5000 € shpërblim për informata rreth vendndodhjes së të arratisurve të Dubravës

[Peja-Boy]

Prishtinë, 21 gusht - Komisionari i policisë së UNMIK-ut, Richard Monk, ofroi të martën shpërblim prej 5 mijë eurosh për informata të cilat dërgojnë në kapjen e një ose më shumë të arratisurve nga Burgu i Dubravës, të shtunën e kaluar.


Veton Elshani, zëdhënës në Shërbimin Policor të Kosovës (SHPK), tha për KosovaLive se çdo informatë e qytetarëve, do të ndihmonte policinë e SHPK-së, dhe të gjithë ata të cilët janë duke vepruar për kapjen e të arratisurve.

Ai tha se hetimet rreth këtij rasti janë duke u zhvilluar në kuptimin e rrethanave të arratisjes, të dyshuarit e përfshirë që kanë mundësuar arratisjen si dhe kërkimi i të arratisurve është në proces.

“Përsërisim se këta persona konsiderohen të jenë të armatosur dhe të rrezikshëm, prandaj lusim të gjithë qytetarët që kanë ndonjë informatë lidhur me të arratisurit, të njoftojnë stacionin policor më të afërt ose të lajmërojnë në telefona”, tha ai.

Ndërkohë, Elshani tha se pesë gardianë të Burgut të Dubravës, ende po merren në pyetje nga policia SHPK-së, si të dyshuar që i kanë ndihmuar shtatë të burgosurit që janë arratisur të shtunën nga burgu.

Në anën tjetër, autoritetet zyrtare të Burgut të Dubravës, janë alarmuar për të shtuar masat e sigurisë në Burgun e Dubravës, prej nga janë arratisur 7 të burgosur.

Ndërkaq të arratisurit janë: Faton Hajrizi, i lindur më 16.02.1985, i cili mbahej në burg si fajtor për grabitje. Kjo është ikja e tij e tretë me radhë. Herën e parë, Hajrizi kishte ikur nga Burgu i Mitrovicës. Në qershor të vitit të kaluar ai është arratisur nga Burgu i Qarkut në Pejë, ndërsa katër muaj më vonë, Hajrizi është arrestuar. Hajrizi konsiderohet mjaft i rrezikshëm.

Burim Basha, i lindur më 11.05.1981, është mbajtur deri të shtunën në burgun e Dubravës për grabitje të rëndë. Ai ka kryer grabitje me armë, kryesisht në rajonin e Prizrenit, por edhe në qytete të tjera të Kosovës. Merret vesh se në disa raste ai edhe ka shkëmbyer plumba me forca të rendit, prandaj konsiderohet mjaft i rrezikshëm.

Astrit Shabani, i lindur më 03.08 1981, është i dënuar për vrasje. Ai është nga lagja Kolovicë e re e Prishtinës. Ndërkaq, Lirim Jakupi është i lindur më 01.08.1979, dhe është i dënuar për rrëmbim. Lirimi është nga Gjilani.

Ramadan Shyti i lindur më 05.09.1983, nga fshati Dmiç i Hanit të Elezit, është i dënuar për tentim vrasje dhe kalim ilegal të kufirit. Ndërsa, dy të arratisurit e fundit, Amir Sopa, 13.02.1978 nga Prishtina dhe Xhavit Morina, 13.09.1963 nga Drenoci i Malishevës, janë të dënuar për terrorizëm.

Ndryshe, për kalimin e murit të jashtëm të burgut, është përdorur çarçaf dhe një derë e metaltë, e cila ishte shkëputur më herët. Dyshohet se në distancën rreth 400 metra nga muri i jashtëm i burgut, ishte shtënë me armë zjarri nga disa të dyshuar, të cilit ishin duke i pritur të arratisurit.

Ndërsa, pas kontrollimit të atij vendi nga ku dyshohej se kishin ardhur të shtënat, janë gjetur 6 predha të mortajës, të pa shpërthyera, 3 karikatorë të zbrazët të AK-47, gëzhoja të zbrazëta rreth 45, etj.