Hajnia e shekullit

[Neferta]

Dikush i paska mare edhe tokat e QKUK me thase

– Çështja e uzurpimit të së paku gjashtë hektarëve tokë me vlera disamilionëshe, pronë e spitalit më të madh në vend - Qendrës Klinike Universitare të Kosovës (QKUK), qe gati dy vjet, prejse është ngritur publikisht, nuk ka lëvizur as për një hap të vetëm drejt zgjidhjes.

Drejtues të QKUK-së dhe ata të Komunës së Prishtinës po ia hedhin fajin njëri-tjetrit në lidhje me atë se kush është kompetent të verifikojë nëse prona e këtij institucioni është uzurpuar ose jo, duke bërë që asnjëra të mos merret me këtë punë.

Ndërsa Prokuroria e Shtetit dhe Parlamenti as nuk e kanë vënë në rend dite këtë problem. E krejt kjo “pasqyrë” për përfaqësues të shoqërisë civile “është argument që tregon se sa i pafuqishëm është shteti përballë grupeve mafioze të interesit, që kanë uzurpuar prona publike, e të cilat janë të lidhura edhe me vetë shtetin”.

Burime të informuara mirë të “Kohës Ditore” brenda Ministrisë së Shëndetësisë, duke folur me kusht anonimiteti, kanë deklaruar se dihen mirë me emër e me mbiemër se kush janë uzurpatorët e këtyre pronave të QKUK-së. Sipas tij, “që të gjithë janë ish-komandantët e luftës, disa nga të cilët madje janë shumë aktualë me poste të larta në politikë”. Por këto akuza dhe dyshime askush nuk po merr mundin t’i verifikojë edhe zyrtarisht.

Ministri i Shëndetësisë, Ferid Agani, ka saktësuar se çështja e pronave e hapur vitin e kaluar ka mbetur në stadin e pritjes së kadastrës komunale të Prishtinës.

Ai ka pohuar se është në dijeni që kërkesa i është drejtuar Komunës për këtë, por nuk ka përgjigje konkrete.

“Ndoshta është problem edhe mungesa e origjinaleve të kadastrës, edhe ajo ndoshta po e komplikon punën, por unë nuk kam përgjigje të qartë”, është shprehur ai.

Edhe drejtori ekzekutiv i QKUK-së, Nijazi Gashi, ka thënë se gjashtë hektarët e “përbirë” të institucionit që ai drejton janë pjesë e agjendës së tij të punës, por ka shtuar se pret nga Komuna e Prishtinës që të definojë tokën e QKUK-së, ngase, sipas tij, kërkesa ekziston që më herët.