Konflikti me familjen e Ismail Kadaresë

[Ethnic Albanian]

Familja Rrapi: Konflikti me familjen e Ismail Kadaresë

Nënë e bir flasin nga SHBA për konfliktin me familjen e shkrimtarit
të njohur, në emisionin televiziv "Top Story"

Janulla dhe Renato Rrapi, nënë e bir, ishin të pranishëm mbrëmë,
përmes një lidhjeje të drejtpërdrejtë satelitore nga SHBA, në
emisionin televiziv "Top Story". Ata treguan versionin e tyre mbi
konfliktin me familjen e shkrimtarit të njohur shqiptar, Ismail
Kadare, 22 vjet më parë.

Intervista me Renato Rrapin

- E di që keni kaluar në vitet e fundit në shumë strese dhe më thonë
që keni dalë nga një depresion. Shpresoj të jesh në gjendje të
flasësh për historinë tënde me vajzën e Ismail Kadaresë. Familja e
vajzës thotë që ju nuk keni pasur asnjë lidhje me të, përkundrazi që
ju e keni shqetësuar dhe bezdisur vajzën e shkrimtarit.

Jo, jo, ne ishim komshinj dhe në fillim ishim si miq. Pastaj më vonë
u kthye në dashuri. Krahas kësaj ishin ato historitë e
psikiatrisë… Policia më ka çuar për ekzaminim, s`kishte asnjë
shkak.

- Përpara se të shkojmë tek Psikiatria. Çfarë mban mend ti, çfarë
kujton ti nga raporti me vajzën e Ismail Kadaresë?

Qysh në fillim, sa u njohëm flisnim në telefon. Kur mbaronte shkolla
flisnim tek hyrja e pallatit të saj. Atje, një hetues na kapi një
herë duke folur tek hyrja e pallatit. Mua më çoi direkt në psikiatri
për ekzaminim. Pastaj më vonë ishte si punë dashurie e fshehtë,
gjithmonë me frikën e policisë.

- Pra, ju thoni që keni pasur një histori dashurie me vajzën e
Ismail Kadaresë?

Të fshehtë, të fshehtë...

- Nëna juaj thotë që ju kanë kërcënuar dhe ju kanë rrahur...

Kjo dashuri ishte 2 vjet ose 3 vjet, nuk e di sa zgjati, por është e
vërtetë. Më kanë trajtuar keq.

- A i mbani mend personat qe ju kane trajtuar keq? A i njihni ata?

Jo, jo kush i mban mend?! Ishin policë, të veshur policë.

- Gjatë momentit që ushtronin dhunë ndaj jush, a ju jepnin ndonjë
arsye përse ju kishin thirrur në polici, përse po ushtronin dhunë
ndaj jush, përse po ju rrihnin? A ju jepnin një motiv për këtë?

Nuk më kanë rrahur dhe aq shpesh me sa mbaj mend unë. 2 -3 herë. Po
më thonin: "kush je ti?!"... Si presion psikologjik me të gjitha
format që kishte policia atëherë.

- Ju kanë përmendur emrin e Kadaresë apo të familjarëve të Kadaresë
gjatë këtyre seancave në hetuesi dhe në polici?

Ata më dërgoni fletë-thirrje në shtëpi për t`u paraqitur në rajonin
e policisë. Dhe kur shkoja, paraqitesha në rajon të policisë, një
herë ka qenë edhe e bija e Ismailit, Gresa. Duke bërë presion
psikologjik: "kush je ti?!" e tjera e tjera.

- Renato, ju thoni që ka qenë dhe Gresa në një nga këto thirrjet në
polici?

Një herë ka qenë edhe ajo.

- Cili ishte pozicioni i saj?

Ajo ka qenë e re dhe nuk e dinte se çfarë po ndodhte. Ndoshta i
shikonte gjërat nga një pozicion tjetër, kurse unë nuk isha në
pozicionin e saj. Megjithëse kisha luajtur filma, isha në lice për
violinë dhe kisha ëndrra për të ardhmen, po isha krejt në pozicion
tjetër.

- Ju duket që e keni dashur vajzën e Ismail Kadaresë?

Kështu mendoja unë.

- Kur patë që historia me të po përfundonte, atëherë përse
këmbëngulët ta vazhdonit?

Në fillim, unë pata idenë të tërhiqesha, por ajo deshi të me fliste.
Më çoi haber ta merrja në telefon. E mora në telefon dhe foli si e
përlotur, që të mos ta ndalonim, por ta vazhdonim. Dhe pata pasoja...

- Ju ka thënë ajo ndonjëherë që ka pasur presion nga familja e saj
për të ndërprerë lidhjen me ju?

Po, po, më ka thënë. Por ju thashë, që ishte një dashuri e fshehtë...

- Ju vetë keni pasur presion nga mamaja juaj për të vazhduar këtë
lidhje?

Jo, jo. Mamaja madje me thoshte hiq dorë. Mamaja më thoshte: "mos
vazhdo se do gjesh belanë!"

- Renato, zoti Kadare pohon në intervistën e tij, që ju ka takuar
juve, pasi ju kanë rrahur. Në këtë intervistë, zoti Kadare
përshkruan specifikisht edhe dialogun me ju. Ai thotë: "të kanë
rrahur" dhe ju jeni përgjigjur: "Po më keni rrahur ju" dhe me pas ju
keni pohuar, thotë zoti Kadare, që e keni kuptuar gabimin dhe se nuk
do ta vazhdonit më këmbënguljen tuaj. Është e vërtetë që ju keni
pasur një takim të tillë, pasi ju kanë rrahur, me zotin Kadare?

Jo, jo, s`e mbaj mend.

- Renato, çfarë mban mend nga koha e qëndrimit në spitalin
psikiatrik, ku ti ke kaluar disa vite? A patët momente kur ju
menduat të iknit nga spitali, ndoshta patët momente hakmarrjeje apo
zemërate me dikë?

Ka kaluar shumë kohë, shumë peripeci kanë ndodhur në atë kohë që kam
jetuar në Shqipëri. Më vonë pastaj... kam shkuar në Greqi dy vjet.
Kur edha në Amerikë u stabilizua kjo situatë.

- Ke dashur t`i harrosh shumë prej këtyre ngjarjeve?

Gjëra të kaluara.

- Megjithatë, cili është momenti më i rëndësishëm nga lidhja me
vajzën e shkrimtarit Ismail Kadare?

Ngjarjet midis nesh ndryshuan, për shkak se ndodhnin dhe gjëra që
kishin lidhje me familjen e saj. Ajo çfarë ndodhi me kryeministrin
Mehmet Shehu. Këta ishin të lidhur, kishin miqësi dhe i jetonin këto
ngjarje politike. Për familjen time këto s`kishin të bënin fare, por
për familjen e asaj po.

- Në ç`kuptim ndikonin?

Flisnin për këto gjëra dhe në atë kohë vetë Ismaili Kadareja kishte
frikën e këtyre ngjarjeve politike. Jetonte me pasigurinë e....

- Bëhet fjalë për vitin 1982?

Po.

- Mos mendoni që ndoshta ngjarjet e vitit 1982, situata e vështirë
pas vetëvrasjes së Mehmet Shehut edhe në familjen e Kadaresë mund të
ketë ndikuar në lidhjen tuaj me vajzën e Kadaresë?

Po! Po, besoj.

- Renato, tani je më i qetë, ke kaluar një depresion të rëndë më
thotë mamaja juaj. Shumë ngjarje i ke harruar. Ndoshta më mirë që i
ke harruar dhe ke nisur një jetë të re. Megjithatë nëse do të kishe
përballë Ismail Kadarenë, i cili ju akuzon që i keni shqetësuar
familjen, se deri diku i keni prishur jetën familjes, vajzës së tij
dhe jetën e tyre në përgjithësi. Nëse do ta kishit përballë, çfarë
do t`i thoshit sot?

Është e kotë t`i mendoj këto gjëra. Nuk e di... kam lexuar në
kompjuter për deklaratat që ka dhënë Kadareja për mamanë dhe mua.
Por nga ta di unë nga se niset ai të mendojë të tilla gjëra, jo për
agjenturë... Siç e thashë, ngjarjet politike ishin të lidhura me të.
Ai ka qenë me të vërtetë një figurë kryesore politike shqiptare
gjatë kohës së komunizmit dhe vazhdon, është figurë kryesore e
politikës. Por varet si i mendon ai gjërat. Emri im si i tingëllon
atij, si jo shumë shqiptar.

- Renato, ti ke lexuar ndonjë vepër të Kadaresë? E njeh atë si
shkrimtar?

Po, po kam lexuar në moshë të re, romane.

- Ke një vlerësim tëndin për këtë shkrimtar dhe a ndikohet ky
vlerësim nga ngjarjet që të kanë lidhur ty me të?

Është shkrimtar i veçantë.