In Memorium ...!!

[jadore]

Editoriale E Update'ueme: Dec 7th, 2006 - 13:05:38
PËR PA U BA “BLLACE” PUNA, ZOR KOSOVARI MERR VESH DIÇKA
Nga Migjen Kelmendi
Dec 7, 2006, 12:34

Email'o
Print'o
BERISHA DHE EMBARGO. Sa isha n’RTK, Baton Haxhiu, si gjithmonë, me ate aftësi të hatashme të tij me u përçbirue e me ba gjana që s’ta pret mendja, ma kishte sjell në Beta video-kasetë, intervistën ekskluzive të tij me njanin nga protagonistat e shtetit shqiptar, që ishte politikani ma i urryem n’Kosovë asokohe, menjihere mbas lufte - Fatos Nano. Nano, me ate elokuencë të veten dhe me nji qetësi të nji njeriu koshient se ka krye dhe ba nji punë të madhe për Kosovën, flitte dhe kallxonte, në veten e parë, se si e ka ndihmue luftën e UÇKs, se si e ka armatos UÇKn, si i ka hapë depot, si e ka urdhnue ushtrinë shqiptare me ndihmue…nji kallxim të hatashëm dhe autentik për luftën, që opinioni kosovar kurrë s’e ka ndi e as kurrë s’pati rastin me e pa. E ndiqja me vemendje nji rrëfim të rrallë për nji politikan, që asht krejt koshient se gjuha dhe sinqeriteti i rrëfimit nuk i shkojnë karrierës së tij prej politikani e diplomati. Por, ai flitte me autoritetin e njeriut që asht i bindun se ka ndihmue shumë lirinë e përgjithshme të qytetarëve të Kosovës, andaj as nuk i jepte randësi se si mujn me tingllue këto fakte në zyrat diplomatike në Kosovë e Shqipni. Intervista duhej me i parapri nji vizite triumfatore të Nanos n’Kosovë, andaj kjo intervistë edhe duhej me e çplue se kush në të vërtetë ishte MasterMind i luftës dhe lirisë së Kosovës. E keqja e intervistës ishte se Nano jo vetëm sjellte dëshmi e zbulonte sekrete, por edhe kualifikonte persona me asi shprehje të randa, sa ishin të paemitueshme. I bindun se ka drejtë me sha, sepse, qe, Kosova asht e lirë dhe ai asht njani prej atyne që ka ba ma së shumti, Nano shprehej me fjalor rruge për Ibrahim Rugovën dhe sidomos Bujar Bukoshin, tue i akuzue se e kanë huq luftën, se tue mosveprue e kanë ndihmue Milosevicin, etj.etj. Une isha i gatshëm ate intervistë me emitue, por tue i heq pjesët e mëdha me kualifikime e shamje…diçka që u kuptue si cungim, andaj disi krejt kjo punë u shtye….për t’mos u emitue kurrë.

Nano nuk erdh në Kosovë, edhe pse e kishte paralajmërue vizitën. Kosova e reprezentueme përmes LDKs dhe zotit Rugova nuk e donin Nanon. Për pjesën e madhe të tyne Nano ishte po ai njeri i komenteve, karikaturave e kualifikimeve të gazetës “Bota Sot”. Njeri i urryem. E në të njajtën kohë, po kjo Kosovë e adhuronte dhe e donte Sali Berishën, sepse e merrnin për mik të Rugovës, e rrjedhimisht edhe të Kosovës. Kosova e urrente njeriun që u ka ndihmue, Nanon, e nga ana tjetër e adhuronte njeriun që i shitte naftë Milosevicit gjatë embargos, Berishën! Askush nuk e dinte pos njerëzve të interesuem me ngjarjet në Tiranë, se ishte po ky Sali Berisha që jo nuk e përkrahu luftën e UÇKs, por gjatë mesit të viteve 90, ai kishte thy embargon ndërkombëtare dhe furnizonte makinerinë luftarake të Malit të Zi dhe tërthorazi të Milosevicit, me karburant.
Kjo thyemje e embargos që sot u ba eksplicite dhe zoti Berisha e pranoi publikisht, dihej. Por, si gjithmonë, kosovarët nuk e dinin. Kosovarët vetëm në fund të tregimeve, vetëm kur arrijnë n’Bllace e kuptojnë se sa të huqun e të dështuem janë, e çka i ka gjetë. Për pa u ba “Bllace” puna, zor kosovari merr vesh diçka.
Krejt këte tregim e nisa për me e ritheksue nji feler, të metë të kosovarit të rëndomtë: aftësinë e hatashme me u – habitë. E me huq.
Personalisht, tue i dijtë këto histori e fakte, gjithmonë m’ka ardhë keq që Kosova nuk dijti me e njoftë e me e pa njeriun që ju ka ndihmue, Nanon. E di, për nji kosovar të rëndomtë kjo asht aq e pabesueshme sa zakonisht e pabesueshme din me qenë – e vërteta. Si kjo e vërtetë se Berisha i ka shitë naftë Milosevicit. Si e vërteta për Kongresin e Drejtshkrimit. Si e vërteta për Kadarenë…S’kanë fund habitë e nji kosovari.
Por, po them, për pa u ba “Bllace” puna, zor kosovari merr vesh diçka.