Murseli vs. Greece

[pokeri]

E Enjte , 09 Mars 2006

Lëvizja VETËVENDOSJE ka kompletuar padinë të parashtruar një vit me parë pranë Gjykatës Evropiane për të Drejtat e Njeriut me seli në Strasburg kundër shtetit grek në emër të familjes Murseli, lidhur me vdekjen e djalit të tyre Alimuhamet Murseli.

Më 17 mars 2004, Alimuhamet Murseli, shtatëmbëdhjetëvjeçar nga Ferizaj është goditur për vdekje nga një tanks i KFOR-it grek mu në qendër te qytetit, ku ishte duke protestuar me bashkëqytetarët e tij kundër vdekjes së dhunshme të tre fëmijëve shqiptarë në veri të Mitrovicës, të shkaktuar nga ana e disa personave të përkatësisë serbe. Që nga ajo ditë, familja e të ndjerit kishte ndërmarrur një varg veprimesh për ta ndriçuar rastin duke iu drejtuar organeve të prokurorisë në Kosovë, zyrës së KFOR-it për ankesa, Ministrisë së Drejtësisë dhe asaj të Mbrojtjes në Greqi, mirëpo deri më sot nuk është ndërmarrur asgjë në këtë drejtim nga organet e lartcekura.

Me autorizimin e familjes Murseli, më 10 shator të vitit 2004, Lëvizja VETËVENDOSJE! ka paraqitur padi formale pranë Gjykatës në Strasburg, me ç'rast iu ka përgjigjur afatit gjashtëmujor të paraparë me ligjin e Konventës, afat ky që kërkohet për inicim të një procedure pranë kësaj Gjykate.

Pas pranimit te padisë formale, gjykata kërkoi nga parashtruesit që ta kompletojnë padinë brenda afatit njëvjeçar, gjë që është plotësuar nga përpiluesit e padisë më 30 janar 2006.

Përpiluesit e kësaj padie janë mbështetur në nenin 2 të Konventës Evropiane për të Drejtat e Njeriut, duke theksuar se autoritetet greke kanë shkelur dispozitat e këtij neni sepse nuk kanë zhvilluar asnjë hetim zyrtar efektiv rreth vdekjes se viktimës. Përpiluesit po ashtu konsiderojnë se ka shkelje edhe të nenit 13 të Konventës për shkak të mungesës së një mjeti efektiv ligjor brenda vendit i cili do t'i kishte mundësuar familjes së viktimës inicimin e procedurës për shkeljen e së drejtës së tyre.

Padia është e regjistruar me numrin App.32812/04 dhe mban emrin Murseli vs. Greece.