Sunitët v.s Shiitët

[musl|m]

Sa i përket shi’itëve (shiave) është folur më gjerësisht në njërën prej përgjigjeve tona, e meqë edhe ithna-asheritët janë pjesë e tyre, madje edhe grupi kryesor i tyre, ju preferojmë ta lexoni përgjigjen për këtë në pyetjen nr. 61, kategoria Akide, të cilën mund ta lexoni në linkun: http://fjalaebukur.com/sq/content/view/300/68/ Po ashtu ju porosisim ta lexoni edhe librin “Disa bindje të shi’itëve” të autorit Abdullah bin Muhammed, i përkthyer edhe në shqip.
Po ua japim edhe një pasqyrë të shkurtër për Ithna-asheritët: Këta janë rryma kryesore dhe fytyra e dukshme e shi’itëve të sotëm. Bëjnë shumë punë në përhapjen e ideologjisë së tyre rafidite dhe shpenzojnë shuma të mëdha të hollash në aktivitetet e tyre, në rrugë e forma të ndryshme. Për këtë kanë realizuar shumë qëllime të tyre në Botën Islame, duke pasur parasysh edhe ndihmat materiale e morale që i ofruan në këtë drejtim.
Ky është grupi i shi’itëve më i njohur dhe më i përhapur në botë. Këtij grupi i takojnë shumica e shi’itëve në Iran, Irak, Pakistan e gjetiu. Kohëve të fundit ata kanë aktivitet të gjërë në shumë vende, sa që dora e tyre ka arritur edhe në vende, në të cilat nuk u është përmendur as emri e lëre më të kenë pasur ithtarë. Përbrenda grupit kanë shumë mospajtime e mendime të ndryshme, disa i kanë të shpallura publikisht, e disa të mbajtura fshehtë. Por, qëllimi i tyre i përbashkët është ngritja e drejtimit ithna-asheritë xhaferitë. Homeini ka supozuar se ky grup numëron mbi dyqind milionë shi’itë, të parët e këtij grupi, sipas tyre, kanë qenë Pejgamberi sal-lall-llahu alejhi ve sel-lem, Ali bin Ebu Talib dhe Hatixhja, ku Pejgamberi sal-lall-llahu alejhi ve sel-lem e filloi thirrjen në shi’izëm prej zeros.
Janë quajtur me këtë emër për shkak të besimit të tyre në imamatin e dymbëdhjetë njerëzve nga Al Bejti. Është caktuar imamati i tyre, sipas bindjes së tyre, me tekst nga Pejgamberi sal-lall-llahu alejhi ve sel-lem, dhe çdonjëri prej tyre e cakton trashëgimtarin e tij me testament. I pari prej tyre është Aliu radijallahu anhu, e i fundit është Muhammed bin Hasan Askerij i imagjinuar, i cili është fshehur në vitin 260 h (880). Ai do të kthehet, sipas besimit të tyre, do ta mbush tokën me drejtësi, do të përhapet mirësia në mes njerëzve, etj.. Shirazi thotë: Këta quhen ithna-asheritët për shkak të besimit të tyre në imamatin e dymbëdhjetë imamëve.
E këta janë:
1 - Ali bin Ebu Talib,
2 - Hasan bin Ali,
3 - Husejn bin Ali,
4 - Ali bin Husejn,
5 - Muhammed bin Ali bin Husejn Bakir,
6 - Xhafer bin Muhammed bin Husejn-Ebu Abdullah-Sadik,
7 - Musa bin Xhafer Kadhim,
8 - Ali bin Musa,
9 - Muhammed bin Ali-Xhevad,
10 - Ali bin Muhammed-Hadi,
11 - Hasan bin Ali Askerij,
12 - Muhammed bin Hasan Askerij i fshehur e i imagjinuar.
Nga kjo vërehet se ithna-asheritët i përkufizuan imamët vetëm në pasardhësit e Husejnit duke mos i llogaritur pasardhësit e Hasanit. E kanë bërë këtë, ndoshta për shkak se Husejn bin Ali e ka martuar të bijën e mbretit të Persisë Jezdexhred, nga e cila lindi Ali bin Husejn.
Imamitët është emër tjetër për ithna-asheritët, marrë nga fjala imam. Janë quajtur me këtë emër për shkak të angazhimit të tyre rreth imamatit sikur që shihet në veprat e tyre, apo për shkak të bindjes së tyre se Pejgamberi alejhi selam e ka caktuar imamatin vetëm për Aliun dhe pasardhësit e tij, apo për shkak të pritjes së tyre të imamit të fshehur, sipas bindjes së tyre. Allahu e di më së miri!

Bahri Curri, 16.05.2006