Shqiptari çë u bë pjesë e një enciklopedie shkencore

**Naki** · 30-10-07, 15:34

Nuredin Kapaj, shqiptari që u bë pjesë e një enciklopedie shkencore

Jeta dhe veprimtaria shkencore e inxhinierit shqiptar, biografia e të cilit është publikuar në një nga enciklopeditë më të njohura në Amerikë
Ai jeton prej vitesh Itali dhe më së fundi, biografia e tij është publikuar në faqet e një enciklopedie me emër në SHBA.
Ndoshta keni dëgjuar për enciklopedinë prestigjioze "WHO IS WHO IN SCIENCE AND ENGINEERING" ( "Kush është dikushi në shkencë dhe në Inxhinieri"). Është një publikim që ekziston pothuajse prej 100 vjetësh në SHBA dhe botohet një herë në 10 vjet. Në faqet e saj paraqiten biografitë e shumë figurave që kanë dhënë kontribute të shquara në fushat e teknikës dhe të shkencës. Por! E dini se çfarë mund të gjeni nëse shfletoni botimin e fundit të saj? Biografinë e një shqiptari. Po! Ai quhet Nuredin Kapaj, dhe është përfshirë në faqet e këtij botimi prestigjioz sepse ka dhënë një kontribut të madh për zhvillimin e proceseve të reja metalurgjike, veçanërisht për zhvillimin e proceseve të derdhjes së pandërprerë të çelikut. Kapaj, është autor i më shumë se 40 punimeve shkencore që janë publikuar në revista dhe paraqitur në kongrese prestigjioze ndërkombëtare. Po ashtu, është autor i më shumë se 35 patentave ndërkombëtare për shpikje të ndryshme teknike. Për të mësuar se kush është ky shqiptar me mbiemër tipik jugor, që ka bërë emër jashtë, gjurmuam rreth tij. E kontaktuam dhe ai me mirësjellje e pranoi ftesën e "Shekulli-Kontakt" për të rrëfyer për jetën dhe karrierën e tij në shkencë.
Aktualisht, Nuredini është 51-vjeç. Jeton në Itali, së bashku me familjen, gruan e dy fëmijët dhe është kryetar i Departamenteve të Metalurgjisë, të Llogaritjeve Numerike dhe të Laboratorit Metalurgjik në Qendrën e Kërkimeve Shkencore, në njërën nga kompanitë më të mëdha në botë për ndërtim impiantesh në Industrinë Metalurgjike. Gjithashtu ai është edhe lektor i jashtëm i Universitetit të Udines.
Prof.dr.Nuredin Kapaj është me origjinë nga Tepelena dhe për disa vite para, se të ikte në Itali, ka jetuar në Elbasan. Në vitin 1982 ka mbaruar Universitetin e Tiranës, në degën Inxhinieri Metalurgjike. Ndërsa në 1986 është diplomuar në degën Inxhinieri Mekanike, pranë Universitetit të Torinos (Politeknico di Torino, Itali). Po në këtë universitet, në vitin 1990 do të mbrojë Doktoraturën në Metalurgji.
Në të njëjtin vit vendos të kthehet në Shqipëri. Ishte i ri, i diplomuar, me doktoratë dhe mëse i formuar. E bën këtë hap të rëndësishëm në jetë, me shpresën se mund të jepte kontributin e tij për zhvillimin e metalurgjisë në vendin tonë. Por: "Detyra që m'u caktua nuk kishte të bënte fare me përgatitjen time tekniko-shkencore. Më duhej të merresha me problemin e furnizimeve të pajisjeve teknike, në një nga uzinat e Kombinatit Metalurgjik të Elbasanit. Sigurisht, një punë e tillë mund të bëhej edhe nga dikush me arsim jo universitar. Duke mos patur tjetër alternativë u këshillova nga profesori im i Doktoratës të kthehesha në Itali dhe të vazhdoja punën, në fushën në të cilën isha specializuar",-tregon inxhinieri.
Dhe ashtu bëri. Filloi punë në Qendrën Kombëtare të Metalurgjisë Italiane në Romë, ku punoi për pothuajse dy vjet.
"Më vonë u kërkova nga "Danieli&C", kompani shumëkombëshe, një nga më të mëdhatë në botë për ndërtim impiantesh për industrinë metalurgjike".
Këto pesë vitet e fundit është aktivizuar si lektor i jashtëm për një cikël leksionesh në Universitetin e Udines, për kursin e Masterit në Metalurgji. Gjithashtu është anëtar i shoqatave amerikane të metalurgjisë: (AIST - American Iron and Steel Technology Association), Materialeve (ASM).
Më e reja rreth personazhit të enciklopedisë, ka të bëjë me faktin se këto ditë është zgjedhur nga revista amerikane "Iron & Steel Technology" për edicionin e ardhshëm të muajit tetor një punim i tij, që u paraqit vitin e kaluar në Kongresin AIST 2006, nëCleveland, Ohio.
Megjithatë,pavarësisht arritjeve që i kanë dhënë sukses në shkencë, kryesore për inxhinierin mbetet familja. Ka dy fëmijë, Aliçe, 12-vjeçe dhe Matia, 10-vjeç dhe të shoqen, Meritën, e cila punon si farmaciste. Me ta Nuredini kalon një pjesë të madhe të kohës së lirë, por nuk le mënjanë as aktivitetin fizik. Veç të tjerash, ka hobi muzikën dhe kitara vazhdon të jetë një nga dashuritë më të mëdha të jetës së tij.

Enciklopedia
Publikimi i MARQUIS "Who is who in science and engineering" ka një jetë thuajse 100 vjeçare dhe publikimet me personalitete të reja bëhen njëherë në 10 vjet. Zgjedhja bëhet në bazë të kontributit të dhënë nëpërmjet publikimeve shkencore, nga një juri e përbërë nga personalitete shkencore të degëve të ndryshme. Biografia e Nuredin Kapajt është botuar në edicionin e nëntë, që përkon me vitet 2006-2007.

**Naki** · 06-09-08, 18:06

Artisti shqiptar Saimir Strati hyn në librin Gines të rekordeve
Zëri i Amerikës
05-09-2008

Një artist shqiptar ka vendosur një rekord të ri për mozaikun më të madh të botës të bërë me tapa shisheje.

Libri Ginis i Rekordeve Botërore thotë se Saimir Strati përdori më shumë se 200 mijë tapa shishesh me të gjitha ngjyrat dhe madhësitë, për të krijuar mozaikun me një djalë që i bie kitarrës, me dimensione 13 metra me 7 metra.
Artisti Strati thotë se mozaiku portretizon shpirtin e Mesdheut.
Kjo nuk është përpjekja e parë e Stratit për një rekord botëror të pazakontë.
Ai mban rekordin edhe për portretin më të madh të botës, në të cilin, duke përdorur gozhdat, ai ka krijuar një portret të Leonardo da Vinçit.//lk

DEA · 06-09-08, 18:12

Ketyre dyve dhe te tjereve si keta, ju uroj suksese te metutjeshme ne jete dhe ne lemite e tyre qe jane percaktuar.