Shoqatat Islamike-arabe ne torjet Shqiptare

[Psikologu]

DYSHIME PER LIDHJE TE TYRE ME ORGANIZATA TERRORISTE

11 islamikë shpallen "non grata"
Të padëshiruarit nga Egjipti, Algjeria dhe Arabia

TIRANE

Njëmbëdhjetë shtetas me origjinë arabe janë shpallur të padëshirueshëm në Shqipëri. Lajmi është konfirmuar zyrtarisht nga Drejtoria e Informacionit në Policinë e Shtetit, si dhe nga Drejtori i Policisë së Rendit Avni Jashellari. Moslëshimi i lejeve të qëndrimit për këta persona është bërë pas verifikimit të dokumentacionit të paraqitur prej tyre, si dhe nga informacionet e servirura nga shërbimet e huaja, të cilat bashkëpunojnë me autoritetet shqiptare në kuadër të luftës kundër terrorizmit. Personat e mësipërm janë cilësuar si të padëshirueshëm për të qëndruar në territorin shqiptar, për shkak të problemeve në dokumentacion, të dyshimeve mbi aktivitetin dhe të kaluarën e tyre. Këta shtetas janë kryesisht misionarë në shoqata fetare islamike ose punonjës në biznese private.

Verifikimi
Burimi zyrtar në Drejtorinë e Përgjithshme të Policisë tha se "struktura përkatëse në Drejtorinë e Policisë së Rendit ka verifikuar të gjitha lejet e qëndrimit për shtetasit e huaj rezidentë në Shqipëri, si dhe ka bërë rinovimin e lejeve të qëndrimit për të gjithë ata që nuk janë vërejtur me probleme në dokumentacion apo dyshime në veprimtarinë e tyre. Mosrinovimi i lejeqëndrimit për 11 shtetasit me origjinë arabe, kryesisht nga Egjipti, Algjeria dhe Arabia Saudite, është bërë duke u mbështetur edhe në informacionin e servirur nga SHISH-i". Në kuadër të luftës kundër terrorizmit ndërkombëtar, Shërbimi i Antiterrorit i SHISH-it i ka paraqitur Policisë së Shtetit të gjithë informacionin e siguruar nga agjentura e tij, si dhe të servirur nga shërbimet e huaja homologe për shtetasit e huaj me origjinë arabe që kërkojnë të qëndrojnë legalisht në territorin shqiptar.

Islamikët
Pas aplikimit që kanë bërë në polici, për të gjithë shtetasit e huaj me origjinë arabe që kërkojnë të qëndrojnë në Shqipëri, është bërë verifikimi i dokumentacionit dhe arsyet pse ata kërkojnë të qëndrojnë në Shqipëri. Aplikimi për leje qëndrimi nga shtetasit e huaj bëhet çdo vit për dy vitet e para të qëndrimit dhe më pas, për t'u krijuar lehtësira, çdo 5 vjet. Sipas burimeve të policisë, rezulton se për disa nga personat e mësipërm ka pasur informacione për lidhje të dyshimta të tyre me organizata ekstremiste islamike. Në të gjitha rastet kur janë konstatuar dyshime mbi aktivitetin apo të kaluarën e këtyre shtetasve, është vendosur mosmiratimi i kërkesës së tyre. Një vendim i tillë i konsideron këta të huaj persona të padëshi-rueshëm në Shqipëri. Identiteti i 11 personave të mësipërm nuk është publikuar nga Policia e Shtetit, për shkak të natyrës së veçantë të informacionit dhe të ruajtjes së privacisë. A.Hoxha


Komiteti i Kulteve: "Janë larguar 6 shoqata islamike"

Shoqatat e fondacionet islamike e arabe të dyshimta, nuk kanë gjetur tokë të begatë në Shqipëri. Sipas një prononcimi për Gazetën të Fatri Sinanit, Kryetarit të Komitetit Shtetëror të Kulteve, në vitin 2003 janë regjistruar 6 shoqata më pak se një vit më parë. Sipas Sinanit largimi i tyre është kondicionuar nga mangësi në dokumentacion dhe liçensim. Por dihet se largimet janë për të tjera shkaqe. Terreni jomikpritës ndaj tyre u krijua pas vitit 1998, kur në Elbasan dhe në Tiranë u zbulua një celulë e Xhihadit Islamik Egjiptjan. Një tjetër "fushatë" pasoi pas sulmit të vitit 2001 ndaj kullave binjake në Nju Jork. Në listën e zezë të Departamentit Amerikan të Shtetit ishin edhe fondacione që kishin degë në Shqipëri, "Al-Haramain", "Organizata Botërore e Ndihmave Islamike", "Ringjallja e Trashëgimnisë Islamike", dhe "Al Waffk". Shteti shqiptar dëboi në vitin 2001 nga këto shoqata 5 punonjës së bashku me familjet (rreth 16 vetë).


Arabia Saudite bllokon fondet e "Al-Haramain"

Arabia Saudite ka bllokuar fondet e disa organizatave islamike që kanë degët e tyre në vendet arabe, por edhe në Ballkan, nën akuzën se financojnë rrjetin terrorist Al-Kaeda. Dje, agjencitë e huaja të lajmeve si dhe shtypi saudit njoftoi se Riadi ka bllokuar fondet e fondacionit islamik "Al Haramain", që ka degë në Shqipëri, Kosovë, Bosnjë, Indonezi, Kenia, Pakistan, Tanzani dhe Holandë. Fondacioni ishte përfshirë prej kohësh edhe në listën e zezë të SHBA-së dhe vendimi është marrë nga autoritetet e larta saudite pas një kërkese të bërë nga Departamenti amerikan i Shtetit. Këshilltari diplomatik i trashëgimtarit të fronit saudit, Adel el-Xhubeir, pohoi se ekzistojnë dokumenta që provojnë se fondacioni, me rreth 50 milion dollarë të ardhura në vit, financonte rrjetet terroriste, sipas gazetës "Saudi Times". Po sipas kësaj gazete, në listën e zezë të organizatave që financojnë terrorizmin janë edhe disa fondacione të tjera islamike, por emrat e tyre nuk janë bërë të ditura ende. Të gjitha llogaritë bankare të këtyre fondacioneve do të grumbullohen dhe do të kontrollohen imtësisht nga një komision i posaçëm saudit.


ISLAMIKET

28 QERSHOR 1998
Kapen Ahmed Ibrahim El Naggar, me pseudonimin Muhamed Fonda, 39 vjeç, dhe bashkëpunëtori i tij në fondacion, Mohamed Hasan Mahmud (alias Moget Mustafa), 36 vjeç.

24 TETOR 1998
Vritet në shtëpinë e gruas shqiptare, Selam Muhamed Omar El Said, një tjetër i dyshuar për lidhje me "Xhihad". Gjatë aksionit plagoset njëri prej drejtuesve të RENEA.

JANAR 1999
Prangoset inxhinieri shqiptar Maks Çiçiku, i cili akuzohej se kishte përgjuar lëvizjet e ambasadores amerikane Mariza Lino. Pas arrestimit të tij, u vendosën masa të rrepta kontrolli.

15 SHKURT 1999
Arrestohet iraniani Mohamed Nexhip Jashim dhe siriani Abdyl Mahem, të cilët kishin falsifikuar nënshtetësinë për t'u futur pa vizë në Shqipëri. Nuk dihet nëse kishin lidhje me terrorizmin.

13 NENTOR 1999
Shpallet "non grata" jordanezi Abdyl Latif Saleh. Jetonte në kryeqytet, si drejtuesi i katër fondacioneve fetare dhe njëkohësisht kishte lidhje edhe me biznesin e ndërtimit në Tiranë.


Gazeta Shqiptare 4-6-04