Për at zot, do ta kemi Kosovën të tërën nën kontroll, zotohët Thaçi

[Arb]

Qeveria miratoi edhe projektligjin për festat zyrtare

Prishtinë, 19 maj - Qeveria e Kosovës miratoi sot projektligjin për festat zyrtare të Republikës së Kosovës ku parashihen gjithsej 11 festa zyrtare, ndërkohë që në këtë projektligj nuk parashihet edhe 28 Nëntori, dita e flamurit kombëtar shqiptar. Po ashtu ky projektligj nuk parasheh as Ditën e çlirimit.

U tha se ky projektligj është punuar duke respektuar historinë, kulturat, dhe traditat e popullit të Kosovës dhe shtetasve të saj. Kryeministri Thaçi përmendi 11 festat shtetërore: Dita e shpalljes së pavarësisë, 17 shkurti, dita e miratimit të Kushtetutës, Dita ndërkombëtare e Punës - 1 Maji, Dita e Evropës, 9 maji, Festa e Bajramit të Madh, ajo e Bajramit të Vogël, Krishtlindjet më 25 dhjetor, Krishtlindjet ortodokse më 6 janar, Pashkët katolike dhe ortodokse, ndërkohë që nuk e ka përmendur 28 Nëntorin e as Ditën e Çlirimit të Kosovës që parashihet të jetë 11 dhe 12 qershori.

Kryeministri Thaçi duke arsyetuar mospërfshirjen në kalendarin e festave të Ditës së Flamurit Kombëtar tha se Kosova është shtet i pavarur, sovran, demokratik dhe shumetnik, me territor të garantuar. Kosova është shtet, i ka festat shtetërore, por natyrisht se respektohen edhe festat kombëtare.

Ministri i Shërbimeve Publike, Arsim Bajrami tha se ky ligj është njëra nder ata që del nga pakoja e Ahtisarit dhe nga nevoja e rregullimit ligjor të kësaj çështje që mëton të vendos një rend sa i përket festave. Ai tha se Ligji përcakton tre lloj festash në Republikën e Kosovës: shtetërore, memoriale dhe festat e nivelit komunal. Sipas ministrit Bajrami, Ligji ka rregulluar festat shtetërore, kurse ato memoriale do të përcaktohen nga një komision republikan që do të ngritet nga qeveria e Kosovës, i cili do të bëjë listën e festave memoriale dhe do të bëjë mënyrën e festimit të këtyre festave.

Ndërkaq, ka mbetur që me një akt të përcaktohet një festë republikane e dëshmorëve, ndërkaq ato komunale do të përcaktohen me akte të mëvetësishme të komunave. Ministri Limaj kërkoi që në këtë listë të hyjë edhe Dita e çlirimit.

Ndryshe, kabineti i ministrave miratoi edhe Projektligjin për arsimin në Komunat e Republikat e Kosovës që sipas ministrit të Arsimit, Enver Hoxhaj, rregullon kompetencat e komunave dhe i përfaqëson interesat e Kosovës. Ai tha se projektligji është hartuar në përputhje me pakon e Ahtisarit. Gjithashtu u aprovua Projektligji për azilin që ka për qëllim vendosjen e rregullave ligjore, lidhur me ëështjet e refugjatëve, azilkërkuesve dhe personave nën mbrojte të përkohshme, të cilët kërkojnë mbrojte në Republikën e Kosovës. Për zbatimin e këtij projektligji nevojiten mjete buxhetore. Projektligji përcakton afatet kohore për ndërtimin e qendrës e azilit në Kosovë.

Po ashtu Qeveria e Kosovës aprovoi edhe Projektligjin për kontrollin e kufirit shtetëror të Republikës së Kosovës, që adreson çështjet që kanë të bëjnë me organet kompetente që janë të ngarkuara me përgjegjësi për menaxhimin dhe kontrollin e kufirit shtetëror, ndalon kontrabandimin e mallrave dhe nuk përmban elemente diskriminuese.

QIK-u