Kosova zyrë diplomatike në Uashington e Bruksel

Kalt · 06-11-06, 17:45

Kosova së shpejti do të ketë përfaqësitë e saj diplomatike në SHBA dhe Bruksel. Vendimi për të hapur zyrat përfaqësuese të Kosovës është marrë nga autoritet e Kombeve të Bashkuara pas kërkesës nga pala kosovare.
Lajmin e ka bërë të ditur gazeta prishtinase “Koha Ditore”, e cila citon informacionin në bazë të burimeve të saj anonime diplomatike. Zyrat e Kosovës do të lokalizohen në Uashington dhe Bruksel. Sipas raportit mediatik, administrata e Kombeve të Bashkuara e ka dhënë aprovimin për përfaqësimin në këto kryeqytete kyçe të botës për ish-provincën serbe, e cila administrohet prej saj tyre, që shtatë vjet më parë, kur NATO bombardoi forcat serbe që po kryenin shfarosje etnike ne Kosovë. Megjithatë, po sipas burimeve diplomatike të kësaj gazete, aprovimi për hapjen e zyrave nuk ka të bëjë me përcaktimin, apo paralajmërimin e statusit të Kosovës, pasi përfaqësia do të bëhet në kuadër të UNMIK. Misione të tilla parashikohen të hapen edhe në vende të tjera të Evropës Perëndimore si Gjermania dhe Austria. Ideja e një zyre në Bruksel është diskutuar dhe kërkuar nga autoritetet kosovare që në muajin shkurt, kur nisën negociatat me palën serbe për pavarësinë e Kosovës. Miratimi i menjëhershëm për përfaqësinë diplomatike në çdo vend të botës do të ishte problem dhe do të shkaktonte reagime të ashpra nga pala serbe, duke e quajtur si shkelje të normave ligjore ndërkombëtare. Por megjithatë, edhe pse në kuadër të UNMIK-ut, Kosova do të përfaqësohet në dy nga qytetet më të rëndësishme të botës, duke hedhur hapin e saj të parë drejt njohjes ndërkombëtare si shtet. Thuhet se vendimi për hapjen e zyrave përfaqësuese të Kosovës në këto vende do të zbatohet brenda pak javëve. Ky konsiderohet si suksesi i parë kosovar në arenën ndërkombëtare, deri në përcaktimin e statusit përfundimtar që do të shkojë drejt pavarësisë.

Gazeta Panorama