Dyshohet të jenë gjetur eshtrat e Frang Bardhit!

[Zana_ch]

Ngjarja e rrallë:
Restaurimi i një prej objekteve të kultit më të vjetra të zonës së Shkodrës, Kishës së Shën Gjergjit në një kodër 500 m mbi nivelin e detit, në fshatin Nënshat të Komunës Hajmel, ka sjellë gjetjen e disa eshtrave që mendohet se i përkasin Frang Bardhit, folkloristit, historianit dhe etnografit, njërit prej figurave më të rëndësishme të letërsisë së vjetër shqipe.
Dyshimi ka ardhur nga fakti se Frang Bardhi ka shërbyer si peshkop në këtë kishë, e cila daton para vitit 1583 dhe ka qenë qendra e dioqezës së Sapës. Kisha e njohur si Kisha e Shën Gjergjit ka qenë jashtë funksionit prej shumë vitesh, ndërsa restaurimi i saj ka nisur vetëm pak kohë më parë. Madje aty është ndërhyrë disa herë. Ndërhyrja e parafundit ka qenë në vitin 1854, ndërsa më 2006, me iniciativën e dioqezës së Sapës dhe kontributin e banorëve të zonës u bë dhe rikonstruksioni i fundit. Sipas pohimeve të arqipeshkvit të kësaj dioqeze, Luçiano Agustini, gjatë punimeve janë gjetur tre palë eshtra të varrosura brenda ambienteve të saj. Ndërsa për dy raste, pas ekspertizave përkatëse ka rezultuar se ato u përkasin dy meshtarëve që kanë ushtruar aktivitetin e tyre në këtë objekt kulti, pikërisht Imzot Gjergj Kolecit dhe Imzot Severinit që pas vdekjes janë varrosur në ambientet e kishës, për rastin tjetër ka arsye të mendohet se ato mund t'i përkasin Frang Bardhit. Për këtë, janë specialistët përkatës që duhet të merren me ekzaminimin e tyre, për të dalë në një konkluzion përfundimtar dhe për të bërë kërkime shkencore të detajuara.

Historikisht dihet se Frang Bardhi ka shërbyer këtu më 1643, dhe ka mundësi që ai të jetë varrosur brenda kishës. Eshtrat që dyshohet se i përkasin Bardhit janë më mes të kishës në dyshemenë e saj dhe janë lënë aty ku janë gjetur, ndërsa sipër tyre është vendosur një mbulesë e xhamtë e cila mund të hapet nga studiuesit për të bërë identifikimin.

Historia e këtij objekti kulti është tepër e lashtë. Sipas të dhënave historike, kisha e Shën Gjergjit në kodrën e Nënshatit ka ekzistuar para vitit 1583. Në një hark kohor jo të vogël, gjatë shekullit të XIV, dioqeza e Sapës që sot njihet me emrin Zadrimë, ka qenë e ndarë në dy dioqeza të vogla, në atë të Dejës dhe të Sardës. Në vitin 1490 është bërë bashkimi i Sardës, Dejës e Sapës në dioqezën e Sapës. Rikonstruksioni i fundit i cili ka përfunduar para pak ditësh ka përfshirë çatinë, riparimet e mureve, etj.. Frang Bardhi një nga figurat më të shquara të kulturës shqiptare, është hartuesi e mbledhësi i parë i fjalorit të shqipes. Ai na la trashëgim dy vepra madhore "Fjalorin latinisht-shqip" dhe "Apologjja e Skënderbeut".



Anila Dushi

marre nga gazeta" shekulli"