Tokë për kojshi (2 mijë e 500 hektarë)

[Dilaver]

TOKË PËR KOJSHI

Më 13 shkurt të Vjenë, delegacioni i Kosovës do t'i paraqesë Ahtisarit në Vjenë edhe problemin e kufirit me Maqedoninë. Ahtisari në paketën e tij 2 mijë e 500 hektarë ia ka dhënë Maqedonisë.

Jeton Musliu
Prishtinë, 6 shkurt — Kështu së paku thuhet në njërën nga pikat e pakos së Marti Ahtisiarit, e cila këtë problem e shikon thjesht si një mospajtim që duhet të zgjidhet me një komision. Në këtë dokument thuhet qartë se në një afat prej 120 ditësh nga zgjidhja e statusit të Kosovës, do të formohet një komision dypalësh, i cili brenda një viti duhet ta definojë çështjen e demarkacionit, çështjen e vetme të hapur midis Kosovës dhe Maqedonisë. Sipas propozimit të Ahtisarit, territori i Kosovës do të definohet në kufijtë që ka pasur Kosova në ish-RSFJ deri më 31 dhjetor 1988, përveç ndryshimit të vijës kufitare nga marrëveshja e demarkacionit në mes të Republikës Federative të Jugosllavisë dhe ish-Republikës Jugosllave të Maqedonisë më 23 shkurt 2001. Pakoja parashikon edhe kohëzgjatjen e procesit dhe procedurat politike dhe juridike që duhet ndjekur dhe të gjitha këto janë të sqaruara në nenin 3 të aneksit të pakos ku flitet për sigurinë. Kjo çështje pritet të jetë edhe njëra ndër pikat e diskutimit edhe në takimin e 13 shkurtit në Vjenë, ndërmjet Ekipit Negociator të Kosovës dhe Serbisë në ndërmjetësimin e Ahtisarit. Këtë e ka barë të qartë edhe vetë kryeministri i Kosovës, Agim Çeku, sipas të cilit kjo çështje është një ndër formulimet që do të kundërshtohet. "Serbia nuk ka pasur të drejtë juridike të nënshkruajë marrëveshje me shtete të tjera në emër të Kosovës dhe ne do të diskutojmë me Ahtisaarin prej 13 deri më 2 mars", sqaron kryeministri Çeku. Por, një agjenci e sapoformuar kosovare e lajmeve, Kosovanews duke u thirrur në burime të saj, ka raportuar se kryetari i PDK-së, Hashim Thaçi, gjatë vizitës së tij të fundit në Maqedoni është pajtuar me autoritetet e atjeshme që 2 mijë e 500 hektarë tokë t'i mbeten shtetit fqinj. "Edhe pse ndërmjetësi ndërkombëtar, Martti Ahtisaari në propozimin e tij për statusin e Kosovës çështjen e demarkacionit të kufirit mes Kosovës dhe Maqedonisë e ka lënë edhe për më shumë se një vit të hapur, Hashim Thaçi këtë çështje duket ta ketë përmbyllur në favor të fqinjit", citon ky medium, duke u bazuar në burime të saj. Derisa Thaçi ndodhet për vizitë në Izrael, një fakt të tillë e ka mohuar në mënyrë kategorike zëdhënësja e PDK-së, Vlora Çitaku. Ajo këtë e quan një spekulim të mediumit, duke e mohuar në mënyrë kategorike se kreu i partisë më të madhe opozitare të ketë deklaruar në atë mënyrë."Unë kam qenë prezent në të gjitha ato takime dhe e di mirë se çka është thënë, pra kjo është tërësisht e pavërtetë", thotë Çitaku për Express. Ndërkohë, redaksia e kësaj agjencie vazhdon të mbetet prapa fjalëve të cilat i ka plasuar në artikullin e saj. Njëri nga redaktorët e këtij mediumi thotë për Express se në pasimin e informacionit, agjencia është bazuar në burime shumë të sigurta. "Ne i kemi ofruar PDK-së edhe mundësinë për reagim, por ata nuk kanë dërguar", thotë njëri nga drejtuesit e këtij mediumi.

Pakoja e Ahtisarit
Në nenin 3 të aneksit të pakos, ku flitet për sigurinë, thuhet se, "Kosova do të angazhohet me ish-Republikën Jugosllave të Maqedonisë për themelimin e një komisioni të përbashkët teknik brenda 120 ditëve nga hyrja në fuqi e kësaj marrëveshjeje, për të përkufizuar vijën fizike të kufirit dhe për adresimin e çështjeve të tjera që dalin nga zbatimi i marrëveshjes së vitit 2001 në mes të RF të Jugosllavisë dhe ish-Republikës Jugosllave të Maqedonisë".