Bastiset Ministria e Transportit dhe pronat e Fatmir Limajt

[Llapjani_HH]

Dyshime për pesë vepra penale të Limajt dhe Krasniqit

Mësohen detajet e dyshimeve të rënda që bien mbi supet e ministrit të Transportit, Fatmir Limaj, dhe shefit të prokurimit në këtë ministri, Nexhat Krasniqit.

Janë 5 vepra penale, të dënueshme me shumë vjet burgim, për të cilat po hetohen Limaj e Krasniqi, sipas një vendimi për Fillimin e Hetimeve, të lëshuar nga prokurori i Prokurorisë Speciale të Republikës së Kosovës, Eduard Gueroof, më 23 prill 2010.

Ato janë:

1. Pastrim parash, sipas Nenit 10, paragrafit 2, pika b, të Rregullores 2004/02 të UNMIK-ut, e dënueshme me burgim deri në 10 vjet dhe me një gjobë deri në tri herë sa vetë vlera e pronës që është subjekt i veprës penale.

2. Krim i Organizuar në shkelje të nenit 274 paragrafi 5 lexuar së bashku me paragrafin 1 të Kodit Penal të Kosovës, e dënueshme me gjobë deri në 500 mijë euro dhe burgim nga shtatë deri në njëzet vjet;

3. Përvetësimi gjatë ushtrimit në Detyrë në kundërshtim të Nenit 340 paragrafi 1 dhe 3 i Kodit Penal të Kosovës dhe e dënueshme me burgim nga një deri në 10 vjet;

4. Mashtrimi në detyrë në kundërshtim të Nenit 341 paragrafi 3, të KPK, e dënueshme me burgim nga një deri në dhjetë vjet kur shuma tejkalon 5 mijë euro,

5. Marrja e ryshfetit, duke shkelur Nenin 343, paragrafi 3 të KPK dhe e dënueshme me burgim nga gjashtë muaj deri në pesë vjet.

Veprat penale për të cilat dyshohen Limaj e Krasniqi janë mësuar pasi që Komuna e Gjilanit ka bërë publike kërkesën për urdhër për kontroll të Zyrës së Prokurimit në Kuvendin Komunal të Gjilanit nga Gjykata e qarkut në Prishtinë.

Arsyetimi i urdhrit për kontroll bazohet në deklaratën e pronarit të ndjerë të kompanisë Inter Evropa, Mehmet Shkodra.

Sipas gjyqtarit të procedurës paraprake, Ferdinando Bautiet de Mongeot, Shkodra paraqiti një ankesë tek Agjencioni Kosovar kundër Korrupsionit, më 6 maj 2009, dhe pastaj u intervistua nga Policia e EULEX-it në lidhje me të njëjtat çështje që kishin të bëjnë me tenderë në janar të këtij viti.

“Mehmet Shkodra ishte pronar i ndërmarrjes ndërtimore, e cila ka marrë pjesë në 176 raste në procedura të tenderimit të shpallura nga Ministria e Transportit dhe Telekomunikacionit.

Ai asnjëherë nuk arriti të fitojë një tender, përkundër faktit që ofertat e tij ishin më të favorshme se ato të konkurrentëve të tjerë, thuhet në këtë dokument.

Ankesat i referohen tenderëve në vijim:

- Ndërtimi i urave në rrugën M9 Segmenti Fushë Kosovë – Arllat
- Mirëmbajtja verore
- Rrethi Prishtinë – Fushë Kosovë dhe Prishtinë Mitrovicë
- Gllogoc – Dheu i Kuq – Hojkobill
- Pogragjë – Dobrosin
- Rruga Ponesh – Zhegoc

Tutje thuhet se ministri Limaj në disa raste i kishte premtuar Shkodrës shpalljen e ofertave, pa marrë parasysh përmbushjen e kushteve të përcaktuara me ligjin mbi prokurimin.

Premtimet e tilla ishin bërë nga ministri Limaj së paku në rastet e tenderëve të përmendur më lartë.

Por, pika kyçe e këtij dokumenti është kur thuhet se shefi i prokurimit, Nexhat Krasniqi i kishte thënë Shkodrës që caktimi i tenderit të premtuar nga ministri për ndërmarrjen e tij varet nga gatishmëria e Shkodrës PËR TË PAGUAR RYSHFET, përkatësisht 10 % dhe 13 % të shumës totale të tenderit.

Si pasojë e pamundësisë së tij, tenderi nuk i është dhënë atij edhe pse kishte aplikuar 176 herë.

Kjo e qartëson së paku nivelin e provave për dyshim të bazuar që të pandehurit së bashku e kanë kryer veprën e përshkuar me nenin 343 e që është marrje e ryshfetit.

Për këto punë, dyshimtari ishte takuar me ministrin Limaj së paku 8 herë.

Është e rëndësishme të vërehet që dëshmitari pretendonte që ishte i kërcënuar seriozisht në mënyrë që t’i tërheqë akuzat e bëra, thotë gjyqtari de Mongeot në këtë dokument, teksa kërkon lehtësi për kontroll në zyrat e komunës.

Mehmet Shkodra bashkë me 5 kosovarë të tjerë vdiqën para pak kohësh në një aksident trafiku në Vjenë të Austrisë.

Shkodra është personi që përmendet nga kryeparlamentari Krasniqi në një intervistë të KTV-së, e sipas të cilit EULEX-i është joserioz që merret me deklaratën e një personi të vdekur.

Rezultatet e para të hetimeve që EULEX-i i ka nisur para do kohësh, priten brenda kësaj jave.
Koha.net