7 te vdekur ne Iran.

[pirro]

Shtohet pjesëmarrja në demonstratat në Iran
Grupe të mëdha protestuesish janë mbledhur në qendër të Teheranit për një demonstratë tjetër kundër rezultatit të zgjedhjeve presidenciale në Iran, ndërkohë që Këshilli i Plotfuqishëm i Klerikëve po kërkon dialog me kandidatët e opozitës.
Dëshmitarët thonë se aktivistët e opozitës kanë mbushur Sheshin Imam Khomeini, në demonstrata të përditshme në rritje që morën shkas nga rizgjedhja e presidentit Mahmoud Ahmadinejad.

Kandidati kryesor i opozitës që humbi zgjedhjet, Mir Hossein Mousavi, u bëri thirrje përkrahësve të tij të mblidheshin në shesh, të veshur me të zeza për të respektuar ata që u vranë në dhunën paszgjedhore.

Të paktën 7 protestues u vranë nga milicia proqeveritare në Teheran të hënën.

Këshilli i Plotfuqishëm i Klerikëve që mbikëqyr zgjedhjet në Iran, e ka ftuar Mousavin dhe dy kandidatët e tjerë të opozitës për një takim të shtunën, ku do të diskutojnë shqetësimet e tyre.

Një zëdhënës i Këshillit tha se ai ka filluar shqyrtimin e 646 ankesave për parregullsi në votimet e 12 qershorit.

Rezultatet zyrtare tregojnë se Presidenti Ahmadinejad fitoi zgjedhjet me një diferencë të theksuar votash. Akuzat e opozitës për manipulimin e votave kanë shkaktuar trazirat më të mëdha në Iran që nga Revolucioni Islamik në vitin 1979. /VoA/