Gaddafi kërkon shpërbërjen e Zvicrës!

[4peace]

Gaddafi kërkon shpërbërjen e Zvicrës!

Presidenti i Libisë, Muammar Gaddafi, duket se edhe zyrtarisht ka paraqitur kërkesën para Asamblesë së Përgjithshme të OKB-së për shpërbërjen e Zvicrës. Ai këtë kërkesë e ka bërë qysh në korrik, gjatë samitit të shteteve anëtare të grupit G8, i cili është zhvilluar në Itali, ka njoftuar televizioni i Zvicrës.

“Sipas tij, territori shtetëror i Zvicrës duhet të ndahet dhe t’u jepet shteteve fqinje”, citoi planet e Gaddafit deputetja dhe nënkryetarja e Komisionit për Politikë të Jashtme të Këshillit Kombëtar të Zvicrës, Christa Markwalder. Gaddafi ka kërkuar që me këtë çështje të merret Asambleja e Përgjithshme e OKB-së, e cila fillon takimin e saj vjetor më 15 shtator. Libia për një vit do ta kryesojë Asamblenë e Përgjithshme të OKB-së.

Sipas gazetës zvicerane "20 Minuten", Gaddafi qysh para një muaji e ka parashtruar këtë kërkesë. Por, Komiteti, i cili është përgjegjës për planifikimin e programit të punës së Asamblesë, ka hedhur menjëherë poshtë këtë kërkesë, me arsyetimin se ajo bie ndesh me parimet kryesore të kartës së OKB-së, theksoi më tutje gazeta, duke cituar zëdhënësin e OKB-së, Farhan Haq.

“Asnjë shtet anëtar i OKB-së nuk guxon të kërcënojë ekzistencën apo sovranitetin e shteteve tjera”, tha Haq i cili është zëdhënës i sekretarit të përgjithshëm të OKB-së, Ban Ki Moon. Për këtë arsye, kërkesa nuk është pranuar dhe nuk është vënë në qarkullim dhe nuk është publikuar si dokument i OKB-së.

Në anën tjetër, ambasadorja amerikane në OKB, Susan Rice, ia ka tërhequr vërejtjen Gaddafit që të sillet si duhet gjatë punimeve të Asamblesë së Përgjithshme.

“Pas pritjes që ia bëri Libia atentatorit të Lokerbisë, Abdel Basset Al Megrahit, Gaddafi është duke ecur mbi akull tejet të hollë”, theksoi Rice.

Në anën tjetër, gazeta “Tages-Anzeiger” ka njoftuar se Gaddafi ka kërkuar një kaucion prej disa qindra mijëra dollarë për lirimin e dy biznesmenëve zviceranë, të arrestuar në Libi. Ata ka tashmë mbi një vit që po mbahen nën arrest, nën akuzat se kanë shkelur rregulloret për viza.

Vitin e kaluar, djali i Gaddafit, Hannibali dhe bashkëshortja e tij u detyruan të paguajnë në Zvicër një kaucion prej 330 mijë eurosh për t’u liruar nga burgu. Ata ishin arrestuar nën akuzat se kishin abuzuar punëtorët në një hotel në Zvicër.

???


.