Lajme Aktuale....

[Llapjani_HH]

EULEX-i përshëndet deklaratën e Sejdiut dhe të Thaçit

EULEX-i ka përshëndetur deklaratën e përbashkët të Presidentit të Kosovës, Fatmir Sejdiu dhe Kryeministrit Hashim Thaçi.

Përmes një komunikate për media, misioni evropian në Kosovë, është shprehur i kënaqur me vullnetin e institucioneve të Kosovës për të punuar me EULEX-in dhe institucionet tjera evropiane në vend.

“Siç kemi thënë më herët , marrëveshjet për bashkëpunim policor me Beogradin janë të karakterit teknik dhe është me rëndësi të theksohet se EULEX është këtu për të mbështetur Kosovën në zbatimin e ligjit dhe asnjëherë nuk do të ndërmerrte ndonjë hap, i cili do të dëmtonte Kosovën”- thuhet në komunikatën e lëshuar në orët e vona nga EULEX
KTV

Reagime negative për protokollin

Opozita në Kosovë ka reaguar pas nënshkrimit të protokollit për bashkëpunim policor mes EULEX-it dhe Serbisë, duke i kritikuar institucionet e Kosovës se nuk po e tregojnë të vërtetën para qytetarëve. Ndërkohë, përfaqësues të institucioneve ripërsërisin se Kosova nuk është palë në këtë, siç e quajnë, aranzhim teknik mes EULEX-it dhe Serbisë.

Pas nënshkrimit të marrëveshjes EULEX-Serbi, përfaqësuesit e institucioneve të Kosovës kanë reaguar, duke ritheksuar pozicionin e Prishtinës zyrtare se Republika e Kosovës nuk është palë në aranzhimet teknike ndërmjet EULEX-it dhe Ministrisë së Brendshme të Serbisë, për bashkëpunim në fushën e policisë.

"Qëndrimi i presidentit është ai i përhershmi dhe ky qëndrim është bërë i ditur për opinionin gjatë gjithë kësaj kohe”.

“Presidenti bashkë me kryeministrin, sërish kanë pohuar se Republika e Kosovës nuk është palë në aranzhimet teknike midis EULEX-it dhe Ministrisë së Brendshme të Republikës së Serbisë për bashkëpunim në fushën e policisë”, thotë zëdhënësi i Presidencës, Xhavit Beqiri.

Nga ana tjetër, edhe partitë opozitare e kanë kritikuar Qeverinë dhe Presidencën e vendit për lejimin e një marrëveshjeje të tillë ndërmjet EULEX-it dhe Qeverisë së Republikës së Serbisë.

Nënkryetari i AAK-së, Ahmet Isufi, vlerëson se kjo gjendje e krijuar me nënshkrimin e protokollit, është një dobësi e institucioneve dhe, sipas tij, kjo marrëveshje do të ketë edhe pasoja për vendin.

“Ky nënshkrim i marrëveshjes ka sjellë pasojat e njohura dhe është dobësi për institucionet e vendit, të cilat në vend që të ndërmarrin iniciativë për të ofruar nënshkrim të protokollit me vendet fqinje, po i lejohet që EULEX-i të luajë sikur dikur rolin që e ka luajtur UNMIK-u, e që ka qenë në një administrim ndërkombëtar Kosova”.

“Prandaj, një neglizhencë e tillë ka shkaktuar edhe dëmin, edhe në aspektin e përfaqësimit të Kosovës dhe funksionimit të institucioneve të saj”, thotë Isufi.

Zoti Isufi pohon se krerët më të lartë të vendit nuk po e tregojnë të vërtetën për qytetarët e Kosovës.

Ai, madje, thekson se imazhi i Kosovës po dëmtohet çdo ditë e më shumë, sepse, siç shprehet ai, të tjerët po vendosin për Kosovën.

“Presidenti dhe kryeministri nuk po i tregojnë të vërtetën qytetarëve të Kosovës dhe po lejojnë që vendimet, të cilat ndërmerren nga të tjerët, të ndikojnë në pasoja për Kosovën”.

“Kjo mënyrë e sjelljes po e dëmton imazhin e Kosovës, sepse po lejohet që të tjerët të marrin iniciativa siç ka ndodhur me gjashtë-pikëshin; edhe ky element është vazhdimësi e përmbushjes së Planit 6-pikësh. Pasojat janë në shumë aspekte. Aspekti i parë është dobësimi i institucioneve të Kosovës në një vend të pavarur dhe sovran”, shpjegon Isufi.

Lideri i lëvizjes “Vetëvendosje!”, Albin Kurti, i cili deri më tash e ka kundërshtuar ashpër nënshkrimin e protokollit për policinë ndërmjet EULEX-it dhe shtetit serb, thotë se përmes këtij protokolli po zbatohet plani 6-pikësh i OKB-së për rikonfigurimin e pranisë ndërkombëtare në Kosovë.

Kurti shpreh bindjen se kundërshtimi i Prishtinës zyrtare është vetëm formal.

“Nga ky protokoll për bashkëpunim policor në mes të EULEX-it dhe Serbisë, Serbia përfiton në mënyrë të trefishtë”.

“E para, fiton informata të vlefshme të natyrës policore nga Kosova nëpërmjet EULEX-it; e dyta, e trashë lidhjen e varësisë së Kosovës nga Serbia, nëpërmjet sforcimit të Rezolutës 1244 dhe zbatimit të gjashtë-pikëshit; dhe, e treta, e largon kushtin e parë dhe më të rëndësishmin për liberalizimin e vizave”, thotë Kurti.

Zëdhënësi i Presidencës, Beqiri, nga ana e tij rithekson se si presidenti, ashtu edhe kryeministri, që nga fillimi kanë qenë shumë të hapur rreth kësaj çështjeje.

“Qoftë presidenti, por edhe kryeministri kanë qenë shumë transparentë dhe të hapur me këtë çështje. Kanë kundërshtuar të ashtuquajturin protokoll që në fillimet e tij dhe kanë mbajtur këtë qëndrim në mënyrë konsekuente. Edhe deklarata e djeshme e presidentit dhe kryeministrit e dëshmon këtë”.

“Por, duhet të ritheksojmë se institucionet e Republikës së Kosovës ripohojnë se ky kundërshtim i protokollit në asnjë mënyrë nuk do ta zbehë përkushtimin e institucioneve të Kosovës për ta luftuar krimin e organizuar”, thekson Beqiri.

Përderisa kundërshtimet e Prishtinës ndaj këtij protokolli, tashmë, janë shprehur hapur, EULEX-i konfirmon angazhimet edhe për dy marrëveshje të tjera me Serbinë.

Ndryshe, presidenti dhe kryeministri, pas një takimi ditë më parë me krerët e misioneve ndërkombëtare, e patën quajtur të mbyllur çështjen e protokollit EULEX-Serbi.
Radio Evropa e Lirë

Si do të zbatohet protokolli në terren?

Mënyrat e zbatimit të protokollit për policinë ndërmjet misionit të BE-së për forcimin e sundimit të ligjit dhe Serbisë, do të përcaktohen në ditët e ardhshme, thonë përfaqësues të EULEX-it. Analistët për çështje politike, në Prishtinë, nuk e hedhin poshtë mundësinë që gjatë zbatimit të protokolleve të tilla, të përfshihen edhe institucionet e Kosovës.

Pas nënshkrimit të protokollit për bashkëpunim policor ndërmjet EULEX-it dhe Qeverisë së Serbisë, përfaqësues të EULEX-it thonë se është ende herët të flitet për mënyrat se si do të zbatohet marrëveshja në fjalë në terren.

Zëdhënësi i EULEX-it, Kristof Lamfalusi, thotë se hollësitë për zbatimin e kësaj marrëveshje duhet të precizohen në të ardhmen.

“Është shumë herët, sepse protokolli ka për qëllim vënien e kanaleve (të kontakteve), ndërmjet EULEX-it dhe policisë serbe mbi krimin kufitar dhe shkëmbimin e informatave”.

“Kështu që, të gjitha detajet e zbatimit duhet të organizohen dhe të diskutohen”, shprehet Lamfalussy.

Përfaqësues të Bashkësisë Ndërkombëtare në Kosovë kishin paralajmëruar se pas nënshkrimit të protokollit për polici, gjasat janë të mëdha që të nënshkruhen protokolle të ngjashme edhe për dogana dhe gjyqësi.

Zbatimi i marrëveshjeve të tilla, sipas analistit Valon Murati, nuk do t’i përjashtojë medoemos institucionet e Kosovës.

“Ndonëse në opinionin publik është krijuar përshtypja e një refuzimi të fuqishëm të institucioneve të Kosovës ndaj këtyre protokolleve, në të vërtetë mendoj se, nëse nënshkruhen këto protokolle dhe ka shumë gjasa që ato të nënshkruhen, në terren do të ndodhë një zbatim praktik i tyre edhe me ndihmën e institucioneve të Kosovës, pa u bërë bujë e madhe për pjesën që i takon Qeverisë së Kosovës”, thotë Murati.

Ai shton se, as EULEX-i nuk do të pengohet nga Prishtina zyrtare gjatë zbatimit të marrëveshjeve të tilla në territorin e Kosovës.

Sipas Muratit, zbatimi i protokollit për polici me Serbinë dhe protokolleve eventuale për dogana e gjyqësi, do të përqendrohet në pjesën veriore të Kosovës, për të rikthyer sundimin e ligjit atje.

Sidoqoftë, ai thotë se është e vështirë të bëhen prognoza për mënyrën e operimit të EULEX-it dhe institucioneve të Serbisë bazuar në të tilla marrëveshje.

“Përmes këtij protokolli, EULEX-i do të mundohet ta shtrijë pushtetin e tij në veri, t’i kontrollojë kufijtë, t’i kontrollojë doganat, të ketë më shumë akces në gjyqësi e polici në veri të Kosovës”.

“Kjo është ajo që EULEX-i e thotë herë hapur, herë indirekt për përfitimin që do të ketë Kosova. Por, çka do të përfitojë në realitet, është vështirë të prognozohet”, thekson Murati.

Analistët vendorë dhe ata ndërkombëtarë kishin tërhequr vërejtjen se zbatimi në praktikë i protokollit për polici dhe atyre që mund të pasojnë për dogana e gjyqësi, do të mund të bëhej në përputhje me planin 6-pikësh të OKB-së për rikonfigurimin e pranisë civile ndërkombëtare në Kosovë.

Kjo gjë ishte hedhur poshtë sikurse nga përfaqësuesit evropianë, ashtu edhe nga Prishtina zyrtare, e cila e cilëson këtë plan si të vdekur.
Radio Evropa e Lirë