Grimca Artistike

[legenda]

E nata ka mbuluar gjurmët dhe klithjet


Je shtrirë buzë lumit i sëmurë
lumit i ke folur në veshin guaskë
ai të ka bartur
dikah të ka bartur
kah vedi
e ti i ke folur me zemër
e dhimbje e të rëna ke ndjerë
në shpirt
në trup



e ti i ke folur lumit të thellë
ai ka ikur kah brigjet e humbura
prej sëmundjes sate ka ikur


e ti je shtrirë buzë lumit të gufuar


lumi ka përgjuar jetën tënde tërë kohën
të ka pushtuar si magjia të ka mashtruar pastaj
lumi të ka vënë në gjumë pas nëntëdhjetenëntë
vjet pagjumësie
dhe ka ikur kah brigjet e humbura


ti ashtu me shpirt në hava i shtrirë
ke soditur sytë e zgurdulluar të heshtjes


e nata i ka mbuluar gjurmët dhe klithjet



ALI PODRIMJA
-----------------