Ngjarje

[rilinda]

750.000 euro për dashnorin virtual

http://telegrafi.com/fo/fun/f.0128030353322_m.jpg


Një kontabiliste ka vjedhur dhjetëra milionë jenë nga kompania e saj për përkujdesje dhe shërim të nënës, për të "fejuarin" e saj nga interneti, të cilin nuk e ka parë kurrë, dhe i cili të gjitha paratë i ka shpenzuar nëpër ndeja dhe duke pirë.
Kjo grua, tani 30-vjeçare, “të dashurin” e saj e ka takuar në vitin 2001 në internet, por nuk e ka parë asnjëherë... derisa në muajin tetor të vitit të kaluar i ka bashkuar gjyqi.

I përzgjedhuri i saj, tani 32-vjeçar, i ka dërguar asaj fotografinë e dikujt tjetër, të një mashkulli shumë tërheqës dhe të bukur.

Duke mbajtur lidhjen vetëm përmes e-mailit dhe telefonit, mashkulli në një moment i ka kërkuar t’i ndihmojë me para, sepse gjoja po mbante gjallë nënën e sëmurë.

Viktima fillimisht i ka dërguar paratë e saj, ndërsa më vonë kishte filluar të vidhte edhe kompaninë e saj.

"Kam menduar se nuk do të më donte më nëse nuk do t’ia jepja paratë", i ka thënë japonezja policisë.

Kontabilistja dhe dashnori i saj virtual janë arrestuar, derisa policia i ka ngarkuar për vjedhje të 120 milionë jenë (750.000 euro).

[rilinda]

Aeroplani Boeing bën ndeshje me një viç

http://telegrafi.com/fo/fun/f.0128170137946_m.jpg


Përplasja e një aeroplani të udhëtarëve me një viç të pakujdesshëm, ka rezultuar me dëmtimin e motorit të majtë të aeroplanit. Fatmirësisht, viktima në njerëz nuk ka pasur, derisa për fatin e kafshës, e cila po "kulloste" në pistë, nuk dihet gjë.
Boeing 737 me 141 udhëtarë është ndeshur me një viç gjatë aterrimit në një aeroport, në perëndim të arkipelagut indonezian.

Në fatkeqësi nuk ka pasur viktima në njerëz, derisa është dëmtuar motori i majtë i aeroplanit të kompanisë ajrore Merpati Nusantara, ka thënë drejtori i aeroportit.

Agjencia Antara nuk ka dhënë detaje për fatin e viçit.

Incidentet që kanë të bëjnë me sigurinë e aeroporteve, janë të shpeshta në Indonezi. Shtetet e Bashkuar dhe Bashkimi Evropian nuk u rekomandojnë qytetarëve të tyre të udhëtojnë me kompanitë ajrore indoneziane.

Gjysma e aeroporteve të Indonezi nuk i përmbushin normat ndërkombëtare, ka pohuar në muajin prill të vitit të kaluar, një drejtor i trafikut ajror të këtij vendi.

[rilinda]

Puplat mbulojnë patrullën kufitare në Bjellorusi

http://telegrafi.com/fo/fun/f.0127140926983_m.jpg


Rojet kufitare në Bjellorusi janë vënë në kërkim të një personi, i cili ka tentuar të kontrabandonte hiç më pak se treqind papagaj në këtë shtet, duke i vendosur ata në pjesën e prapme të biçikletës.
Rojet kanë parë personin derisa ishin duke kryer një patrullë rutinore, përgjatë kufirit me Ukrainën.

Por kur ata i kishin bërë thirrje për t'u ndalur, ai kishte kërcyer nga biçikleta dhe ishte fshehur në pyllin e afërm.

Rojet i gjeten shpezët e futura në gjashtë kuti të lidhura në pjesën e prapme të biçikletës.

Dy nga zogjtë kishin ngordhur, por të tjerët ishin kontrolluar nga veterinarët, të cilën kishin thënë se janë të shëndoshë, dhe i kanë vendosur ata në një strehimore kafshësh.

[rilinda]

Fsheh kështjellën prapa dengjeve të sanës

http://telegrafi.com/fo/fun/f.0126034614658_m.jpg


Një fermer anglez ka ndërtuar një kështjellë prapa dengjeve të sanës, brenda se cilës kishte jetuar për katër vjet me radhë – duke iu shmangur kështu rregullave të planifikimit hapësinor.
Robert Fiedler shpreson të përfitojë nga Ligji për planifikim hapësinor, sipas të cilit, çdo ndërtim pa leje mund të legalizohet, nëse për katër vjet pas ndërtimit të tij nuk është bërë asnjë vërejtje tek organet kompetente.
“Ky ligj nuk vlen për këtë ndërtim, pasi që objekti ishte i fshehur prapa dengjeve të sanës, dhe askush nuk e dinte për ekzistencën e tij”, ka thënë një zëdhënëse e Redhillit, një qyteze që ndodhet 30 km në jug të Londrës.
Këshilli i qytezës planifikon ta rrëzojë këtë objekt, bashkë me objektet përcjellëse të tij, të cilat i ka ndërtuar Fiedleri.
“Pamje ballore e objektit duket si një imitim shtëpie, ndërsa nga prapa ka dy kulla”, ka sqaruar zëdhënësja - duke shtuar se ka dëgjuar që ky objekt ka edhe një kambanë.
Pronari nuk ka kërkuar leje ndërtimi, meqenëse ferma e tij ndodhet në “rripin e gjelbër”, vend ku ndërtimi është i ndaluar.
Gruaja e Fidlerit, Linda ka shtuar se fëmijët janë rritur duke shikuar sanën jashtë dritareve të shtëpisë, dhe ka sqaruar se, e kishin mbajtur djalin e tyre larg shkolle, në ditën kur ai është dashur të vizatonte shtëpinë.
“Nuk mund ta lejonim të vizatonte një mullar të madh bari, njerëzit mund të interesoheshin”, tha ajo.
Inspektorët e planifikimit ishin thirrur nga fqinjët e shqetësuar në verë të vitit 2006, mirëpo ata nuk e kishin parë shtëpinë. “Kur shkuan inspektorët, krejt çka panë ishin dengjet e sanës në tokën agrare - gjë që është e zakonshme”, tha zëdhënësja.
“Mendoj se fqinjët e dinin se diçka po ndodhte, mirëpo ishte e vështirë të thuhej”, përfundoi ajo.

[rilinda]

Tash dihet edhe zyrtarisht – posta është më e ngadalshme se kërmilli

http://telegrafi.com/fo/fun/f.0124182930803_m.jpg


Tashmë dihet edhe zyrtarisht. Dërgesa postare është e ngadalshme si kërmilli – kështu së paku është gjendja në Poloni.
Një punëtor i teknologjisë informative, pasi ka bërë llogaritjen e rrugës që ka kaluar letra deri në shtëpinë e tij – prej datës 20 dhjetor, kur ishte dërguar, deri më 3 janar, kur ai e kishte pranuar atë - ka konstatuar se atë rrugë më shpejt do ta kishte përshkuar kërmilli se shërbimi postar.

Personi i quajtur Michal Szybalski ka llogaritur se arritja e letrës në adresën e tij ka zgjatur 294 orë – ndërkaq distanca në mes të dërguesit dhe pranuesit ka qenë vetëm 11.1 km, ka bërë të ditur e pëditshmja polake, Gazeta Wyborcza.

Sipas përllogaritjes së Szybalskit, shpejtësia e udhëtimit të letrës ishte 0.03775 kilometra në orë – ndërkaq kërmilli, sipas tij, do të kishte arritur shpejtësinë prej 0.048 kilometra në orë.

[rilinda]

Hmm...A nuk e pata shtëpinë këtu?!

http://telegrafi.com/fo/fun/f.0124182841665_m.jpg


Të ktheheni në shtëpi dhe të vëreni se ju mungojnë gjësendet, mund të jetë një përjetim jo shumë i këndshëm – por të ktheheni në shtëpi dhe të mos e gjeni shtëpinë, është një përjetim vërtetë i tmerrshëm.
Kjo gjë i ka ndodhur një gruaje ruse, e cila pasi është kthyer në pronën e saj, ka kuptuar se shtëpia e saj nuk është më – madje ajo nuk ka gjetur as edhe një gjurmë të vetme nga shtëpia, ka njoftuar televizioni NTV.

"Aty nuk kishte asgjë, madje as edhe një gjurmë e vetme”, ka thënë Lyudmila Martemyanova, nga qyteti Nizhny Novgorod, e cila për disa ditë kishte munguar nga shtëpia e saj.

Më vonë ajo ka kuptuar se shtëpia i është rrënuar gabimisht nga punëtorët e një firme të ndërtimtarisë, e cila kishte marrë përsipër të bënte rrënimin e një shtëpie tjetër.

Prokurori lokal, Nikolai Govorkov, ka thënë se punëtorët e kompanisë së ndërtimeve kishin shkatërruar shtëpinë e gabuar dhe jo atë që duhej dhe që ishte fare pranë saj.

Martemyanova ka refuzuar një dëmshpërblim modest që i ka ofruar kompania, e cila ia kishte shkatërruar shtëpinë, andaj ka vendosur ta padisë atë në gjyq.

[rilinda]

Hajnat më të këqij në botë

http://telegrafi.com/fo/fun/f.0123041812450_m.jpg


Një çift kishte vendosur të bënte një plaçkitje me armë - por krejt mundi iu shkoi mbrapsht. Pikësëpari në vend të parave, ata kanë vjedhur bukë, ndërsa kanë tentuar të iknin me automjet të gabuar. Pos këtyre iu ndodhi edhe të plagosen, me një plumb të shkrepur rastësisht...
Pos që i ka dënuar me 15 vjet burg, gjykatësi Roland Williams, çiftin e plaçkitësve të pasuksesshëm australian e ka fyer, dhe më të drejtë i ka quajtur "budallenj".

Donna Hayes e Benjamin Jorgensen, të cilët kanë pranuar fajin për plaçkitjen e armatosur, kishin tentuar të vidhnin restorantin Cuckoo në Melburn, në muajin prill të vitit të kaluar. Fillimisht kishin vjedhur një qese përplot me bukë të thekur duke menduar se brenda gjendet fitimi ditor i restorantit.

Më pas Jorgensen kishte harruar se si dukej automjeti i tyre për ikje, prandaj kot kishte tentuar të hapte një automjet të gabuar. Megjithatë, kulminacioni i të gjithave ishte kur revolja që po mbante në dorë, shkrepi rastësisht, dhe plumbi goditi partneren e tij në prapanicë.

Jorgensen (38-vjeçar) do të kalojë tetë vjetët e ardhshme në burg, derisa Hayes (36-vjeçare) shtatë sosh.

[rilinda]

Nëna gjithmonë e di çka është mirë!

http://telegrafi.com/fo/fun/f.0122171046102_m.jpg


Një i ri amerikan ka mbetur pa automjetin e ri pasi që nëna e tij kureshtare, i ka gjetur nën ulëse një shishe me pije alkoolike. Nuk ka ngurruar aspak, dhe menjëherë e ka vendosur shpalljen për shitjen e veturës.
Amerikania Jane Hambleton e ka quajtur veten "nënë më e keqe në botë", në nënshkrimin e shpalljeve në gazetën lokale The Des Moines Register, ku e ka shpallur shitjen e automjetit të të birit.

"Prindërit, tërësisht ‘jo cool’, qartazi nuk e duan djalin e vet, shesin automjetin e tij. I vozitur vetëm tri javë para se nëna, që i fut hundët gjithkund, dhe e cila nuk ka jetën e vet, nën ulësen e automjetit ka gjetur një shishe alkooli. Të interesuarit mund të thërrasin “nënën më të keqe në botë'", shkruan në shpallje.

Që prej atëherë 48-vjeçarja Hambleton ka pranuar mbi 70 thirrje me urimet e llojit “është kënaqësi të shohësh që ka prindër të përgjegjshëm".

Kritiku i vetëm i zonjës Hambleton është djali i saj, i cili pohon se shishja e alkoolit nuk ka qenë e tij, por se ajo ishte lënë nga një bashkudhëtar i tij.

Automjeti sot është i shitur mirëpo “nëna më e keqe” pranon që shpallja ka qenë shumë e shtrenjtë, por edhe se njëkohësisht do të vazhdojë shpalljen për edhe një javë, thjesht sa për të marrë reagime pozitive nga njerëzit që mendojnë njëjtë si ajo.

[rilinda]

Akuzojnë metronë për shkak të puthjeve të xhiruara



http://telegrafi.com/fo/fun/f.0122061028766_m.jpg


Një i ri bashkë me të dashurën e tij kanë vendosur të padisin metronë e Shangait sepse zyrtarët e saj i kishin xhiruar ata derisa putheshin para pajisjeve për shlyerjen e biletave, ndërsa incizimin e kanë publikuar në internet.
Në video-incizimin - i cili zgjat pothuajse tre minuta dhe që është incizuar gjatë muajit shtator, ndërsa është publikuar javën e kaluar në ueb faqet Ku6.com dhe YouTube - shihen i riu dhe e dashura e tij, rreth të njëzetave, të cilët puthen me pasion, ndërsa xhirimi shoqërohet me komente të pahijshme të xhiruesit, i cili flet në gjuhën e rrugëve të Shangait.

Siç shkruan China Daily, i riu dhe e reja, të cilët kanë angazhuar një avokat që t’i përfaqësojë ata në gjyq, kanë ngritur padi ndaj të punësuarve të metrosë, që kanë shkelur të drejtat e tyre, duke i xhiruar ata pa dijeninë e tyre dhe për shkak të publikimit të xhirimit në internet.

Drejtori i metrosë ka thënë për China Daily se po kryhet një hetim rreth këtij rasti.

[rilinda]

Vidhet automjeti i policisë "i mbrojtur nga vjedhjet"

http://telegrafi.com/fo/fun/f.0121164010109_m.jpg


Një automjet i policisë, i pajisur me teknologjinë e fundit kundër vjedhjes, me vlerë prej rreth 100 eurosh, është vjedhur në Berlin – pasi që policët e kishin lënë të hapur dhe me çelës në pajisjen ndezëse.
BMW-ja speciale, e cila përmban pajisje të teknologjisë së lartë për vëzhgim, brava elektronike te sofistikuara si dhe, bllokues për të bërë atë të mbrojtur nga vjedhja, ishte krenaria e forcës policore të Berlinit.

Por ajo është vjedhur në një lagje të qytetit kur dy policët kishin dalë për të ndjekur një vjedhës makinash në këmbë, pasi që ai e kishte braktisur automjetin që e kishte vjedhur paraprakisht.

Krimineli iu kishte ikur dhe kur policët u kthyen prapa panë se BMW-ja e shtrenjtë kishte “avulluar”.

Të dy policët janë duke u përballur me masa disiplinore. Shefat e policisë kanë deklaruar se nuk e kanë as idenë më të vogël se kush ka mundur të vidhte automjetin dhe se ende janë në kërkim të tij.

[rilinda]

Vozit 120 kilometra në drejtim të kundërt
http://telegrafi.com/fo/fun/f.0121031046310_m.jpg


Një vozitës 71-vjeçar ka nxitur panik natën në mes të shtunës dhe të dielës në një autostradë italiane, pasi që ka vozitur 120 kilometra në mes të Bolonjës dhe Modenas, në drejtimin e kundërt, ka njoftuar agjencia Ansa.
Italianin e çorientuar, pas një ndjekje të gjatë dhe disa incidenteve të cilat rezultuan me dy të lënduar lehtë e ka ndaluar policia në autostradën kryesore në veri të vendit.

Mashkulli, me prejardhje nga Modena, është futur gabimisht në drejtim të kundërt, dhe sipas tij, as që e ka pasur idenë se nuk ishte në rrugë të mbarë.

[rilinda]

Ku s’ka tym, s’ka as para

http://telegrafi.com/fo/fun/f.0118032140155_m.jpg


Restoranti i parë i Pekinit në të cilin është ndaluar pirja e duhanit, lirshëm mund t’i mbyllë edhe dyert, sepse ka mbetur pa mysafirë, e më këtë edhe pa punë, ka thënë pronari i zhgënjyer.
Në Kinë më shumë se 350 milionë njerëz pinë duhan dhe për këtë fushata e autoriteteve kineze me qëllim të ndaljes së pirjes së duhanit ka hasur në rezistencë të fortë.

Puna në restorantin Meizhou Dongpo ka rënë për 80 për qind pas vendimit për ndaljen e pirjes së duhanit, ka thënë pronari i restorantit.

"Nëse vdesim, së paku do të vdesim si duhet", ka vlerësuar ai.

[rilinda]

Hajni lajmëron në polici personin e vdekur

http://telegrafi.com/fo/fun/f.0117051217933_m.jpg


Një hajn i cili ishte futur në një banesë për të vjedhur para dhe gjësende me vlerë, në atë banesë ka gjetur edhe trupin e pajetë të pronarit. Ai menjëherë ka lajmëruar policinë, për të evituar kështu edhe padinë për vrasje.
Policia ka arritur në banesë dhe ka gjetur trupin e pajetë të mashkullit 64-vjeçar, pa shenja të vdekjes së dhunshme. Sipas të dhënave të para, bëhet fjalë për një pronar banese, i cili ka qenë i vdekur për dy javë para se hajni ta gjente atë.

Policia ende nuk e ka gjetur hajnin.

[rilinda]

Policia lituaneze pyet të dyshuarën: A nuk je e vdekur a?

http://telegrafi.com/fo/fun/f.0116165021289_m.jpg


Policia e Lituanisë në qytetin Klaipeda është hutuar kur ka zbuluar se një grua, e cila ishte arrestuar një javë më parë për vjedhje dyqanesh, ishte regjistruar si e vdekur një muaj më herët.
Prindërit e gruas e kishin identifikuar gabimisht trupin e një gruaje të vdekur të gjetur në një pyll, si bija e tyre 27-vjeçare, Natalya Pavlova, e cila është zhdukur nga shtëpia që prej muajit nëntor të vitit të kaluar, ka thënë policia të mërkurën.

Ka dalë në shesh që Pavlova ishte gjallë dhe me shëndet të mirë, si dhe po jetonte me të dashurin e saj në po të njëjtin qytet.

"Prindërit e saj e kishin identifikuar trupin e vdekur si bijën e tyre. Çfarë mund të bënim?" ka thënë për Reuters zëvendëskomandanti i policisë lokale, Petras Mikalauskis.

"Ka qenë rasti im i parë i këtij lloji në tërë përvojën time", ka shtuar ai.

[rilinda]

Dashuria me gjemba e vëllezërve bullgarë!

http://telegrafi.com/fo/fun/f.0116070019825_m.jpg


Dy vëllezër bullgarë kanë ndarë shtëpinë e tyre me tel gjembor, pasi që kanë hedhur njëri-tjetrin në gjyq, më shumë se dyqind herë.
Taso Hadjiev, 74-vjeçar, dhe vëllai i tij Asen, 75-vjeçar, nga Malka Arda në Bullgari, herën e parë kishin paditur njëri-tjetrin në vitin 1968, për shkak të një kontesti pronësor, respektivisht tokës, që ua kishin lënë trashëgimi prindërit e tyre të ndjerë.

Që prej atëherë, ata kanë pasur telashe të vazhdueshme, dhe asnjëri prej tyre nuk ka arritur të tubonte para të mjaftueshme për t’u larguar nga shtëpia ku janë rritur, sepse krejt të ardhurat i kishin shpenzuar për t’i paguar avokatët.

Fqinja e tyre Sabka Shehova ka thënë: "Janë kapur pas kësaj gjëje me vite të tëra. Ata shkojnë në gjykatë për çfarëdo arsye të vjetër që ju shkon ndërmend, dhe shumica prej padive nuk ka të bëj me realitetin, por ata thjesht dëshirojnë të padisin njëri-tjetrin”.

"Ata janë kapur pas kësaj gjëje aq gjatë saqë, vështirë iu kujtohet pse kanë shkuar herën e parë në gjyq. Është si të shikosh një telenovelë", ka thënë Shehova.

[rilinda]

Ndalohen qirinjtë në kishën prej akulli

http://telegrafi.com/fo/fun/f.0116063243342_m.jpg


Një kishë e punuar tërësisht prej akullit në Rumani, është bërë aq e famshme, sa që është dashur të ndalohet ndezja e qirinjve brenda saj, për t’u parandaluar shkrirja.
Menaxherët e një kishe në Bjeshkët Karpate janë vërshuar nga kërkesat për martesa dhe pagëzime. Aq shumë shërbesa janë kryer brenda saj, saqë qirinjtë nuk pushonin së djeguri, duke shkatërruar kështu enterierin e kishës.

Kisha prej rreth 19 metrash katrorë ishte ndërtuar afër liqenit Balea, 2.034 metra mbi lartësinë detare, nga biznesmeni lokal, Arnold Kingleis, i cili po ashtu ka ndërtuar një hotel të afërt prej akulli.

Inge Florea, zëdhënëse e kishës, ka thënë: "Jemi vërshuar nga kërkesat për ceremoni pagëzimi, martesa apo ngjarje tjera fetare. Është një risi për njerëzit dhe diçka e veçantë që ata mund të kujtojnë më vonë".

[rilinda]

Mekaniku i cili "ia ndien erën" prishjes

http://telegrafi.com/fo/fun/f.0115045016727_m.jpg


Daniel Moncada, pas një sëmundje të rrallë kishte humbur shikimin, mirëpo ka arritur të zbulonte një talent të tij të jashtëzakonshëm. Ai, me ndihmën e shqisave të dëgjimit dhe të nuhatjes, mund të zbulojë çdo prishje në automjet dhe natyrisht ta rregullojë atë.
Daniel Moncada është ish-disenjator nga Deerfield Beach në Florida, i cili pas sëmundjes së tij të rrallë, ka humbur punën e vjetër.

Mirëpo, pasi që ka humbur shikimin, Daniel ka zbuluar talentin e tij, deri atëherë të pazbuluar – që nëpërmes nuhatjes dhe dëgjimit të përcaktojë prishjen në automjet, prandaj me ndihmën e familjes ka hapur një dyqan për automekanikë dhe shitje të pjesëve rezervë.

Klientët nuk i mungojnë, sepse të gjithë dëshirojnë të vërtetohen në “aftësitë e tij çudibërëse”.

Moncada qysh gjatë shkollës së mesme kishte punuar si automekanik, andaj punët në automjet janë të njohura për të, mirëpo disa prej punëve, për shkak të mungesës së shikimit, nuk mund t’i kryej vet.

"Nganjëherë ndihem i pafuqishëm, por kjo më kalon shpejt sepse kam mbështetje të madhe nga familja", thotë Daniel.

[rilinda]

10-vjeçari merr rrugë qindra kilometërshe

http://telegrafi.com/fo/fun/f.0115044628557_m.jpg


Një djalosh dhjetëvjeçar të cilin e kishte marrë malli për gjyshin dhe gjyshen e tij, nuk ka përtuar që, pa përcjelljen e askujt, të merrte rrugë qindra kilometëshe për t’i vizituar ata – mirëpo nuk ka arritur deri tek caku. Djaloshin e ka takuar një konduktor i sinqertë, i cili e ka "dorëzuar" atë tek prindërit e tij.
Djaloshi nga qyteti Manheim kishte vendosur të vizitonte gjyshin e gjyshen, që jetojnë në Lituani, prandaj të shtunën kishte hipur në një tren, pa i njoftuar prindërit e tij paraprakisht.

Udhëtimi i tij kishte marrë fund pas 200 kilometrash, kur konduktori e ka kuptuar se djaloshi nuk kishte biletë dhe ishte pa përcjellje të prindërve, andaj menjëherë e kishte lajmëruar policinë.

Djaloshi i “pafat” natën e kishte kaluar në një shtëpi për fëmijë, ku të dielën kishte ardhur e ëma e tij e brengosur, për ta kthyer në shtëpi. Ajo pak kohë pasi kishte kuptuar se i biri i saj nuk ishte askund kishte lajmëruar policinë lokale për humbjen e tij.

[rilinda]

"Prifti" kontrabandues i kokainës

http://telegrafi.com/fo/fun/f.0114063241599_m.jpg


Një njeri, i cili ka pohuar të jetë një prift katolik, është arrestuar në aeroportin Schiphol të Amsterdamit, pasi që policia i ka gjetur kokainë ndër rroba.
I dyshuari anonim fillimisht refuzoi të kalonte nëpër një kontroll rutinor të trupit “për arsye fetare”, ka thënë policia holandeze. Më pas i dyshuari është vërejtur duke u transferuar në një sportel tjetër të aeroportit.

Ai u kontrollua dhe më shumë se tre kilogramë të kokainës iu gjetën në pako të ngjitura rreth trupit të tij.

"Kemi parë shumë gjëra, topa bejsbolli të mbushur me kokainë, shishe të verës, por kjo është hera e parë të shohim këtë gjë", ka thënë zëdhënësi i policisë, Robert van Kapel.

Personi, i cili po udhëtonte nga Bolivia, ka vazhduar të këmbëngulte se ishte prift dhe të drejtat e tij ishin shkelur nga kontrolli.

Van Kapel ka shtuar: "Nëse dëshiron të hysh (në Evropë) duhet të kalosh nëpër kontroll të sigurisë, duhet të bashkëpunosh dhe nuk mund të refuzosh të kontrollohet trupi. Ai do të sillet para gjykatësit".

[rilinda]

Detari kthehet nga të vdekurit

http://telegrafi.com/fo/fun/f.0114062951974_m.jpg


Një detar polak, i cili u kthye nga peshkimi për të kuptuar se e kanë shpallur të vdekur, ka dështuar t’i bind burokratët se ai ende është gjallë.
Piotr Kucy, 37-vjeçar, ka thënë: "Kam qëndruar para tyre dhe iu kam thënë shikoni, unë jam gjallë, por ata nuk donin ta pranonin".

Kucy u largua nga shtëpia e tij në portin Swinoujscie për një peshkim dyjavor, por kur u kthye mori vesh se autoritetet e kishin shpallur atë të vdekur, pasi që kishin identifikuar një trup të vdekur, i cili ishte gjetur në breg të detit.

Ai ka thënë se që prej atëherë, autoritetet lokale kanë refuzuar ta pranojnë atë si të gjallë.

"Kur u ktheva dhe të afërmit e mi më panë, atyre u ra të fikët. Ata veçse më kishin varrosur, ndërsa unë i gjallë qëndroja para tyre”, ka thënë ai.

"Policia kishte gjetur një trup të vdekur dhe, kur një mik i imi kishte thënë se përngjanë me mua, ata shumë shpejt më deklaruan të vdekur. Familja ime më ka thënë se nuk ishte lejuar ta shikonte trupin si duhet. Kështu që unë u shpalla i vdekur dhe u varrosa më pas”, ka shtuar Kucy.

"Por tani unë jam gjallë dhe autoritetet nuk duket se dëshirojnë të bëjnë ndonjë gjë. E kam kontaktuar prokurorinë në Swinoujscie duke i kërkuar të më kthejnë prapa. Pesë muaj kanë kaluar që prej atëherë, dhe asnjë nuk ka lëvizur. Asnjë përgjigje. Më duhet të punoj, të siguroj veten, por nuk mundem sepse ende jam i vdekur!", ka përfunduar polaku.

[rilinda]

Edhe majmunet prostituohen

http://telegrafi.com/fo/fun/f.0112201124251_m.jpg


Prostitucioni mund të jetë vërtet profesioni më antik në botë, nëse edhe majmunët e ushtrojnë atë. Duke iu referuar të dhënave nga një studim i publikuar te revista "Animal Behavior", (Sjellja e kafshëve), meshkujt e majmunëve makakë me bisht të gjatë të Indonezisë, pastrojnë trupin e femrave nga pleshtat, në këmbim të favoreve seksuale.
Në artikull thuhet se ky është një ritual që kryhet përpara çiftezimit dhe rrit numrin e raporteve seksuale mes majmuneve. Pasi janë pastruar nga pleshtat, aktiviteti seksual i majmunëve femra jo vetëm dyfishohet, por madje rritet me një mesatare prej 1,5 deri në 3,5 raporte çdo orë.

Sipas studimit të kryer nga Michel Gumert i Universitetit Teknologjik Nanyang të Singaporit, koha që një majmun mashkull harxhon për të pastruar femrën nga pleshtat, varion nga numri i majmuneve që janë të disponueshme në atë moment.

Që me pak fjalë do të thotë se, sa më shumë femra të disponueshme të ketë, aq me pak është pastrimi i saktë dhe i gjatë, pasi meshkujt duan të kenë sa më shumë raporte të jetë e mundur, me të gjitha femrat e lira. /telegrafi/

[Fshatari]

Edhe majmunet prostituohen

http://telegrafi.com/fo/fun/f.0112201124251_m.jpg




Prostitucioni mund të jetë vërtet profesioni më antik në botë, nëse edhe majmunët e ushtrojnë atë. Duke iu referuar të dhënave nga një studim i publikuar te revista "Animal Behavior", (Sjellja e kafshëve), meshkujt e majmunëve makakë me bisht të gjatë të Indonezisë, pastrojnë trupin e femrave nga pleshtat, në këmbim të favoreve seksuale.
Në artikull thuhet se ky është një ritual që kryhet përpara çiftezimit dhe rrit numrin e raporteve seksuale mes majmuneve. Pasi janë pastruar nga pleshtat, aktiviteti seksual i majmunëve femra jo vetëm dyfishohet, por madje rritet me një mesatare prej 1,5 deri në 3,5 raporte çdo orë.

Sipas studimit të kryer nga Michel Gumert i Universitetit Teknologjik Nanyang të Singaporit, koha që një majmun mashkull harxhon për të pastruar femrën nga pleshtat, varion nga numri i majmuneve që janë të disponueshme në atë moment.

Që me pak fjalë do të thotë se, sa më shumë femra të disponueshme të ketë, aq me pak është pastrimi i saktë dhe i gjatë, pasi meshkujt duan të kenë sa më shumë raporte të jetë e mundur, me të gjitha femrat e lira. /telegrafi/

Ky studim shkencor sqaron pse burri kërkon minimum 7 gra!

[rilinda]

Prifti me para shton numrin e njerëzve në kishë

http://telegrafi.com/fo/fun/f.0130075841532_m.jpg


Një prift e ka trefishuar numrin e njerëzve në kishë, duke iu ofruar anëtarëve të famullisë para për të marrë pjesë në meshë. Atë Burkhard Westphal iu jep zarfe, të cilat përmbajnë nga pesë euro, njerëzve të cilën vijnë në meshën e së dielës në kishën e tij në Collinghorst të Gjermanisë.
Ai ka thënë se numri i zakonshëm i njerëzve që kanë marrë pjesë në meshë ka qenë rreth 60, por ai numër u rrit në 189 prej se u mor vesh se ai po jep para. "Qëllimi është të provokohet dhe të rritet interesimi për kishën. Kam dashur të sjell sa më shumë njerëz që është e mundur për të folur për Biblën", ka thënë ai.

Ai ka shtuar se shumica e njerëzve prapëseprapë i kanë kthyer paratë mbrapsht gjatë mbledhjes së fondeve – duke thënë se, "Mesazhi i Zotit për të dhënë ka depërtuar tek shumica e tyre".

[rilinda]

Paguajnë fëmijët që të lexojnë

http://telegrafi.com/fo/fun/f.0130045026618_m.jpg


Fëmijët në një vend spanjoll të quajtur Noblejas në të ardhmen do të paguhen për të lexuar, pasi që kryetari i komunës Agustin Jimenez Crespo është i bindur që kjo do t’i shtyjë ata që të duan leximin.
Komuniteti i cili ka rreth 3.300 banorë, dhe është rreth 55 kilometra nga qyteti Toledo, “do të paguaj një euro në orë familjeve fëmijët e të cilëve do të kalojnë atë kohë në bibliotekë", thuhet në deklaratë.

Bëhet fjalë për një “iniciativë pioniere dhe ambicioze në fushën e arsimimit", shton Crespo dhe sqaron se qëllimi i aksionit është “të fuqizojë rolin aktiv të prindërve në edukimin e fëmijëve".

[rilinda]

Ku është pjesa tjetër e miut?

http://telegrafi.com/fo/fun/f.0129033531920_m.jpg


Një pacient spitali në Finlandë ka gjetur një kokë miu në mesin e perimeve të ziera në pjatën e tij.
"Natyrisht, ai humbi apetitin e tij", ka thënë Sakari Kela, administrator kryesor në spitalin qendror Northern Karelia.

Shëndeti i pacientit në Joensuu, Finlandë lindore, nuk është rrezikuar nga miu i ngordhur, ka thënë Kela.

Koka e këputur e miut sipas të gjitha gjasave ka ardhur nga një qese e perimeve nga Belgjika. Trupi nuk është gjetur dhe pasi që “është një mi belgjian, pjesa tjetër e tij mund të jetë kudo në Evropë", ka thënë Kela.


Telegrafi

[rilinda]

Kërcënon qytetin me telekomandë
http://telegrafi.com/fo/fun/f.0210032725769_m.gif


Policia austriake ka shpallur gjendjen e jashtëzakonshme, kur një person i dehur është kërcënuar se do të çonte në ajër gjysmën e qytetit, me komanduesin e tij të televizionit.
Geoffrey Fryatt, 57-vjeçar, i cili jetonte në një vend luksoz të golfit në Brisbane, është arrestuar nga policia paraushtarake pasi që ua kishte futur tmerrin fqinjëve se do të shpërthente një dyqan të lëndëve kimike me telekomandën e tij.

"Një shtypje në buton dhe gjysma e Brisbanet do të shkojë në hava", u ka thënë ai policëve.

Avokati i Fryattit i ka thënë Gjykatës së Qarkut në Brisbane se klienti i tij e kishte humbur kontrollin, pasi që kishte humbur të gjitha kursimet e tij në një mashtrim, njofton Brisbane Times.

"Njerëzit me të vërtetë kanë frikë nga shpërthimet e rastit", ka thënë gjykatësi para se ta dënonte kërcënuesin me një vit burgim me kusht.

"Frikësimi i pjesëtarëve të publikut me kërcënime të bombave ka ndikim shumë më të madh tani se dikur", ka shtuar gjykatësi.

Fryatt ishte i brengosur se dënimi mund t’i prishte planet e tij për të kryer punë humanitare jashtë vendit, por gjykatësi i kishte thënë: "Le të rregullojmë ty si duhet këtu, para se të dërgojmë në ndonjë vend të botës së tretë".

Telegrafi

[rilinda]

Një suedeze për herë të dytë lind në automjet

http://telegrafi.com/fo/fun/f.0208050044766_m.jpg


Jessica Linde-Escobar ka tre fëmijë, ndërsa vetëm të dytin ka arritur ta lindte në spital. Vajzën e parë ajo e ka lindur në parkingun afër spitalit gjinekologjik, derisa fëmijën e fundit e ka sjellë në jetë, rrugës për në spital.
Jessica Linde-Escobar në periudhën kohore prej pesë vjetësh ka lindur për të dytën herë në automjet.

Vajzën e parë e ka lindur në parkingun e spitalit, sepse nuk ka arritur me kohë në repartin e maternitetit. Fëmijën e dytë e ka lindur në objekt spitalor, ndërsa kur Jessica ka filluar të ndiej dhimbjet e shtatzënisë së tretë, ajo dhe bashkëshorti kanë nxituar për në spital.

Megjithatë atje iu është thënë se kanë harruar dokumentacionin shëndetësor, prandaj kanë vendosur që “me shpejtësi” të kthehen në shtëpi për rezultatet. Vajza e tyre më e re ka lindur në autostradë, rrugës për në maternitet.

Çifti bashkëshortor ka vendosur që në rast të shtatzënisë tjetër, lindjen ta kryejnë në shtëpi.

[rilinda]

Burri 128 kilogramësh mbyt gruan duke u ulur mbi të

http://telegrafi.com/fo/fun/f.0207033619963_m.jpg


Një mashkull me peshë prej 128 kilogramësh është dënuar në Gjykatën Hildensheim, në qendër të Gjermanisë, me pesë vjet burg, për shkak se është ulur mbi gruan e tij dhe ia ka thyer 18 brinjë, derisa ajo ka vdekur nga pasojat e lëndimit, një muaj më vonë.
Zënka e cila i ka paraprirë fundit tragjik, ka ngjarë në muajin prill të vitit 2006, kur burri nuk ka pranuar që në kompjuterin e tij të dëgjonte këngën e preferuar të gruas së tij, të cilën e këndon këngëtari italian, Al Bano.

Konflikti ka eskaluar kur gruaja e inatosur e ka gjuajtur burrin e saj me shishe të birrës, ndërsa ai i është "kundërpërgjigjur" me goditje dhe në fund është ulur mbi të për dy minuta, ka thënë zëdhënësi i gjykatës.

I akuzuari, gjatë kohës së kësaj ngjarje ka qenë dyfish më i rëndë se gruaja, përderisa gjatë gjykimit ka pohuar se rastësisht ka rënë mbi të.

[rilinda]

Tetëvjeçari ngujohet në prangat e nënës

http://telegrafi.com/fo/fun/f.0206041347662_m.jpg


Një djalosh tetëvjeçar është dashur të lirohet nga zjarrfikësit, pasi që është ngujuar në një palë pranga që i kishte gjetur në dhomën e fjetjes të nënës së tij.
Zjarrfikësit e kanë dërguar djaloshin në stacionin e zjarrfikësve Copnor Fire Station në Portsmouth, Hampshire, për ta liruar me freza industriale të metalit.

Prangat ishin përshkruar si të punuara nga “çeliku i kalitur” dhe nuk ishin dedikuara për t’u përdorur si lojë, raporton gazeta nga Portsmouth - The News.

Zjarrfikësi Dan French ka thënë: "Djaloshi i vogël ka ardhur në stacionin e zjarrfikësve me gjyshen e tij dhe i kishte prangat e varura në njërin kyç të dorës”.

"Para se ta liroja e pyeta nëse ishte duke ikur nga policia por më siguroi që nuk bëhej fjalë për një rast të tillë. Më pas gjyshja e tij ka treguar që, ai i kishte gjetur ato në dhomën e fjetjes të nënës së tij”, ka shtuar French.

"Ajo e kuptoi menjëherë se çfarë kishte thënë dhe e vendosi dorën mbi gojë. Është jashtë imagjinatës sime pse ndokush do të mbante pranga në dhomën e fjetjes!", ka përfunduar zjarrfikësi.

[rilinda]

Nuk mendon për pension as në moshën 85 vjeçare

http://telegrafi.com/fo/fun/f.0206055939887_m.jpg


Punëtorja më e vjetër e zinxhirit të vetëshërbimeve amerikane "Safeway", 85-vjeçarja Sally Dickerson, thotë se nuk e ka ndërmend të pensionohet, as pas më shumë se gjysmë shekulli të punës në këtë kompani.
Zonja në moshë, e cila javën e kaluar i ka mbushur 85 vjet, kishte filluar të punonte në “Safeway” më 12 shtator të vitit 1955, në qytetin Wheaton të shtetit federal Maryland. Në ndërkohë ajo ka ndërruar disa shitore të zinxhirit të njëjtë, që sot të jetë e angazhuar në vetëshërbimin e sapohapur në Silver Spring.

"Më parë do të shkoni ju sesa unë", u ka thënë me shaka Dickerson kolegëve të saj, të cilët i kanë përgatitur asaj një festim të ditëlindjes, në hapësirat e shitores.

"Ajo është gjyshja apo stërgjyshja jonë jozyrtare. Ajo është ikona jonë", ka thënë njëri prej menaxherëve të “Safeway”.

Telegrafi

[rilinda]

Gëlltit çelësin për t’u mos u kthyer në shtëpi

http://telegrafi.com/fo/fun/f.0206145432651_m.jpg


Një student i dehur britanik, i cili ka dashur të vazhdonte të zbavitej dhe t’i pengonte miqtë e tij ta kthenin në shtëpi, ka gëlltitur çelësin e banesës, njofton shtypi britanik.
"Siç e kam kuptuar, atë natë kam pirë shumë. Miqtë më kishin thënë se duhej ta ndërprisja pijen dhe të shkoja në shtëpi. Por unë kam dashur të vazhdoja të zbavitem dhe kam gëlltitur çelësin", ka treguar 18-vjeçari, Chris Foster, për gazetën "Basingstoke Gazette".

Studenti i informatikës ka fjetur atë natë tek miqtë, ndërsa kur është zgjuar, nuk i është kujtuar çfarë i ka ndodhur një natë më parë si dhe nuk kishte arritur të gjente çelësin.

"Kam menduar se miqtë po bënin shaka me mua kur më thanë se e kisha gëlltitur (çelësin)", ka thënë ai për "Daily Mail".

Foster ka shkuar në spital dhe në incizimin e lukthit e ka parë çelësin me gjatësi prej pesë centimetrash.

Doktorët më kanë këshilluar që më së miri është që çelësi të largohet nga trupi në mënyrë të natyrshme, gjë që edhe ndodhi pas 31 orësh.

Foster ka thënë se tani ndien dhimbje në fyt derisa po ha e pi.

[rilinda]

Nuk keni celular? Harrojeni WC-në!

http://telegrafi.com/fo/fun/f.0206152445805_m.jpg


Tualetet publike në Finlandën perëndimore, prej tani e tutje do të hapen vetëm me dërgimin e një porosie SMS, në mënyrë që të parandalohet vandalizmi dhe pagesa për hyrje.
Sistemi është shumë i thjeshtë: Nëse doni të futeni në WC, duhet që, në një numër të posaçëm, të dërgoni porosinë “hapu” (në gjuhën finlandeze).

Ideja bazohet në supozimin se dikush që dërgon porosi nga celulari i tij do të jetë më i pak i dhënë pas shkatërrimit dhe vizatimit nëpër WC publike, e gjithashtu evitohet nevoja për personin i cili paguan hyrjen.

Mirëpo, çfarë nëse ju ka kapur “zori”, ndërsa pikërisht në atë moment celularit tuaj i shpenzohet bateria? Apo nuk keni kredi në llogarinë tuaj (edhe pse, duhet të pranojmë se, nga burimi ku e kemi marrë lajmin, nuk është e qartë nëse hyrja do të paguhet apo jo)?

Ideja është e mirë, por mund të rezultojë me shumë nevoja të kryera pranë WC-së.

Telegrafi

[rilinda]

Jep një euro në bastore, fiton 15.000!

http://telegrafi.com/fo/fun/f.0208053748825_m.jpg


Një malazez nafakali ka dëshmuar se deri tek paratë mund të arrihet pa derdhur shumë djersë dhe me "pak" nafakë.
Pensionisti malazez ka fituar 15.000 euro në një bastore sportive, përderisa ka vënë bast vetëm një euro!

Gazeta podgoricase "Vijesti" shkruan se ai të mërkurën kishte vënë bast një tiketë prej dhjetë takimeve dhe ua kishte qëlluar të gjitha rezultateve.

Fituesi nafakali ka vënë bast tërë jetën, por deri më tani nuk ka fituar diç me peshë. "Më është realizuar ëndrra, për vetëm një euro, kam fituar 15.000", ka thënë pensionisti.

[rilinda]

Më pak kilogramë, më shumë buxhet

http://telegrafi.com/fo/fun/f.0208142650845_m.jpg


Trashësia është një prej problemeve më të mëdha shëndetësore në Meksikë, ndërsa të parët që do të ballafaqohen me kilogramët e tepërt, janë policët, mundimi i të cilëve do të shpaguhet me mjete materiale.
Për t’u ballafaquar me numrin çdo ditë e më të madh të oficerëve të trashë, autoritetet e qytetit Aguascalientes, në Meksikën qendrore, janë duke marrë parasysh një masë jo fort të zakonshme: T’iu japin stimulime në para policëve të cilët humbin në peshë.

Autoritetet së shpejti do të duhej të sillnin vendimin nëse do të paguajnë 100 peso (9 dollarë amerikanë), për çdo kilogram që policët do të humbin, ka thënë zëdhënësi i policisë.

"Kemi oficerë të trashë, të cilët që do kohë jemi duke i inkurajuar që të fillojnë me ndonjë dietë dhe të merren me sport", ka shtuar ai.

Trashësia është një prej problemeve më të mëdha shëndetësore në Meksikë, ku diabeti është vrasësi më i madh, derisa lëngjet dhe hamburgerët, çdo ditë e më shumë janë duke u bërë pjesë e ushqimit kombëtar.