Lajme Aktuale....

Lona · 30-10-07, 12:27

Protesta ndaj reformave institucionale
e martë , 30 tetor 2007
Mijëra serbë të Bosnjës kanë protestuar reformat që ata thonë do të çojnë në dhënien fund të minishtetit të tyre.Në kryeqytetin e Republikës serbe të Bosnjës, Banja Luka, mijëra protestues dolën në rrugë duke hedhur poshtë reformat e planifikuara.
Marrëveshja e paqes së Dejtonit që i dha fund luftës në Bosnjë në 1995, ndau vendin në dy komunite- republikën serbe të bosnjës dhe federatën myslimane kroate. Institucionet shtetërore janë ndërtuar gradualisht në vite, por zhvillimi i tyre është penguar nga një sistem i komplikuar i marrjes së vendimeve që u hartua për të siguruar balancë etnike. I dërguari ndërkombëtar në Bosnjë, Miroslav Lajcak, ka thënë se tani ka rëndësi të lehtësohet ky sistem kështu që Bosnja të mund të vazhdojë në rrugën për t'ju bashkuar BE.
Por Serbët e Bosnjës thonë se reformat e planifikuara çojnë në zhdukje të etnicitetit të tyre. Politikanët e serbëve të Bosnjës kanë kërcënuar të tërhiqen nga institucionet shtetërore nëse vazhdohet me këto reforma. Nëse ndodh kjo gjë, vendi do të përballet me një krizë serioze politike.

Maqedonasit në Shqipëri kërkuan mbrojtje ligjore të të drejtave
e martë , 30 tetor 2007
Regjistrim të popullatës në Shqipëri si dhe mbrojtje të minoriteteve me ligj të posaçëm kërkuan përfaqësuesit e shoqatave maqedonase në këtë shtet.
"Shoqatat maqedonase në Shqipëri sërish kërkuan regjistrim meqë konsiderojnë se kjo është në interes të minoriteteve, por edhe të shtetit shqiptar", deklaroi përfaqësuesi i shoqatave maqedonase, Kimet Fetahu. Kërkesa të ngjashme kanë parashtruar edhe përfaqësuesit e minoritetit grek, vllah dhe rom.Përballë këtij takimi në Tiranë qëndruan përfaqësues të lartë të Komisionit Evropian të cilët kërkuan informata për të drejtat e minoriteteve në Shqipëri. Sipas kryeministrit shqiptar Sali Berisha, ekziston përparim të këtyre të drejtave. Ai, duke komentuar kërkesat e minoriteteve për regjistrim të popullatës që për herë të parë do t`i përfshinte elementin etnike dhe fetar, vlerësoi se Shqipëria së shpejti duhet të bëjë regjistrim të tillë meqë është në interes të shtetit.

Lona · 31-10-07, 11:25

Jep dorëheqjen Kryetari i Gjykatës Kushtetuese të Maqedonisë, Mahmut Jusufi 30-10-2007

Kryetari i Gjykatës Kushtetuese të Maqedonisë, Mahmut Jusufi dha sot dorëheqjen nga posti, pas trysnive të partive politike shqiptare, të cilat e kritikuan, për shkak të vendimit të fundit të Gjykatës për shfuqizmin e disa neneve të ligjit mbi përdorimin e flamurit shqiptar.

Zoti Mahmuti ka dhënë dorëheqje të parevokueshme edhe nga funksioni i gjykatësit të kësaj gjykate. Në një deklaratë me shkrim, ai e cilësoi vendimin e Gjykatës politik, ndërsa bën të ditur se nuk do ta nënshkruajë vendimin për shfuqizimin e pjesëve të ligjit, sepse nuk dëshiron që emri dhe mbiemri i tij të figurojnë në një dokument të tillë.

Edhe gjykatësi tjetër shqiptar i kësaj gjykate, Bajram Pollozhani ka dhënë dorëheqje të parevokueshme. Me anë të dorëheqjes së tij si akt moral, zoti Pollozhani thotë se dëshiron të kontribuojë tek thellimi i vetëdijes së kolegëve të tjerë gjatë vendimmarrjes, si dhe legjitimitetit të këtyre vendimeve.

Putin nderon 20 mijë të ekzekutuarit në Butovo në periferi të Moskës
30-10-2007

Presidenti rus Vladimir Putin përkujtoi më shumë se 20 mijë njerëz të ekzekutuar në një vend pranë Moskës gjatë terrorit stalinist në vitet 1937-38. Presidenti rus tha se ndër të pushkatuarit kishte njerëz tejet të njohur dhe me ndikim.

Në një mot të vrejtur, Presidenti Putin vuri një kurorë me lule në kryqin qe nderon mbi 20 mijë viktimat e pushkatuara në Butovo, në pjesën jugore të Moskës. Zoti Putin tha se rusët duhet të kujtojnë tragjedinë e viteve 1937-38.

"Udhëheqësi rus thotë se jetët e miliona njerëzve u shkatërrun. Ata u pushkatuan, degdisën në kampe pune dhe torturuan. Ata ishin njerëz që nuk kishin frikë të shprehnin idetë e tyre, ...ishin njerëzit më me ndikim....lulet e vendit...tha presidenti rus".

Vjaçeslav Nikonov, nipi i Vyacheslav Molotovit, zyrtarit të lartë të kohës së Stalinit, i tha Zërit të Amerikës se kishte biseduar me gjyshin e tij rreth terrorit të madh. Ndërkohë që zoti Nikonov e dënon shtypjen komuniste, ai thotë se Molotovi dhe komunistët e tjerë, ndiheshin të justifikuar në atë kohë.

"Terrori ishte i justifikuar bazuar në logjikën e atëhershme, bazuar në radhë të parë në përvojën, që kishin përjetuar bolshevikët, që nënkupton tmerret e Luftës Civile në Rusi dhe gjithashtu bazuar në besimin komunist, se lufta për egzistencë me Gjermaninë ishte e pashmangshme".

Ndërkohë në Moskë, në përkujtimin e terrorit komunist, një organizatë e të drejtave të njeriut, vazhdoi leximin e emrave të terrorit komunist në qendër të qytet, para ish zyrave të Policisë Sekrete Ruse, përgjegjëse e terrorit të madh.

Ndër aktivistët është edhe Lev Ponomarev, i cili thotë se në Rusi edhe sot ka të paktën 100, por ndoshta deri në 1 mijë të burgosur politikë.

Zoti Ponomarev i tha Zërit të Amerikës se burgosja për arsye politike është vepër e atyre njerëzve, që vazhdojnë të besojnë në parimet e Çekës, organizatës së parë të sigurimit famëkeq rus. Zoti Putin vazhdon të flasë me respekt për Çekën dhe KGB-në, ku edhe sherbente si agjent. Çeka u transformua në vitin 1922 në NKVD, e cila ishte përgjegjëse për terrorin e madh. Ndërsa më pas KGB-ja mbajti burgje sekrete deri sa u shpërbë Bashkimi Sovjetik.

"Zoti Ponomarev thotë se njerëzit që flasin mirë për Çekën, janë ata që besojnë në shtypjen e të tjerëve për arsye politike. Sipas aktivistit Ponomarev, zoti Putin dhe të tjerët që kujtuan viktimat e shtypjes Sovjetike, e bënë këtë thjesht për të përfituar nga Perëndimi dhe kryesisht si fushatë publike".

Ky vit shenon 70 vjetorin e terrorit të madh. Një anketë nga Qendra Ruse për Opinionin Publik tregon se 44 përqind e popullsisë nuk kanë njohuri për atë periudhë të historisë. Por vetëm dy përqind janë dakord se shtypja ishte e justifikueshme.