Fatmir Limaj i hakmerret Mustafës!

[Murgesha]

Kryetari i Prishtinës, Isa Mustafa, nga muaji mars është duke pritur të takojë ministrin Limaj, por kot. Ministri I Transportit deri tani nuk e ka ndarë asnjë cent për rrugët e Prishtinës. Para tre muajve ai i ka thënë Mustafës se i ka vonuar projektet

MEXHIDE DEMOLLI
Prishtinë, 4 qershor - Ministri I Transportit dhe i Postë-telekomunikacionit (MTPT), Fatmir Limaj, nuk ka ndarë asnjë cent për rrugët e kryeqytetit. Ai deri tash ka hezituar të takohet me kryetarin e Prishtinës, Isa Mustafa. Prishtina, e përcaktuar edhe me kushtetutë si kryeqytet i Republikës së Kosovës, nuk ka arritur të përfitojë asnjë projekt nga ministria që e udhëheq Limaj, i mposhtur në zgjedhjet e vitit të kaluar nga Mustafa për kryetar të Prishtinës. Duket se Limaj nuk po i përmbahet as deklaratës, pas zgjedhjes ministër i Transportit, se "komunat nuk do ta kenë barrën kryesore në ndërtimin e rrugëve, ngase MTPT-ja do të financojë një pjesë të projekteve rrugore".
Mustafa i tha "Lajmit" se i ka dorëzuar dy projekte më 20 mars, kur e ka kuptuar se Ministria do të financojë projekte për ndërtimin e rrugëve nëpër komuna.
Por, gjatë takimit të parë, Limaj i kishte thënë se është vonuar në dorëzimin e projekteve, por i kishte premtuar se "do të futen në rend".
"Nuk e di me vonesë, a pa vonesë. Por, i kemi dorëzuar projektet si e kemi kuptuar se Ministria do të financojë projekte të komunave". Prej marsit, Mustafa është duke pritur "në rend" të takohet me Limajn, për t'i konkretizuar projektet, por është refuzuar nga ai.
"Gjatë javës së kaluar kam kërkuar të takohem me të dhe të Hënën, po ashtu, i kam bërë edhe një kërkesë, por ende nuk kam marrë përgjigje". Mustafa thotë se Limaj duhet ta trajtojë Prishtinën së paku si komunat e tjera, përkundër asaj që duhet të jetë prioritet si kryeqytet. "Ne nuk e kemi vetëm presionin e banorëve të Prishtinës, por i kemi edhe rreth 250 mijë banorë të Kosovës që çdo ditë hyjnë dhe dalin nga Prishtina, për këtë mendoj se duhet të diskutojmë edhe njëherë me Limajn".
Ndërkaq, një burim i gazetës brenda MTPT-së thotë se zyrtarët e kësaj ministrie po bëjnë presion te kompanitë që janë duke punuar në rrugët e Prishtinës.
"Këto kanë kontakte edhe me Ministrinë e Transportit, kur konkurrojnë për ndonjë rrugë, kështu që ata janë të obliguar t'i zvarritin punimet në ndërtimin e rrugëve, ngase kështu u kërkohet nga zyrtarë të ministrisë". Adem Grabovci, zëvendësministër i kësaj ministrie, e mohon mundësinë e hakmarrjes politike të Limajt ndaj Mustafës.
"Absolutisht nuk është duke u hakmarrë. Ministri nuk ka asnjë konflikt me askënd. E them me përgjegjësi të plotë se asnjë kryetar komune nuk është i privilegjuar".
Grabovci e mohon edhe presionin e mundshëm të zyrtarëve të MTPT-së, për zvarritjen e punimeve në rrugët e Prishtinës. "Ne kemi kërkuar vetëm dy kushte nga kompanitë që konkurrojnë për ndërtimin e rrugëve: të rritet kualiteti dhe të respektohet dinamika e punimeve në rrugë. Nuk kemi bërë asnjë lloj presioni te asnjë kompani në Kosovë". Ai thotë se kjo ministri e ka të ndarë buxhetin e saj në proporcion të barabartë për tërë territorin e Kosovës. "Komuna e Prishtinës i ka paraqitur me vonesë projektet e saj. Megjithatë, ato projekte janë duke u shqyrtuar dhe do ta shohim mundësinë t'i futim në listën e prioriteteve". Megjithatë, Grabovci thotë se MTPT-ja është duke investuar edhe në kryeqytet. Ai e përmend zgjerimin e rrugës për Lipjan, atë për Fushë-Kosovë dhe Mitrovicë, projekte këto të filluara nga isha-ministri i TPTsë, Qemal Ahmeti. Grabovci thotë se projekti i ardhshëm do të jetë rregullimi i trafikut "te Rrethi".