Pirja e ujit ndikon tek të menduarit

[rilinda]

Pirja e ujit ndikon tek të menduarit
http://img207.imageshack.us/img207/5636/shatervanidr0.png


Kënaqësia që na jep uji kur e pimë mund të dëmtojë aftësinë për të menduar. Psikologu Peter Rogers dhe kolegët e tij të Universitetit të Bristolit, iu lutën gjashtëdhjetë vetave të tregonin më parë nëse ishin të etur apo jo. Pastaj një pjese të eturve dhe një pjese që nuk ishin të etur u dhanë nga një gotë ujë (330 mililitra), që kishte një temperaturë prej 10 gradësh celsius. Të tjerëve nuk u dha ujë. Pastaj u dhanë për të zgjidhur disa probleme. Ata që në fillim të eksperimentit ishin me të vërtetë të etur dhe që kishin pirë nga një gotë me ujë, u treguan 10% më të aftë për të zgjidhur probleme nga ata që nuk kishin pirë ujë. Kurse atyre që u ishte dhënë nga një gotë ujë, ndonëse nuk ishin të etur, ishin 5 % më të paaftë për të zgjidhur probleme nga ata që nuk kishin pirë ujë. Nga kjo shkencëtarët nxorën përfundimin se pirja me shumicë e ujit - të paktën kur nuk je i etur - ndikon për të keq në aftësinë për të menduar. Rogers thotë se nuk përjashtohet mundësia që në këtë rast ka të bëjë edhe temeperatura e ujit, ku trupi detyrohet të përdorë një pjesë të energjisë së tij për të përballuar pasojat që sjell një gotë uji e ftohtë e padëshirueshme në barkun tonë.

Dhuna si impuls Truri i njeriut ka një rrjet natyror vëzhgimi dhe balance që kontrollon ndjenjat negative. Sipas një studimi të bërë nga psikologu Richard Davidson i UW - Madison, në 500 njerëz me çrregullime në personalitet, dëmtime të trurit që në moshë të vogël dhe në vrasës del se shkëputjet që mund të ndodhin në këtë rrjet të trurit rrisin rrezikshmërinë për pasjen e sjelljeve të dhunshme. Studimi u përqendrua në vëzhgimin e aktivitetit të trurit në rajone të ndryshme të sipërfaqes ballore të tij, në të cilën Davidson thotë se gjendet mekanizmi thelbësor i kotrollit të ndjenjave negative. Ky zbulim, ku dhuna ka të bëjë me çrregullimin mendor, do të çonte në gjetjen e terapive të reja kundër personave të dhunshëm. Duke pasur parasysh plasticitetin e trurit dhe faktin që truri ndryshon përgjatë përvojës që fitohet, terapitë e reja mund të sillnin rezultate shumë pozitive.

Drita prish ngjyrat
Drita është e përbërë nga gjatësi të ndryshme valësh - secila ngjyrë i përgjigjet një gjatësie. Kështu, ngjyra e gjelbër është prej 500 nanometrash. Kjo do të thotë se pigmentet e gjelbra e pasqyrojnë mbrapsht këtë gjatësi vale, por thithin gjatësitë e tjera. Kur kemi të bëjmë me dritë intensive, energjia e thithur shpërndahet në molekulë; kjo bëhet e paqëndrueshme dhe për shkak të kësaj energjie shtesë mund të kryejë lehtë reaksione me elementët përbërës të ajrit. Molekula shkatërrohet. Në këtë mënyrë zbardhet pjesa më e madhe e pigmenteve natyrore. Po kështu edhe rrobat tona nën dritën e fortë të diellit. Ndërsa fibrat artificiale, si poliakrili, e përballojnë më mirë dritën e diellit. Pëlhura sintetike mund ta heqë shpejt qafe energjinë.