Drejtsia në Kosov

[Guri i madh]

Bab Club - Në Pronën e Pushtuar Paligjshëm

Bab Club
nga Kreshnik Gashi PrishtinëJanar 27, 201416:30
Rrustem Rukolli nga Skenderaj po merret me një prej bizneseve më fitimprurëse në kryeqytet-hotelerinë. Ka ngritur në pronë të uzurpuar lokalin e ndejave të natës Bab Club në pjesën më të frekuentuar në qendër të Prishtinës.

Njëri nga klubet e ndejave të natës më në zë të kryeqytetit Bab Club, është ndërtuar në pronë të uzurpuar.
Objekti që u privatizua nga Xhevat Sadriaj, që merret me biznesin e patundshmërive dhe industrinë e sigurimeve në Zvicër, mbahet i pushtuar nga Rrustem Rukolli, pronar i Bab Club-it.
I gjendur përballë obeliskut Newborn dhe nën hotelin Grand në qendër të kryeqytetit, objekti i Sadriajt është një hapësirë biznesi e pronarit të kompanisë “R& Rukolli” që fitoi mbi 5 milionë euro tenderë nga Komuna e Skenderajt dhe mbi 15 milionë euro nga autoritetet tjera publike.
Rukolli po ashtu është koordinator i ekipit mbrojtës të kryetarit të Skenderajt Sami Lushtakut që po akuzohet për krime lufte nga EULEX-i.
Sadriaj pjesë e kompanisë COEB që bleu lokalin më 2011 nga Agjencia Kosovare e Privatizimit, nuk po i lejohet qasje në pronën e tij.
Rukolli nuk largohet nga aty edhe përkundër njoftimit nga shteti se nuk mund ta shfrytëzojë lokalin.
Agjensioni Kosovar i Privatizimit dhe Rukolli kishin pasur një kontratë që i lejohej atij të shfrytëzonte lokalin deri në kohën kur do të privatizohej.
“Në momentin kur prona është privatizuar, AKP-ja e ka njoftuar qiramarrësin se prona është shitur”, thotë zëdhënësi i AKP-së Ylli Kaloshi.
Sipas tij AKP-ja nga ky moment më nuk ka obligime ndaj investitorëve për t’ua liruar pronat.
“Nëse investitorët kanë problem me pronat e tenderuara, atëherë ata mund t’i drejtohen gjykatës dhe të kërkojnë lirimin e tyre”, thotë Kaloshi.