Internet Explorer 7 edhe në kopjet pirate të Windows-it

[iliros]

Në arnimin e fundit të lëshuar online, Microsoft ka mundësuar instalimin e IE7 edhe në kopjet e paligjshme të Windows XP. Paksa e papritur, por lëvizje logjike, duke marrë parasysh se, Internet Explorer ngadalë, por sigurt, po e humb pjesën e tij në treg.

--------------------------------------------------------------------------------------
Shfletuesi i internetit i Microsoft-it, Internet Explorer 7, ka filluar para një viti, mirëpo edhe pse bëhet fjalë për produkt krejtësisht pa pagesë, shfrytëzuesit e kopjeve të paligjshme të Windows XP nuk kanë mundur ta instalojnë, sepse instalimi ka kërkuar autorizimin WGA.

WGA (anglisht. Windows Genuine Advantage – përparësia e Windows origjinal) është fushatë kundër piraterisë, të cilën e ka nisur Microsoft dhe, e cila, ka pasur për qëllim t’u tregojë shfrytëzuesve gjërat negative të shfrytëzimit të prodhimeve pirate dhe t’i shtyjë ata në blerjen e softuerëve të ligjshëm.

Autorizimi megjithatë ka shërbyer për të vërtetuar nëse bëhet fjalë për kopje origjinale apo të paligjshme të Windowsit. Në raste kur ka gjetur kopje pirate, Microsoft nuk ka lejuar instalimin e arnimeve dhe shtojcave softuerike të shpërndara nëpërmes sistemit Windows Update, e për shkak të sigurisë është lejuar që me përditësimin automatik të shkarkohen vetëm arnimet e sigurisë.

Gjiganti softuerik sigurisht ka konkluduar se, ata që kanë dashur të legalizojnë Windowsin edhe e kanë bërë këtë gjë gjatë vitit të fundit, derisa ata që nuk kanë dashur apo nuk janë në gjendje të legalizojnë Windowsin, kanë vazhduar të shfrytëzojnë IE6, e ndoshta edhe shfletuesit tjerë konkurrent si Firefox, Opera etj.
Në çdo rast, IE7 tani është “hapur”, dhe mund të instalohet edhe te kopjet e paligjshme të Windows XP. Është e mundur që Microsoft e ka marrë këtë vendim për shkaqe sigurie, pasi që IE7 është shfletues larg më i sigurt se IE6.

www.microsoft.com

© Portali Telegrafi 2007