Lajme aktuale nga vendi !

[Neferta]

Sherr mjekrroshi
Vushtrri, 17 tetor - Persona ende të pa identifikuar kanë ngjyrosur fotot e martirëve në varrezat e martirëve në Vushtrri, duke u vendosur mjekra fotografive të martirëve, ndërsa lulet e vendosura nëpër këto varreza i kanë hedhur në rrugë. Banorët të cilët banojnë përreth varrezave, tregojnë të kenë parë një qytetar të paidentifikuar, i cili kishte mjekër dhe veshje karakteristike dhe lulet e vendosura në këto varreza i kishte hedhur në rrugë. Dhjetëra familjarë të këtyre martirëve të luftës së fundit në Kosovë kanë shprehur shqetësimet e tyre tek organet komunale, gjë që ka shtyrë komunarët të vizitojnë menjëherë këto varreza.

“Konstatuam një gjë të shëmtuar që ka ndodhur në varrezat e qytetit. Ne dënojmë këtë akt të pazakontë deri tani në komunën tonë”, ka thënë Sami Istrefi, drejtor i shërbimeve publike.

Ai ka kërkuar nga organet kompetente të angazhohen në zbardhjen e këtij akti të ulët dhe kapjen e autorëve dhe dënimin e merituar. Istrefi u ka bërë apel qytetarëve për bashkëpunim të tyre me Policinë e Kosovës dhe institucionet lokale për të parandaluar dukuritë e tilla. “Në kohën kur ne ende presim zbardhjen e fatit për të zhdukurit tjerë, të ndodhin gjëra të tilla vërtetë është veti anormale”, ka thënë Istrefi për agjencinë Kosovapress.

Imami i xhamisë që gjendet krejt pranë varrezave të qytetit, Behar Dushi është shprehur të jetë shumë i revoltuar me një akt e tillë. “Kjo është katastrofë, veprime të tilla bëjnë persona të papërgjegjshëm”, ka thënë imami.