Pas 12 vajzave, lindi djalë!

[Dilaver]

Pas 12 vajzave, lindi djalë!

Kosovarja - Arben Gjinaj

Kishin kaluar më shumë së 23 vjet që familja Kitaj nga fshati Zit i Sadik Agës, në Gjakovë, prisnin lindjen e një trashëgimtari mashkull. Çifti Prend dhe Prene Kitaj, nuk u dëshpëruan as pas lindjes së 12 vajzave me shpresën dhe besimin në Zot se një ditë do të vijë në jetë edhe djali. Ata ishin të përkushtuar në realizimin e dëshirës së tyre, sjelljen në jetë të një voglushi. Dhe kështu edhe ndodhi, dëshira e tyre u përmbush me vullnetin e Zotit: dy muaj më parë, në këtë familje u lind fëmija i shumpritur, të cilin prindërit e pagëzuan me emrin Pjetër (sipas Biblës, emri Pjetër do të thotë, gur, shkëmb).

Të dielën në mesditë, kur ”Kosovarja” e vizitoi këtë familje, në shtepinë e tyre ende vinin musafirë për të uruar lindjen e djalit. Prindërit shprehnin kënaqësinë më të madhe të përjetuar në jetën e tyre. Hiq më pak nuk mund ta fshihnin gëzimin as dymbëdhjetë motrat të cilat e përqafonin vazhdimisht vëllanë e vogël.

Nëna Prenë ndihej shumë e lumtur dhe e gëzuar për lindjen e birit të saj.

”Kemi pritur shumë gjatë, shumë vjet derisa erdhi koha të na lindë djali. Të dymbëdhjetë vajzat më kanë lindur thuajse çdo vit. Edhe pse lindnin vetëm vajza, nuk merzitësha asnjëherë. E rëndësishme ishte që fëmijët të lindnin shëndosh e mirë. Si unë ashtu edhe burri, kishim besim të madh se do të vinte dita kur do të lindte edhe djali. Pas dymbëdhjetë vajzave, Zoti na fali dhe na gëzoi edhe me një djalë. Djali tash i ka bërë dy muaj dhe është në gjendje shumë të mirë shëndetësore. Edhe tash, po të më lindte prapë vajzë, nuk do të isha pënduar….”, rrëfen nëna Prenë, për qëndrimin dhe vendosmerinë e saj dhe të bashkëshortit derisa t’u lindte djalë, teksa në dorë mbante gëzimin e shtepisë, djalin e hasretit.

”Burrin e kam djalë hasreti. Duke e ditur se edhe ai ishte i vetmi djalë në familjen e tij, kishim dëshirë që ta kemi një trashëgimtar mashkull. E kemi pasur ndërmend që derisa të lindë djalë të lindim fëmijë. Na u ka pasë tekë që ta kemi patjetër një djalë në familjen tonë…” thoshte Prena, 41 vjeçare.

Në muajin e katërt të shtatzënisë, nëna Prenë, nga mjeku kujdestar e ka kuptuar se embrioni që po zhvillohej në mitrën e saj ishte i gjinisë mashkullore. Kur i ka treguar mjeku se fëmija është djalë, Prena vetëm ka qeshur, por më pas nuk ka mundur t’i përmbaj dot lotët e gëzimit.”Gjatë kohës së shtatzënisë kisha një ndjenjë gëzimi, por nuk e besoja ende pa e parë me sytë e mi. Nuk kisha edhe shum besim, ani pse gajtë vizitave rutinore, mjeku me thoshte mos u brengos se fëmija është djalë. Edhe kur e linda beben, mjeku erdhi dhe me t

ha se fëmija është djalë. Prap nuk besoja deri sa ma sollen fëmijën te shtrati. Kur ma sollën djalin, për disa minuta kam mbetur si e shtanguar dhe nuk dija se çka po bëj, nga gëzimi kam filluar të qaj dhe e kam përqafuar shumë….”, i shprehte me të njejtin intensitet emocionet që kishte përjetuar në momentin kur e kishte parë djalin.

Prena thotë se nuk bën dallime me fëmijët, të gjithë i shikon njejtë, madje tash ka kujdes më të madh për vajzat ngase i duket se mos po i len anash. Të gjithë fëmijët i afrohen, e puthin e perqafojnë, por vajza e tretë është e dhënë më shumë pas tij, ndërsa e madhja mundohet që të kujdeset për të. Sipas nënës Prenë, fëmija është në gjendje të mirë shëndetësore, ka shtuar shumë mirë në peshë dhe është i urtë.

”Asnjë fëmijë nuk e kam rritur me qumësht gjiri, të gjithë janë rritur me ushqim artificial”, shtoi Prenë Kitaj.

Pas gëzimit të lindjes së djalit, Prena thotë se fëmijët po i lutën që të lindë sërish fëmijë, për t’ua sjellë edhe ndonjë vëlla tjetër, por tash ajo i ka kaluar të dyzetat dhe nuk e di se çfarë do të bëjë në të ardhmen ngase thotë se nuk e di a do të jetë në gjendje për të lindur fëmijë tjetër.