Armata Kombëtare Shqiptare

[Dilaver]

Gafurr Adili fsheh sekrete shtetërore; gjykimi me dyer të

mbyllura

TIRANE (8 Tetor) - Rreziku i përmendjes së emrave të politikanëve të lartë shqiptarë të përfshirë në mbështetjen ndaj organizatave të paligjshme të konsideruara edhe terroriste, ka detyruar prokurorinë të vendosë t'i kërkojë gjykatës që procesi ndaj krerëve të Armatës Kombëtare Shqiptare (AKSH) të arrestuar Gafurr Adili dhe Taip Mustafaj të bëhet me dyer të mbyllura. Ky është konkluzioni që është duke dalë pas këtij vendimi jo të zakonshëm dhe që pohohet nga burime të Gazetës pranë organeve të drejtësisë. E mbërritur në gjykatën e Tiranës më 26 shtator, dosja penale në ngarkim të shqiptaro-maqedonasve Gafurr Adili e Taip Mustafaj dhe shqiptarit Idajet Beqiri (do të gjykohet në mungesë) është paracaktuar nga akuza të shqyrtohet e gjitha pa praninë e mediave dhe në kushtet e ruajtjes nga rrjedhja e informacionit. Pra deri tani është një vendim i marrë në mënyrë të njanëshme nga përfaqësuesit e hetimit, i cili do t'i propozohet që në seancën e parë gjyqtarit të përcaktuar të çështjes, Fehmi Petku.



Rreziku i daljes së sekreteve

Burime të Gazetës pohuan se akuza ka ardhur në përfundimin që gjyqi duhet të bëhet me dyer të mbyllura pas seancave të marrjes në pyetje të dy të arrestuarve Adili dhe Mustafaj. Të njëjtat burime pohuan se ka të ngjarë që në deklarimet e tyre të jenë përmendur emra politikanësh apo drejtuesish të shtetit, të cilët qoftë në mënyrë të tërthortë janë përmendur si ndihmës materialë apo moralë të linjës së fortë të këtyre organizatave, duke filluar me ish-lëvizjen UÇK (Ushtria Çlirimtare Kombëtare) të drejtuar nga Ali Ahmeti, deri tek Armata Kombëtare Shqiptare (AKSH) e drejtuar nga Adili, Beqiri e të tjerë. Burimet thonë se ka të ngjarë që gjatë marrjeve të deklarimeve Adili dhe Mustafaj të kenë shqiptuar fragmente që dëmtojnë figurën e këtyre politikanevë apo pushtetarëve, të cilat nëse do të bëheshin publike, do t'i kushtonin seriozisht politikës ndërkombëtare të Shqipërisë. dxh/dxh (GazetaShqiptare/BalkanWeb)