dy vajzat. Gjatë kohës që kanë nisur procedurat për divorcin, VjollcaDemcolli ka shkuar për të jetuar në “Shtëpinë e Grave”, një qendër kjo për gratë e dhunuara në Itali. Sipas raportimeve nga mediat italiane, shkak i tragjedisë së djeshme ishte bërë vajtja e Çlirimit në shkollën e së bijës, pa lajmëruar. Për këtë ngjarje, Vjollca kishte denoncuar në polici, veprim ky që duket se e ka shtyrë 40-vjeçarin nga Sukthi të shkojë në sallën e gjyqit i armatosur.
Ll.Kallço