PAGA MUJORE E SIMON HASELOKUT E BARABARTË ME PAGËN E TREQIND

[GASHI75]

Më 25 shkurt 2005 Ibrahim Rugova, Kryetar i Kosovës dhe Ramush Haradinaj, Kryeministër i Kosovës, kanë nënshkruar një “marrëveshje këshilluese” me zëdhënësin e deriatëhershëm të UNMIK-ut, anglezin Simon Haselok. Kjo marrëveshje është protokoluar gati dy muaj pas nënshkrimit, më 21.04.05, në kohën kur Ramush Hardinaj nuk ishte më Kryeministër. Sipas kësaj marrëveshjeje Ibrahim Rugova dhe Ramush Haradinaj marrinë përsipër t’i paguajnë nga buxheti i Kosovës Simon Haselokut 60.800 funta angleze (89.306 euro) dhe “shpenzimet tjera sipas Marrëveshjes, neni 2.2.(b)”. Zyra e Kryeministrit nuk kishte “guxuar” ta bëjë pagesën e kësaj shume marramendëse pa një vendim të Qeverisë. Kryeministri zemërgjer, Bajram Kosumi, që nuk mund t’ia prish qejfin Rugovës, propozoi dhe nënshkroi një vendim me numër 8/142, që mbanë datën 12.04.05, me këtë përmbajtje:



QEVERIA E KOSOVËS



Në mbështetje të nenit 9.3.16. Të rregullores së UNMIK-ut nr.2001/9, mbi Kornizën Kushtetuese për Vetëqeverisje të Përkohshme në Kosovë dhe të nenit 1 të Rregullores së UNMIK-ut nr.2001/19, mbi Degën e Ekzekutivit të Institucioneve të Përkohshme të Vetëqeverisjes në Kosovë, si dhe të nenit 4, pika 3 të Rregullores së Punës të Qeverisë së Kosovës, Qeveria e Kosovës, në mbledhjen e mbajtur më 12 prill 2005, mori këtë:



VENDIM



1. Aprovohet Marrëveshja Këshilluese në vlerë mujore netto, 60800 (gjashtëdhjetëmijëetetëqind) funta britanike dhe shpenzimet tjera sipas Marrëveshjes, neni 2.2. (b) të arritur midis institucioneve të Kosovës (Presidenca dhe Qeveria) në njërën anë, dhe të Shoqërisë ALBANY, në anën tjetër.



2. Pagesa për tre muajt e parë do të bëhet sipas radhës, nga Presidenca, Kryeministria dhe Ministria e Financave dhe e Ekonomisë (nga linja buxhetore e mallrave dhe shërbimeve)



3. Pas tre muajve do të rivlerësohet Marrëveshja dhe në qoftë se vazhdon të jetë në fuqi do të paguhet sipas radhës nga të gjitha ministritë tjera të Qeverisë së Kosovës.



4. Vendimi hyn në fuqi ditën e nënshkrimit



Vendimi iu dërgohet:



-të gjitha ministrive (ministrave);

-Sekretarit të përhershëm të ZKM-së;

-Arkivit të Qeverisë.



Vendimi mban firmën e Kryeministrit të Kosovës, Bajram Kosumit. (Ky vendim botohet pa ndërhyrje, shën. ynë).



Më 27.04.2005 nënshkruhet urdhërobligimi për pagesë (për muajin mars) në vlerë prej 89,306.70 euro në llogari të Simon Haselokut, i cili për të “manevruar” më lehtë kishte deklaruar në Londër një shoqatë me emrin ALBANY. Kjo shumë buxhetore është marrë nga “linja e mallrave dhe e shërbimeve me kodin ekonomik 013400. Kjo marrëveshje xhentëllmenësh (më vonë vendim i Qeverisë) kuptohet nga çdo lexues se është ilegale dhe në kundërshtim me ligjet në fuqi. Shpenzimi i këtillë i buxhetit të varfër të Kosovës (paras së qytetarit tonë) përbënë krim të rëndë ekonomik. Korruptimi dhe kriminalizimi i atyre që po quhen Presidencë dhe Qeveri është i përmasave të paimagjinueshme për qytetarin e zakonshëm. Ky kriminalizim dhe korrupcion moral, politik dhe financiar po bëhet nën ombrellën e UNMIK-ut. Qytetari i Kosovës me të drejtë pyet se çfarë të mire i solli Simon Hselok Kosovës gjatë kohës që ai ishte zyrtar i lartë i UNMIK-ut? Si paska mundësi që ai t’i ndihmojë Kosovës sot (kur nuk i ndihmoi dje) nga pozita e drejtorit të një shoqate joqeveritare? Partia Demokratike e Kosovës nuk ia ka marrë inat as Kosovës dhe as institucioneve të saj që veprojnë nën çadrën e UNMIK-ut, por ajo ka fakte të pkundërshtueshme për korruptimin dhe kriminalizimin e këtyre institucioneve, të cilat po e rrezikojnë të ardhmen e lirë dhe të përparuar të Kosovës. Rreziku për fatet e vendit dhe të popullit tonë bëhet edhe më i dukshëm kur të dërguarit specialë nga BE-ja dhe qendra të tjera këmbëngulin që ne të jemi unik, të bashkohemi dhe t’i përkrahim institucionet e kriminalizuara! Partia Demokratike e Kosovës është themeluar dhe angazhohet me tërë forcën e saj për një shtet të lirë e demokratik të Kosovës, ku do të sundonte ligji dhe institucione që nxjerrin ligje dhe i respektojnë ato për të mirën e Kosovës dhe të popullit të saj liridashës. Ngritja e korrupcionit dhe e krimit të organizuar në sistem institucional paralajmëron fatkeqësi të reja për qytetarin tonë. Miratimi në heshtje i kësaj veprimtarie shkatërruese nga UNMIK-u dhe organet e ndjekjes dhe të drejtësisë të kontroilluara prej tij tregojnë se po afrohet koha kur populli i Kosovës dhe forcat politike progresive duhet t’u bien këmbanave të alarmit me krejt fuqinë e tyre.

Me paratë që paguhet Simon Haselok për ta “këshilluar” Presidencën, institucionet e Kosovës mund të paguanin 40 ekspertët më të njohur të kombit tonë, të të gjitha fushave, të cilët do t’i ndihmonin shumë institucioneve të Kosovës dhe çështjes sonë përgjithësisht. Nuk ka kryetar në botë, madje as ai amerikan, që ta ketë një rrogë të këtillë mujore. Kryetari amerikan Gjorgj Bush e ka pagën mujore rreth 30 mijë dollarë. Po të llogaritet me të ardhurat e profesorëve të Universitetit të Prishtinës rroga e Simon Haselokut është e barabartë me rrogat e mbi treqindë profesorëve nga të cilët në një masë të madhe varet e ardhmja e Kosovës. Vaj vatani e mjerë mileti!