Lajme nga bota e artit

[Neferta]

, Mirush Kabashi rrëfen “Apologjinë e Sokratit”
Mardi 29 mai 2012
Soirée Albanaise
« Apologie de Socrate » avec Mirush Kabashi (Tirana) Performance
Lieu : Salle Rameau


Duartrokitjet e publikut dhe ovacionet zgjatën gjatë, duke përshëndetur performancën e Mirush Kabashit në monodramën “Apologjia e vërtetë e Sokratit”, e shfaqur në festivalin teatror “Pranvera e Europës”, në Lion të Francës.
“Nuk e imagjinoja që gjuha shqipe të tingëllonte kaq bukur në vesh”, i tha shkrimtari Zhak Bruja ambasadorit shqiptar në Francë, Ylljet Aliçka. “Kultura shqiptare është e panjohur për ne francezët, e ndjehem i tronditur deri në themelet e qenies sime para demonstrimit të artit të madh të këtij populli të vogël”, shtoi shkrimtari lionez Bruja.
Korrespodenti i portalit LajmeShqip.com, njofton nga Lioni se Drejtori i Përgjithshëm i Festivalit Teatror, Reno Lekyje, e cilësoi të jashtëzakonshëm interpretimin e Kabashit në sallën Rameau në qendër të Lionit. “Ishte i jashtëzakonshëm. E kisha parë Mirush Kabashin në Youtube, por, ta ndjekësh direkt në skenë është gjë tjetër. Shfaqja e trupës shqiptare ishte nga më të mirat e Festivalit. E kisha një parandjenjë kur vendosa që trupa shqiptare, e udhëhequr nga Mirush Kabashi, të kishte vendin e nderit në Festival”, u shpreh Lekyje.
Protagonisti Mirush Kabashi u shpreh pas shfaqjes se jo vetëm që shfaqja u prit me shumë duartrokitje e thirrje entuziaste, jo vetëm që mori pjesë për herë të parë në festivalin “Pranvera Europiane”, por dhe sepse për herë të parë spektatorët lionezë dëgjuan gjuhën shqipe,raportoj vipat.
Premiera e shfaqjes “Apologjia e vërtetë e Sokratit”, me udhëheqës artistik Alfred Bualotin, i përket vitit 1997 dhe përveç qyteteve të vendit ajo është shfaqur të paktën në 15 vende të Evropës, si dhe në Kanada.
Në shtator të vitit 1997 Mirush Kabashi është nderuar me çmimin “Aktori më i mirë” i edicionit të 9-të të Festivalit Ndërkombëtar të Teatrit në Kajro (Egjypt) si dhe ka fituar çmime të tjera në Ukrainë, Bullgari, etj.

[Zero Cool]

Venecia, filmi italo-shqiptar, dokumentari më i mirë i festivalit






Venecia, 08.09.2012
Historia e dhimbshme e eksodit shqiptar, shfaqur më 3 shtator në Festivalin e Filmit në Venecia, përmes dokumentarit “La nave dolce”, u vlerësua dje me çmimin “Francesco Pasinetti”.

Sipas gazetarëve të kinemasë (SNGCI), të pranishëm në Venecia, dokumentari më i mirë i Festivalit të Venecias 2012 është “La nave dolce”, me regji të Daniele Vicarit, një bashkëprodhim shqiptaro-italian i “Indigo Film” dhe “Apulia Film Commission”, prodhuar me Rai Cinema në bashkëpunim me Ska-Ndal Production (përfaqësuar nga Ilir Butka dhe Genc Përmeti) dhe Telenorba.

Sipas të gjitha mediave të huaja, që nuk i kursyen hapësirat e tyre për të prezantuar filmin e Vicarit dhe të producentëve italo-shqiptarë, dokumentari i cili u shfaq jashtë konkurrimit, u prit me një sukses të madh nga publiku dhe kritika, shkruan gazeta tiranase Panorama.

“Anija e ëmbël”, e cila mori këtë emër për shkak të anijes që mbartte sheqer, tregon zbarkimin në brigjet italiane të mbi 20 mijë shqiptarëve më 7 gusht të vitit 1991. Një histori dhimbjeje dhe shprese, e treguar mjeshtërisht dhe në mënyrë fare të sinqertë përmes vetë “heronjve” të kësaj ngjarjeje të 21 viteve më parë. Janë njerëz të cilët jetuan ferrin dhe parajsën e largimit nga një vend komunist drejt shpresës, e cila gjithsesi nuk ishte ajo që kishin ëndërruar.

Disa prej tyre gjithsesi ia dolën, të tjerë… Atë çfarë ndodhi atë verë mbi anijen “Vlora” e tregojnë Halim Milaqi (komandanti i Vlorës), Eva Karafili, Agron Sula, Kledi Kadiu, Robert Budina, Nicola Montano, Domenico Stea, Fortunata Dell’Orzo, Luca Turi, Raffaele Nigro, Maria Brescia etj.

“Dhjetë vjet më parë e mora këtë çmim për filmin tim të parë artistik. Këtë radhë, çmimi ‘Pasinetti’ shkon për një dokumentar e kjo është shumë e rëndësishme për kinemanë dokumentaristike”, është shprehur dje gjatë ceremonisë së dorëzimit të çmimit regjisori Daniele Vicari.

Mësohet se kjo është hera e parë që SNGCI ka vendosur t’ia japë çmimin “Pasineti” një filmi jashtë konkurrimit, duke e kthyer fokusin e vet drejt një tjetër kinemaje, që premton të tjera këndvështrime dhe breza të rinj kineastësh.

[Zero Cool]

CIA vret zëvendëskryeministrin e Kosovës(Kosta Beqiraj), kreun e krimit të organizuar






Është destinacioni i radhës i operacionit të Njësitit “Divison”, pjesë e shërbimit sekret amerikan të SHBA-së, në episodin më të ri të serialit amerikan “Nikita”. Si raporton KTV, cak është zëvendëskryeministri i Kosovës, Kosta Beqiraj, që seriali e identifikon si kreun e krimit të organizuar, të trafikimit të drogës dhe njerëzve në Kosovë.

Para nisjes për në Kosovë, ka dyshime nëse ndërhyrja në një shtet të pranuar ndërkombëtarisht do të shkaktonte incident diplomatik.

Personazhi kryesor i serialit, Nikita, që luhet nga aktorja Maggie Q (në foto), niset për në Kosovë për të gjetur mjekun Heidecker, i cili vjen këtu për t’ia mirëmbajtur këmbën artificiale Beqirajt.

Ai e kishte humbur këmbën, kur një vit më parë CIA kishte dështuar ta eliminojë zv/kryeministrin e Kosovës.

Por, Nikitia ia del ta gjejë në vilën ku ai mban prostituta. Ndihmësit e tij të shumtë bëjnë që Beqiraj të arrijë t’i marrë peng Nikitën dhe Heideckerin.

Duhet intervenimi i bazës në SHBA, që e dërgon në Kosovë pjesën tjetër të ekipit të “Division”-it, për ta shpëtuar Nikitën.

Në vilën e Beqirajt, fillimisht amerikanët vrasin dy pjesëtarë të FSK-së e më pas hyjnë brenda, ku e heqin përfundimisht qafe edhe zv/kryeministrin, duke e vrarë, por duke e lënë të kuptohet që këtë e bëri një nga rojat e tij.

Pas suksesit të operacionit në Kosovë me vrasjen e Beqirajt, presidenti i jep detyra të reja të rëndësishme Njësitit “Division”.

Seriali “Nikita” është në sezonin e tretë dhe transmetohet në CW Network në SHBA, ku shikohet nga mesatarisht 2.4 milionë shikues çdo natë.

Ai transmetohet edhe në Britani të Madhe, Francë, Holandë, Bullgari dhe në shtete të tjera.

[Zero Cool]

Regjisori kroat me projekt madhor, kërkon ta rrisë imazhin e Kosovës





Prishtinë, 01.07.2013

Në konkursin e shpallur nga Qendra Kinematgrafike e Kosovës (QKK) për subvencione të filmave të metrazhit të gjatë ka konkurruar edhe regjisori me famë ndërkombëtare, Arsen Ostojiç. Ai është fitues i mbi 100 çmimeve ndërkombëtare, përfshirë vlerësimin e Akademisë Filmike Evropiane për filmin nga më të mirët në vitin 2009, çmimin për filmin më të mire të shkurtër në New York International Film, ndërsa në vitin 2005, regjisori kroat Ostojiç nga 26 kritikë filmi të Hollivudit është votuar se ka bërë filmin më të mirë kroat në pesë vitet e fundit.

Projekti filmik me të cilin ka konkuruar regjisori Ostojiç përfshin ngritjen ndërkombëtare të Kosovës dhe demaskimin e propagandës serbe.

Ostojiç ka në ekipin e vet edhe skenaristin i njohur boshnjak me famë ndërkombëtare, Fedja Fehim Isovic. Siç shkruan gazeta “Zëri” skenaristi Isoiviç ka bërë një skenar enkas për Kosovën me emrin “Bjeshkët e Nemuna”, ku trajton dhunën shtetërore të Serbisë të ushtruar në Kosovë dhe përpjekjet e popullsisë shqiptare për ta fituar lirinë. Ndonëse të shtypur në mënyrën më të egër, skenaristi Isovic në skenar veçon vlerat se si përkundrejt vrasjeve dhe torturave masive, megjithatë shqiptarët ka mbrojtur popullatën serbe në Kosovë.

Projekti filmik, siç shkruan “Zëri, gjithashtu demaskon strategjitë e policisë serbe e cila vriste serbët dhe inskenonte sikur vrasjet i kanë kryer shqiptarët, me qëllim që më pastaj të ndërmarrë operacione të spastrimit etnik dhe të fajësojë shqiptarët për gjoja dhunën ndaj popullsisë serbe.

Por, në anën tjetër flitet se projekti i cili do të subvencionohet i është premtuar një projekti vendor (projektit të Blerta Zeqirit, “Dasma”) , cilësia e të cilit lë shumë për të dëshiruar dhe që nuk mund të kontribuojë për interesin e Kosovës që ky vend më në fund të prezantohet me projekte serioze filmike në festivalet prestigjioze ndërkombëtare.

Janë 20 filma të gjatë dhe pesë animacione që kanë konkurruar për subvencione të cilat ndahen nga QKK-ja.

Nga regjisorët e Kosovës “Zëri” ka konfirmuar pjesëmarrjen e regjisorëve vendorë, si: Naser Shillova, Halil Budakova, Ekrem Kryeziu, Mentor Berisha, Visar Arifaj, Jetmir Grezda, Shkumbin Ferizi, Blerta Zeqiri, etj, disa prej të cilëve edhe në vitet e kaluara kanë përfituar subvencione financiare nga QKK-ja me projektet e tyre filmike. Përveç këtyre, kësaj radhe në garë janë edhe projekte të huaja, si ato të regjisorit të ri francez Mathiev Jouffre, kroati Jakov Sedlar dhe regjisori i ri slloven i filmave dokumentarë, Bostjan Slatensek.

Ndërkaq, juria 7-anëtarëshe në kuadër të QKK-së e përbërë nga Ilir Butka, Doruntina Basha, Ilir Bokshi, Fatmir Spahiu, Visar Krusha, Emin Halili dhe Shkelzen Maliqi, pritet që gjatë javës së parë të korrikut t’i vlerësojë pjesëmarrësit në konkursin e projekteve filmike të vitit 2013, ndërsa rezultatet të shpallen një javë më vonë. Kosova ndan 600 mijë euro nga buxheti i Ministrisë së Kulturës për projektet filmike dhe ende nuk ka arritur që një projekt filmik ta prezantojë në festivale të rëndësishme ndërkombëtare.

[Zero Cool]

“Nusja e Kosovës”, fotoja e ditës në “National Geographic”







Venecia, 17.12.2013

“The Bride”, fotografia që portretizon një traditë unike të makijazhit të nuseve në Kosovë, realizuar nga Nita Zeqiri, e cila po shfaqej në ekspozitën ndërkombëtare “Smart Cities & Hybrid Indenties” në Venecia, Itali, ka bërë që fotografia nga shteti i Kosovës, mes shumë shteteve, të zgjidhet si fotoja e ditës në “National Geographic”.

Fotografia është realizuar në rajonin e Prizrenit. Vizatimet ën fytyrë thuhet se kanë një traditë më të vjetër se 1000 vjet. Ato i takojnë rajonit të Prizrenit, në Zhupë, Ljubinje të poshtme, aty ku edhe realizuar fotografia.

Ajo paraqet një traditë ndonëse jo fort të njohur për publikun kosovar, por llogaritet të jetë shumë e vjetër. Fotografja Nita Zeqiri ka thënë për “Zërin” se ka disa vite që ka hulumtuar në trashëgiminë kulturore dhe shpirtërore në Kosovë.

“Unë për 3 vite jam duke punuar në dokumentimin e trashëgimisë kulturore dhe shpirtërore në Kosovë me projektin ‘Tung Kosova’, me këtë projekt kemi dokumentuar edhe shumë pjesë të tjera të kulturës. Si fotografe, veçantia te kjo nuse ishte përshkrimi i ciklit të jetës në fytyrë. Kjo fotografi mendoj qe ka nxitur kureshtjen e njerëzve të eksplorojnë më shumë për Kosovën. Për mua si fotografe ka një rëndësi të madhe, ta kem një vlerësim të tillë nga ‘National Geographics’ në njëfarë mënyre me motivon të punoj më shumë në fushën e fotografisë dhe promovimit të kulturës dhe traditave në Kosovë”, ka thënë Nita Zeqiraj për “Zërin”.

Pas publikimit të fotografisë në “National Geographic” menjëherë ka pasur komente të shumta rreth fotos. Vetë autorja ka thënë se është pritur shumë mirë: “Prej se është publikuar fotoja në National Geographic ka pasur reagime të shumta dhe ato pozitive nga njerëz anembanë botës”, ka thënë Zeqiri.
Një nuse ashtu si është edhe në foton e “Bride, Kosovo” të Zeqirit, është edhe personazhi qendror i dokumentarit mbi martesat e hershme në rajonin e Prizrenit, e realizuar nga Qendra Kosovare për Studime Gjinore. Tregimi që rezulton nga ky dokumentar flet për përvojat e jetës së grave dhe familjeve të tyre në zonat e largëta dhe rurale dhe trajton çështjen e martesës së hershme.

Ndërkaq, sot kjo traditë është në prag të zhdukjes, pasi vetëm një zonjë 65 vjeçe vazhdon të merret me këtë, pra përgatitjen e nuseve të reja sipas traditave të tyre. Fytyra e nuses është pikturuar në shumë shtresa të bukura të ngjyrave. Tri qarqet e artë simbolizojnë ciklet e jetës që janë të lidhura me njëra-tjetrën nga rrugët e arta që i kalon gjatë jetës së tyre. Qarqet e brendshme të kuqe janë simbole të pjellorisë. Ndërkaq e gjithë fytyra është e mbuluar nga pikat e kuqe dhe blu, me të cilët i dëshirojnë asaj një familje të shëndetshme dhe të lumtur.

“Smart Cities and hybrid Identities”, është festival ndërkombëtar i fotografisë, videove artistike, grafikës kompjuterike, arkitekturës dhe arteve performuese dhe mbahet në kuadër të Karnavalit të Venecias. Është organizuar nga “International ArtExpo” dhe është kuruar nga Luca Curci. Përveç Zeqirit, në ekspozitën me fotografi, janë prezantuar edhe artistë si Antonella Iovienella nga Italia, Nirit Zer nga Turqia, Liene Straupe nga Letonia, Linda Riseley nga Australia e shumë të tjerë.