Urbanizimi i malësorit shqiptar, shlyerja e borxhit historik nga kombi

[Zana_ch]

Në faqen e parë të gazetës “Zëri i Popullit” të datës 25 nëntor 2003 ndodhej një fotografi e tubimit të një dite më parë të opozitës në Sheshin “Skënderbej” dhe kësaj fotografie i referohet titulli kryesor i asaj dite: “Llumi Berisha kërcënon”. Në faqen 10, ku është artikulli që i referohet ky titull, është ky nëntitull: “Mitingu i Berishës për mbrojtjen e votës së lire përfundon përpara kryeministrisë. Qytetaria, sipas Berishës, që duhej të protestonte për votën kanë ardhur nga qytete veriore për të hedhur parulla banale”. (“Zëri i Popullit”, 25 nëntor 2003, f. 10.)
Pra, të gjithë njerëzit që kanë marrë pjesë në tubimin e opozitës definohen si “llum” dhe thuhet se ky “llum” ka ardhur nga “Veriu”. Sipas logjikes së gazetës së partisë në pushtet, në Tirane kanë të drejtë të vijnë veç njerëz prej qyteteve të Jugut, që janë “race e lartë”, kurse veriorët që janë “racë e ulët” duhet të rijnë të mbyllur si në geto në vendet e veta.
Ja disa shembuj të tjerë nga kjo gazetë:
-«Në mitingun e PD ndalohen qytetarë nga Laçi, Shkodra, Mirdita, Mati, Dibra». (“ZP”, 3 nëntor 2000, f. 1.)
Me sa duket, për “ZP”, shtetasit shqiptarë nga këto zona duhet të marrin leje në polici për të ardhur në Tiranë! Ose duhet të bëhet siç thuhet në atë humorin në “Portokalli”, në “Top Channel”, ku aktori që imiton Edi Ramën i drejtohet “Gjinit”, që është nga Kruja, duke i thënë: «O malok, pështyva këtu dhe nuk erdhe pa u tharë pështyma ime, ta bëra hyrjen në Tiranë me vizë Shengen!»
E që edhe Edi Rama i vërtetë flet kështu kjo kuptohet nga ato që ka thënë për tiranasit dhe që i kam cituar më lart.
-«Sa kohë do të qëndrojnë banorët e Tiranës nën terrorin e të ardhurve mitingashë të periferisë-Injorantët në shesh». (“Zëri i Popullit”, 21 mars 2004, f. 1.)
-«Sheshi “Skënderbej” ka qenë i pushtuar ashtu si gjithë Tirana nga njerëz me uniforma tutash, që me erën e keqe kanë mbytur bulevardin. Edhe pse kanë zbritur që herët nga Kamza, Lapraka e Bathorja me autobusët e linjës, janë përqendruar në shesh atëherë kur kanë parë të mbërrijë lideri demokrat Berisha. Kishte dhe nga ata që kishin ardhur me biçikletë, me të cilat kanë protestuar përgjatë bulevardit, duke të kujtuar një film shqiptar ku përmenden ata që kishin blerë biçikleta pasi kishin shitur më parë gomerët». (po atje, f. 2.)
Gjëja më ironike është se këto fjalë thuhen në gazetën e një partie që pretendon se shpreh dhe mbron interesat e shtresave të paprivilegjuara!
Më tutje thuhet se të ardhurit kanë «demonstruar në të njëjtën kohë formimin e tyre sfidues ndaj qytetarisë». (“po atje, f. 2.)
Instruktive do të qe sikur sjellja e këtyre protestuesve të djathtë të kohës kur PS është në pushtet, të krahasohet me atë të deputetëve të majtë në sallën e parlamentit, në 28 korrik 2006, të cilët bënë gjëra që me siguri mund t’ i kishin bërë vetëm njerëzit kohës së gurit, sikur t’ i sillje në këtë sallë.
Në “Zëri i Popullit” të datës 16 mars 2004 botohet shkrimi “Antishtet dhe mosqytetari”, ku tregohet një incident që ka pasur dikush në Bulevardin “Dëshmorët e Kombit” me një njeri që në shkrim paraqitet si malësor. Por, shkruesi jep të kuptohet se ky malësor është nga Veriu, duke paraqitur të folmen e tij në dialekt, kur i thotë: “s’ pyes për shtetin tuj”. (“Zëri i Popullit”, 16 mars 2004, f. 9.)
Në shkrim krijohet stereotipi i horrit të rrugës në kryeqytet dhe opozitarit, ai është malësor i ardhur nga Veriu: “Dhe bashkë me të sharat, me nënë e babë, motër e vëlla, rrodhën dhe një lumë të sharash për qeveri, ministri, për Nano etj”. (po atje: f. 9.)
Dhe autori konkludon: «Por para së gjithash le ta pastrojmë shoqërinë nga atavizmat se që andej vjen dhe politika e ditëve tona. Se vërtet mund të themi “Qeveri ik”, por a do të guxojmë të themi “Antishtet eja”». (po atje: f. 9.)
Pra, kërkohet që të pastrohet Tirana nga të ardhurit nga Veriu dhe (si vallë, me pastrim etnik?) dhe politika prej tyre, nënkupto prej Berishës. Të ardhurit nga Veriu në Tiranë dhe veriorët në përgjithësi, identifikohen me “Antishtetin” dhe përcillet ideja se pushteti i PS duhet pranuar si e keqja më e vogël, pasi alternative janë ata, “malokët”, “Antishteti”. Është ironike se modelin më paranoiak të antishtetit në historinë e Shqipërisë, shtetin komunist antinjerëzor, nuk e kanë ndërtuar shqiptarët e Veriut, por ata që përgjithësisht i akuzojnë veriorët si njerëz me mendësi antishtet. Shqiptarizmi jopërjashtues.
Shqiptarët, derisa janë një popull i vjetër, janë një nacion (komb) i ri dhe një shtet edhe më i ri. Sot, pas rreth një shekulli, mund të thuhet me keqardhje se ende ka resentimente mes pjesëve të kombit dhe ç’ është më e keqja një pjesë e madhe e politikanëve dhe shtetarëve, gjatë kësaj periudhe, ka punuar për t’ i gjeneruar këto resentimente dhe për t’ i përdorur ato politikisht. Kjo bën që, në një mënyrë ose në një tjetër, të vijë në pyetje vetë ekzistenca e mëtejshme e kombit dhe e shtetit shqiptar në atë çka është sot. Gjërat nuk mund të shkojnë gjatë të qeta në rast se vazhdon të akumulohet urrejtje. Është e domosdoshme që të kuptohet se duhet të ndryshojë mentaliteti i sotëm i një pjese të popullsisë së Republikës së Shqipërisë dhe i elitës së saj politike dhe intelektuale, ndryshe këto të këqija do të shkatërrojnë dhe Shqiptarizmin në formën që është sot, për t’ i lënë vendin një tjetër Shqiptarizmi që i përjashton ata që çojnë tek ai konfliktin, resentimentet, politikën fashiste. Pra, alternativa më e mirë është që të gjithë të fillojnë të mësohen ta pranojnë tjetrin, ta shohin si të barabartë shqiptarin e ardhur nga malësitë në qytete, njëlloj si atë që ka ardhur atje, përgjithësisht vetëm disa dekada para tij. Në këtë sens, procesi i legalizimit të banesave, është më tepër një proces i legalizimit të atij njeriu shqiptar që ndoshta më tepër se të gjithë i meriton qytetet e mëdha shqiptare, pasi këtij njeriu i detyrohemi për ruajtjen e nacionit (kombit).


shkrim i huazuar
gazetashkodra.net