Centrali bërthamor ne Shqiperi, alarm në Greqi

[hasanmehmeti]

Centrali bërthamor ne Shqiperi, alarm në Greqi

BalkanWeb.com URL:
http://www.balkanwe b.com/index. php?id=11202


(Dërguar më: 05/11/07) Me titull “Shqipëria planifikon të
ndërtojë Central Bërthamor”, gazeta greke “To Ethnos” bëhet
gazeta e dytë pas “Eleftherotipia” , që brenda dhjetë ditëve
publikon rreth ndërtimit te një centrali bërthamor në
Shqipëri

Nga Greqia, Aleksandër Marku

ATHINE -Mundësia e ngritjes së një centrali bërthamor në
Shqipëri për prodhimin e energjisë elektrike, ka vënë në
alarm grekët. Kjo, për faktin se ky shtet gjendet i
rrethuar, ose të paktën kështu pritet të ndodhë, nga
centrale bërthamore të vendeve fqinje.
Mediat greke
Me titull “Shqipëria planifikon të ndërtojë Central
Bërthamor”, gazeta greke “To Ethnos” bëhet gazeta e dytë
pas “Eleftherotipia” , që brenda dhjetë ditëve publikon
reagime të ndryshme, për sa i përket planeve për ndërtimin
e një centrali bërthamor në Shqipëri, në mënyrë që të
zgjidhet problemi energjetik. Ishte agjencia shtetërore
greke ANA, e cila publikoi menjëherë dy javë më parë,
lajmin se Shqipëria planifikon ndërtimin e një centrali
nuklear, pas deklaratës së kryeministrit shqiptar, Sali
Berisha se “në tryezën e tij ka mbërritur një ofertë nga
një shoqëri e huaj franceze, për ndërtimin e një centrali
bërthamor në Durrës”. Madje, mediat greke thonë se ka
propozime edhe prej një shoqërie suedeze dhe një amerikane.
“Kështu, Greqia do të ndodhet e rrethuar dhe nën një rrezik
bërthamor”, konkludon gazeta, duke dhënë si shembuj edhe
pikat e tjera të “rrezikshme” bërthamore që ndodhen në
vendet fqinje, si Turqia, Maqedonia, Egjipti, Bullgaria dhe
Rumania. “Kryeministri Berisha ka treguar interes të madh,
- vazhdon gazeta ”Ethnos”, - dhe qeveria shqiptare ka
përcaktuar madje edhe vendin se ku do të ndërtohet ky
central, në Durrës, rreth 100 kilometra larg kufirit
greko-shqiptar në vijë ajrore. Argumenti më bindës për këtë
veprim të qeverisë shqiptare është fakti se Shqipëria është
integruar në programin e Komisionit Botëror Bërthamor, në
mënyrë që të informohet për “know-how” të ndërtimit dhe
funksionimit të reaktorëve. Përveç këtij fakti, Shqipëria
prej kohësh ka pranuar mbetje “bërthamore” nga vende të
tjera europiane, duke u shndërruar në një fushë plehrash
“bërthamore” të Ballkanit”.
Reagimet
“Është e vërtetë se industria bërthamore shfaq veten e saj
si një shpëtimtare në udhëkryqin e ndryshimeve klimaterike,
për arsye se stacionet bërthamore nuk djegin qymyr, pra nuk
prodhojnë dioksid karboni. Por, na fsheh koston e madhe për
ndërtim, mirëmbajtje dhe hesht për sa i përket “thembrës së
Akilit” të të gjitha stacioneve të tilla, derdhjen apo
groposjen e mbetjeve bërthamore”, - ka deklaruar për mediat
greke, Aleksandra Mesare, drejtuese e organizatës
“Greenpeace”. Shqetësimin për ndërtimin e një stacioni
bërthamor në Shqipëri e shprehu në pyetjen e saj ndaj
Komisionit Europian edhe eurodeputetja greke, Marilena
Kopa, e cila kërkoi të dinte nëse BE-ja është në dijeni të
planeve të tilla për t’u ndërtuar një reaktor tjetër, në
një rajon që është i tejmbushur me burime nukleare.
“Largësia dhe ndryshimet e klimës janë faktorë që luajnë
një rol të rëndësishëm për sa i përket rrezikut në një rast
aksidenti bërthamor, - ka theksuar Thanasis Geranios,
profesor i Fizikës Bërthamore në Universitetin e Athinës.
Një stacion më tepër në zonë do të shtojë rreziqet për
Greqinë, jo vetëm për shkak të distancës prej 100
kilometrash nga Durrësi, por edhe për detin Adriatik,
nëpërmjet të cilit do të transportohen “mbetjet
bërthamore”. Një skenar mbytjeje të një prej anijeve të
tilla do të shkatërronte gjithë Adriatikun dhe Jonin”.
Gazeta “Ethnos” citon edhe kryetarin e Vëzhguesve
Antibërthamorë të Mesdheut, Thanasis Anapolitanos, sipas të
cilit, “gjithë rajoni do të rrezikohet. Energjia bërthamore
me problemet e pazgjidhura të funksionimit të sigurt dhe të
administrimit të mbetjeve bërthamore, duke i shtuar edhe
rrezikun e një katastrofe të plotë nga një aksident apo nga
një goditje “e verbër’, përbën një kërcënim të madh për
jetën, ambientin, paqen dhe sidomos për situatën tepër të
paqartë në rajon në këto momente”. (GazetaShqiptare)