Sekreti i fëmijëve nuse

[Naki]

Sekreti i fëmijëve nuse

Publikuar: E premte 10 Qershor 2011, kosova sot
Syhapura dhe të fanitura, shprehjet e dhembshme në fytyrat e këtyre vajzave shfaqin një pafajësi të rrëmbyer dhunshëm.
Këto vajza do të duhej që të luanin, mësonin dhe ta përjetonin fëmijërinë e tyre. Por, në vend të kësaj, këto vajza, ku disa prej tyre kanë vetëm 5 vjet, martohen në ceremoni sekrete, apo edhe publike. Vlerësohet se çdo vit, kjo u ngjanë 10 deri 12 milionë vajzave në botën në zhvillim.

Shembuj nga India, Jemeni, Afganistani...
Në Indi, këto vajza zakonisht martohen me djem 4-5 vjeç më të vjetër, por në Jemen, Afganistan, Etiopi dhe në disa vende të tjera, burrat e tyre mund të jenë njerëz të rritur, mesoburra vejanë, apo edhe keqbërës, të cilët më parë i dhunojnë ato, e pastaj i shpallin gra të veta.
Disa nga këto martesa bëhen për shkaqe ekonomike, apo për të zgjidhur konfliktet familjare.
Martesat e hershme dhe jo të vullnetshme janë dukuri e disa regjioneve, shpesh në mospajtim me ligjet në fuqi. Shumë njerëz e shohin këtë veprim si alternativë më të mirë, krahasuar me humbjen e virgjërisë së vajzave me marrëdhënie paramartesore.
Ceremonitë e këtyre martesave zakonisht bëhen në mes të natës, derisa tërë fshati merr pjesë në ruajtjen e sekretit.
Në Indi, sipas ligjit vajzat nuk mund të martohen para moshës 18 vjeçare, por ceremonitë e martesave të vajzave më të reja adoleshente mund të tolerohen. Por, martesat e vajzave më të reja, fëmijëve që në disa raste mezi kanë mbushur vitin e pestë të jetës, zhvillohen fshehurazi.
Para tri vjetësh, rasti i vajzës Nuxhud Ali u bë i njohur në mbarë botën. Vajza dhjetëvjeçare jemenase ia doli që të ikte nga shtëpia dhe të shkonte në gjykatë, për të kërkuar shkurorëzim nga burri i saj që ishte në të 30-tat, me të cilin e kishte martuar babai me dhunë dhe i cili e rrihte shpesh.
Ajo u bë simbol i fëmijëve që e kanë këtë problem në mbarë botën. Libri me titullin “Unë jam Nuxhud, 10 vjeçare dhe e shkurorëzuar” është përkthyer në mëse 30 gjuhë. Tani, Nuxhud i është kthyer familjes së saj dhe ka rifilluar shkollimin.
Jo të gjitha vajzat e kanë këtë fat që të ikin. Janë të pakta ato që, pas martesës, kanë mundësi shkollimi, por ka pasoja edhe më të mëdha.
Shumë prej tyre dhunohen dhe jetëgjatësia e tyre është e vogël, për shkak të numrit të madh të shtatzënësive në një moshë kaq të re.
Vajzat frikohen që të ikin nga shtëpia, për shkak se kërcënohen me vdekje.
Dhjetëvjeçarja e martuar me një burrë 50 vjeçar!
Në një rast tjetër në Jemen, ishte zbuluar se një vajzë dhjetëvjeçare, Ajsha, ishte martuar me një burrë 50 vjeçar.
Motra e saj u tha gazetarëve se Ajsha kishte bërtitur nga tmerri, kur kishte parë burrin me të cilin do të martohej.
Dikush kishte lajmëruar policinë, por ajo nuk ndërmori asgjë. Edhe sot e kësaj dite, Ajsha vazhdon që të jetojë me atë burrë.
Pasojat shëndetësore po ashtu janë tepër të mëdha, në disa raste edhe fatale.
Një doktor nga kryeqyteti i Jemenit, Sana, përmendi disa nga pasojat që vijnë pasi që vajzat e moshës tepër të re detyrohen që të kenë marrëdhënie seksuale dhe të lindin fëmijë: shqyerjet e mureve vagjinale, shqyerjet e tjera të brendshme, të cilat shkaktojnë formimin e fistulave, të cilat mund të kenë pasoja afatgjata.
Njerëzit që janë të angazhuar me qëllim të shpëtimit të këtyre vajzave nga martesat ilegale dhe për ta përmirësuar jetën e tyre, e dinë se kjo nuk ka të bëjë aspak me, gjoja shpëtimin e tyre.
Molli Melçing, themeluesja e organizatës “Totsan” me seli në Senegal, ka thënë për “National Geographic”: “Nëse ne ndajmë një vajzë dhe e izolojmë atë nga komuniteti ku jeton, çfarë do të jetë jeta e saj? Ne nuk duhet që të inkurajojmë këto vajza që të ikin nga shtëpia. Normat sociale nuk mund të ndryshohen duke i luftuar ato, apo duke i turpëruar njerëzit, duke i quajtur ‘të prapambetur’. Ne kemi parë komunitete të tëra që mund të binden të ndryshojnë. Kjo është mahnitëse”. (“Daily Mail”)