e qfare tjeter mund te beje une, dhe tjeret pos......

jadore · 13-07-07, 17:45

Ne fund te javesJul 13, '07 9:00 AM
for everyone

nga Behxhet Sh. SHALA

BOTËRISHT DEKLAROJ:
NUK JAM AS KUNDËR SERBISË E AS KUNDËR RUSISË,
PËR SHKAK TË SIGURISË
DHE ARDHMËRISË !

Rrapëllima e derës , për shkak të erës : Kohëve të fundit, anëtarët e Ekipit të Unitetit janë “ radikalizuar”, si shumë janë duke kërcënuar! Jo do t’ia ftohim Serbisë. jo do t’ia ngulim Rusisë, jo nuk e bëjmë hesap Afganistanin, jo do të behemi bashkë me Ahmadinexhatin, saktësisht me Iranin, jo nuk është tuneli pa dritë, jo do të zëmë pritë në Korzikë, nuk bëjmë kërcënime vetëm dekorative, ua lëshojmë mediat me SIDË- n infektivo – informative, do të krijojmë tensione politike duke sulmuar Shumadinë multietnike, do t’i përdorim armët strategjike dhe ju qesim fare duke mos kursyer as armët nukleare, pra, mos na detyroni që nga pozicionet tona nëntokësore – strategjike, t’i përdorim bombat made in EU-, pordhët, me mbushje atomike! E pastaj nuk duam që dikush të vjen te dera e të ankohet se diçka si shumë po vjen era! Andaj, për hirë të paqes, demokracisë dhe stabilitetit, mos luani me durimin e Ekipit të Unitetit! Është e vërtetë se disi po dukemi jo shumë aktiv, se premtimi ynë më tepër ka karakter fiktiv, se nuk e mbajmë fjalën e dhënë, se nuk e mbajmë besën, se për shkak të pozitës ia marrim popullit shpresën, këto janë mashtrime optike që prodhojnë pasoja tektonike, në Azi, Afrikë e sidomos në Amerikë! Se, për nderë të shqiptarit, për kokë të Ahtisarit e në veçanti për ate të Hashimit, nuk i thomë, dobar dan, Zhivadinit! Edhe vet e dini, se nuk ia vlen, që, për disa qëllime taktike, ta rrezikoni Kosovën multietnike! Është rast i rrallë dhe i paparë, më beso or mik, kur një vend me vetëm 7% të popullatës që janë pakicë, kushtëzohet, të bëhet vend multietnik. Meqë është rast i rrallë, Kosova duhet të shërbej si farë, jo për respektim të pamjaftueshëm të së drejtave etnike por si një vend me kod të dëmtuar politiko- gjenetik dhe perspektivë skizofrenike! Është e vërtetë, se flamurin kombëtar, flamurin e Ismail Qemalit, jo për interesa tona, por për ato të atdheut, e varëm në bisht të kalit! E plandosëm për tokë, personin që e qëndisi flamurin, Marigonë Rinën vetëm mos ta hidhërojmë, pa nevojë, Marigonën e Vërtetë Shqiptare, Zeuse Tinën! Nuk e morëm në konsideratë propozimin për himn, të shkruar nga Millutini e të përdorur si plagjiat nga Behxhet Trimi, “ Rapsodi për Millojkën “, jo se nuk ishte propozim autentik por shkaku se kishte 40 % tekst në gjuhën shqipe, pra,nuk ishte tekst i vërtetë multietnik por diversion romantik! Tash po flitet se simbolet do të bëhen kur Kosova të bëhet shtet, haj medet! Ishin kërcënimet se do të shpallet pavarësia në mënyrë unilaterale, në Kuvendin e Kosovë dhe Metohisë, për inat të Serbisë dhe Rusisë, mirëpo për arsye humanitare këtë nuk do ta bëjnë pa përkrahjen e bashkësisë ndërkombëtare! Ka edhe kërcënime nga carllazaristët e Vidovdanit, njësiti i cubave i Gazimestanit, që kanë deklaruar se për Kosovë dhe Metohinë pavarësia është autonomia plus Serbia dhe se çdo përpjekje që pavarësinë ta qesin në letër do të nxis një reagim tjetër! Ky ishte ai reagimi i forcave paramilitare të Serbisë që aspak nuk dallon nga reagimi i ushtrisë! Komandanti i ushtrisë serbe gjithashtu tha se reagimi i ushtrisë do të jetë ashtu si do të jetë urdhëri i politikës së Serbisë, me një fjalë, të gjithë janë në të njëjtat valë, politika, cubëria, policia dhe ushtria! Në ndërkohë që çdo forcë që do ta mbronte Kosovën është neutralizuar, paralizuar, me një fjalë, nga politika është instrumentalizuar! E tash “ kërcënohen “ se do të riaktivizohen, nëse statusi i Kosovës vie në rrezik e ai as që duket në fund të tunelit, or mik! Këto kërcënime që bëhen në emër të mbrojtjes së miletit më shumë janë përpjekje për ta realizuar një takim me anëtarët e Ekipit të Unitetit! Dhe, ata që më parë e kanë provuar çorbën e Dragodanit , mos ta përmendin shumë fushën e mejdanit! Në kohën kur parapolitikës as që i intereson çështja e pavarësisë, pse atëhere unë të bëhem më i mençuri në mesin e budallenjve dhe ta kundërshtoj politikën e Serbisë dhe të Rusisë andaj botërisht deklaroj : “ Nuk jam as kundër Serbisë e as kundër Rusisë, për hirë të sigurisë dhe ardhmërisë!” Prandaj, besoj se dikush nga Shtypi i Sikletit do ta përcjell në adresat e caktuara, me shifra të koduara, me fjalët :” ja edhe njëri që vazhdimisht rebelohej dhe çdo gjë kundërshtonte tashmë pozitivisht po reflekton, për t’ia ruajtur nderin dhe dinjitetin nuk po e qujmë këtë nënshtrim e as kapitulim por thjesht , risocializim! Pra, lexues të nderuar tashmë po e shihni se publikisht po dorëzohem, nga e kaluara ime rebele po distancohem dhe, për një kohë thjesht po pensionohem! Kam përjetuar goditje me radhë, asnjëhere nuk më qitën në ballë, propozimin për flamur nuk ma pranuan, ate për himnin e Kosovës ma deklasuan, me një fjalë, krejt më turpëruan! As për të blerë ve në treg nuk më lanë vend e jo më që të bëhem deputet në Kuvend, ku për 4 vite vetëm do të mrizoja dhe lekë do të fitoja! Edhepse, jam njëri ndër të parët që u angazhua për një Kosovë multietnike, nuk më bën as postier në ekipet politiko – strategjike. Ani, kur iu thashë se në Ekipin e Unitetit e dua një vend, gati mbetën pa mend! Kot u përpoqa se Skendën e kam jaran të vjetër, nga ditët e rinisë dhe se bashkë kemi luajtur gogla në ditët e fëmijërisë, se edhe Fatmirin e kam njëfarë jarani se që të dy kemi gjak llapjani, se e njoh Kolën dhe Agimin dhe se një ditë jam përshëndetur për dore në rrugë me Ylberin dhe Hashimin me ç’rast kam përjetuar emocione të papara dhe që nga ajo ditë duart i kam të palara, jo se nuk e dua erën e pastërtisë por në këto duar po e ndjej puhizën e pavarësisë! Blerimin nuk e përmenda, jo sepse nuk e dua por meqë kemi të njëjtin mbiemër, të kem konflikt interesi nuk dua! Vetonin nuk e përmenda, në te seriozisht jam hidhëruar sepse që nga zgjedhjet e fundit , një borxh nuk ma ka paguar! Në planin emocional, kam një bilanc katastrofal, përkundër serenatave të kënduara dhe vargjeve të shkruara në stilin e Petrarkës, Majakovskit dhe Lorkës jo që nuk e fitova simpatinë e Tinës por, çka është më e keqja e humba dashurinë e Rinës! Po e paguaj një çmim, se ëndërrat keq i pata projektuar dhe si fort u pata lazdruar! E ndieja veten si kryetar i Kosovë dhe Metohisë, si njëri ndër prijësit e Ballkanit dhe si pelegrin permanent i procesioneve politike të Dragodanit! Lexues të nderuar, po e shihni se jam më i madhi pendestar, deri më tani thjesht kisha qenë një gomar! Po nëse e pranojnë robërinë, mos i shqetëso me pavarësinë! Çka më hynë mua në punë çështja e Albinit dhe Adem Trimit! Edhe unë tash u radhita në mesin e atyreve që e gjykojnë Albinin dhe nuk po dua as emrin t’i përmendi atij tjetrit që, kishe ka luftuar për lirinë e Kosovë dhe Metohisë,e tash, si Donald Trampi, po rrezitet nëpër plazhet e Shqipërisë! Pata ra në pikë të hallit dhe nuk dija si t’ia bëja Adem Djalit! Mendoja , si mund të jetonte, ia dai, me 40 euro pension kombëtar, në Shqipëri! Kur, në ditë më thanë, or djalë, ti paske rrjedhur fare, po Adem Shejtani ka sa të duash pare! Kur m’i treguan do fakte që ishin në lojë, mbeta me gishta në gojë! Ky ishte pëfitimi që nga Ekipi i Unitetit që pati Adem Trimi : Kola i ndau 45.000 euro, Fatmiri 48.000, Vetoni 50.000, Hashimi 52.000 ndërkaq Agimi asnjë cent sepse me ato para, për një invalid lufte e ndërtoi një shtëpi! Ky është vëllaçko fitim, duke u rreshkur nëpër plazhet e Shqipërisë, e trashë konton e xhirollogarisë! Në emër të pavarësisë! As Albini, nga Ekipi i Unitetit nuk ka mbetur keq dhe pa interesin, me para të shtetit të Kosovës po e shetisin nëpër burgjet e Kosovës demokratike, prej izolimi në izolim! Pra, Ekipi i Unitetit ndaj Albinit e ka përmbushur obligimin patriotik dhe moral dhe tani mbetet të finalizohet ai material! Nesër më duhet të shkruaj diçka për vendosmërinë e Ekipit të Unitetit për të mos biseduar as me Serbinë e as me Rusinë si edhe për një veturë të qeverisë, që në Mitrovicën e Veriut ishte pa regjistrim jo se inkasantët e Ethem Çekut kanë vepruar pa hezitim por thjesht se atje nuk ështe Kosovë dhe Metohi por, thuaja tani disi po e zyrtarizojnë , si Serbi! Ju kujtohet se edhe Daci, dikur, kur ishte në fuqi, do piktura patriotike, në Kuvendin e Kosovës i pati mbuluar me do pizhama bukolike! Pasi u realizua pavarësia, kam vendosur të rri te shtëpia dhe të merrem ekskluzivisht me punët e mia! Nëse dikush është ndjerë i prekur, unë aspak nuk e kam ndjenjën e fajësisë, më parë ua kam treguar adresat e përgjegjësisë!
13.07.07 Prishtinë
Behxhet SH. SHALA, ( ish mbrojtës i Albinit dhe ish përkrahës i Adem Trimit, i injoruar nga Ekipi i Unitetit, i sulmuar nga Shtypi i Sikletit, ish dashnor i Rinës dhe ish Benjamin i Tinës, pra krejt ish, ish, me një fjalë , pa ardhmëri, në Kosovë dhe Metohi