Te tjeret per Ahmet Krasniqin...!

[Urata]

Halit Bogaj

AHMET KRASNIQIT



Atë ditë zie n’Shqipëri

Ra Ahmeti në pusi

Por nuk dihet kush e vrau

Ish shqiptari apo shkau

2

Por vërtet ishte një krim

Që na mbushi me trishtim

Na u vra një oficer

I shkolluar burrë me nder

3

E vrau nata plot mister

Si ka ngjarë ndër ne shpeshherë

Armiqtë tanë e dinë më mirë

Si e vranë atë martir

4

Por do vijë prapë një ditë

Ai mister për t’u shëndrrit

Asesi nuk do t’lejohet

Gjaku i tij që të harrohet

5

Se e kemi për detyrë

Në atë vrasje për të hyrë

Se e kemi amanet

Që atë krim ta zbulojmë vetë

6

Se Ahmeti ish për ne

Promethe për këtë atdhe

Ish i lidhur fort me tokën

Për të cilën e la kokën

[Urata]

adri Mani: Gjakatarët po na vrasin me rend alfabetik
E Marte, 15-12-2009, 09:49pm (GMT)


Ahmet Krasniqi, Ministër i Mbrojtjes
Arkivore

GJAKATARËT PO NA VRASIN ME REND ALFABETIK
/Cilët janë atentatorët e Kolonel Krasniqit?/

Nga Kadri Mani

E nderuar familje Krasniqi, të nderuar bashkatdhetarë të rrymës kombëtare shqiptare, lajmi kobzi për vrasjen me atentat të kolonelit Ahmet Krasniqi, më 21 shtator 1998 në ora 23 e 25 minuta,- na goditi rëndë: me lot në sy e zemërgjakosur, ju shprehim ngushëllimet tona më të thella për vdekjen tragjike të Kryefamiljarit tuaj dhe të Kryekomandantit tonë legjendar të forcave çlirimtare kosovare.
Si të ju ngushëllojnë juve, kur nuk mund ta ngushëllojmë as vetveten, si t`i ngushëllojmë shokët e bashkëpunëtorët e Ahmetit, që po e njihnin me kohë, dhe ata të cilët po pritnin me padurim të takoheshin me ekspertin e luftës e të artit luftarak?- po ngushëllimi është reciprok, tek na rrahin zemrat bashkë për një ideal, tek ngritim grushtet njëkohësisht për hakmarrje të shenjtë ndaj armiqve të jashtëm e mercenarëve të tyre në meset tona, tek kujtojmë likuidimet fizike (e politike) me rendin alfabetik me shkronjën-A: Ahmet Delia, Azem Bejta. Aziz Zhilivoda, Azem Hajdari, Ahmet Krasniqi... Ngushëllohemi tok kur kujtojmë fjalën e urtë se rrufetë nuk gjuajnë në hithra por në lisa të mëdhenj; ngushëllohemi tek shohim pamjen impozante të Kolonelit, përpara të cilit ushtria çlirimtare jepte betimin solemn, dhe urdhrin e Ministrit të Mbrojtjes: Ju urdhëroj që ta mbroni flamurin dhe kurrë të mos ia dorëzoni armikut.

Ahmeti ishte një diell, e dihet se drita e diellit i verbon shpendët e natës, andaj edhe planet djallëzore të lakuriqëve e të urithëve të zinj, të qyqeve, lorëzave e hutinëve... për të manovruar nëpër errësirën skëterrë të popullit tonë liridashës; nuk po mund ta duronin filistinët... Ngushëllohemi reciprokisht kur jemi të bindur se çdo zemër e vërtetë shqiptare do të ndizet flakë e zjarr kundër planifikuesve dhe dorasëve të atentatit mizor mbi trupin e Ahmetit tonë të dashur...
Ahmeti nuk la vetëm një tufë fëmijë, Ai la rininë dhe popullin liridashës të vendit e të globit tokësor, që do t`i hakmerret shumëfish. Ahmeti edhe pas vdekjes fizike është me ne e në ne, përjetësisht dhe amshueshmërish ndër breza.
Skllota filistine e meskine nuk mund ta honepste dudajevin shqiptar; lëpushkat e neveritshme po villnin gjak e vrer kundër oficerit madhor, për të vetmin „mëkat“ pse ka qenë student në Beograd e jo në Tiranë!!- pavarësisht dezertimit nga stuhia serbijane dhe dorëzimit të kazermës të Gospiqit kroatëve që bënin luftë të drejtë çlirimtare, nga i njëjti pushtues; pamarrëparasysh... sepse, ndryshe, nuk mund të bëheshin komandantë barinjtë e kulmaxhinjtë!!- pra, atentatorë nuk ishin vetën dy fantazma me maska që shkrehen fishekët në trupin e birit të popullit shqiptar, atentatorë janë dyqind e dymijë shpifarakë e grindavecë rrugaçë të rrugëve e rrugaçë gazetash; atentatorë janë edhe ata që kosovarëve (shqiptarëve) jua ndalojnë hyrjen në Shqipëri- pa viza!!!

Kush e nisi luftën ma i pari!!

Ahmetin tonë të dashur e vrau politika shoveniste grabitqare e fqinjëve tanë të vampirosur e të lugatosur, por edhe politika folklorike e krenarisë fodulle: ata që do t`i imponohen historisë, vetëm sa për t`iu kënduar „brezat“ këngë lavdie: o kush e nisi luftën ma i pari!!!- pamarrëparasysh se luftën e nisën të parët dëshmorët tanë të historisë më të re: Fazli Greiçevci, Shaban Shala, Afrim Zhitia e Fahri Fazliu, Rexhep Mala e Nuhi Berisha, Vëllezërit Gërvalla e Kadri Zeka...: kush i vrau këta të fundit dhe kush angazhohej për të mos u zbuluar atentarët!!!???- a mund të ketë lidhje me ta edhe kjo gjëmë???
A e kemi ne në nivel sistemin e informimit, shërbimin informativ-kundër informativ??- kemi ne Institutin e Strategjisë Kombëtare dhe çfarë punohet atje??
As gjatë pajtimit të gjaqeve nuk stigmatizoheshin vrasësit mizorë, po vetëm lavdëroheshin falësit e gjaqeve zemërgjerë!!- përse të mos trimëroheshin ata të rrymës antikombëtare, përderisa ne i falim me aq zemërgjerësi babaxhane!?- madje edhe kur dihet mirëfilli se ishin të nxitur e të yshtur nga UDB-ja, sikur në rastin tragjik të atentatit të hapur në pikë të ditës të dëshmorit tonë Rexhep Elmazi...
Në pritje të kapjes së menjëhershme të atentatorëve mizorë dhe të gjykimit të tyre shembullor, shtojmë: poshtë pushtuesit serbo-grekë dhe poshtë rryma antikombëtare!!

Lavdi e përjetshme Komandantit legjendar Ahmet Krasniqi!

/Kadri Mani: “SHQIPTARËT JANË ATJE!”, Tiranë, 1999, f. 324-325; kryetar i Komisionit Informativ i Bashkësisë Shqiptare në Zvicër/

[Urata]

Neki H. Lulaj: Ahmet Krasniqit
E Diel, 13-12-2009, 09:27pm (GMT)

Neki H. Lulaj

AHMET KRASNIQIT

Emri i një ushtaraku
kolonel me shiqim te zjarrt,
officer i shkolluar
shqiptar me jë traditë të lartë

Kolonel Ahmet Krasniqi,
trim për sakrifica sublime
komandant i një ushtrije
qe di të jau prishte strofullat shkijeve.

Njeri me ambicje të mëdha
ushtarak i pa shoq
për lirinë e Kosovës nanë
i gatshem të vihet në ballë dhe në front.

Ahmeti ministër i mbrojtjës,
komandant i një ushtrije
burr I madh i Zhilivodës,
frigë e tmerr për shumë shkije.

Sa lakmoi edhe unë vet,
qe të isha ushtar i tij
se i përkas etnisë kombtare
të atij burri trim dai.

Mbremje e zezë 21 shtatori
i motit nëntëdhjetë e tetë
krismat e pabesisë misterioze
e privuan Ahmetin nga kjo jetë.

Gjakatarët me shpirt shkau,
kryen në Tiranë edhe një atentat
vranë te madhin kolonel,
pa i berë kujt hile,pa i hi kujt ne hak..

Thonë se Nata ka sy, ka vesh, ka gojë
pabesija e trethetija të kafshon si ulkojë
po ku te gjet ty me zemër të madhe
i pa vdekshmi i ushtrisë Shqiptare.

Kosova e nëntëdhjetë e tetës,
lengonte gjak e veshur me te zi
por një plagë të pa sherueshme
ja shtoi vrasja jote në pa besi.

A thua vrasesit qe thurën plane,
tradhetaret qe të vran në pusi
kurrë ata mos i ngohtë ky diell
se kurre nuk do të kenë rehati.

Një gje dua të ja u rikujtojë
mos ta bejn gjumin rehat
se një ditë do të dalin para drejtësisë
ata gjakpirësa , lubijat e shkaut.

Komandant Ahmet Krasniqi,ti pusho ne qetësi
hak nuk betohem se do te marrim,
por misterin e vrasjes tande
do ta zbardhim ne terësi.

Ti nuk je meteor i shuar,
gjithmonë do të kujtoj kjo shqiptari,
se ishe ministri i mbrojtjes
Komandant për një ushtri..

[Urata]

Në Wuppertal të Gjermanisë u mbajt akademi përkujtimore për Heroin e Kosovës Ahmet Krasniqin
E Merkure, 07-10-2009, 05:59pm (GMT)

Nga Myftar Halili

Organizuar nga Nëndega e LDK-së në Nordrhein-Westfalen dhe Dega e LDK-së në Gjermani në klubin “7 Shtatori” në Wuppertal, u mbajt akademi përkujtimore në njëmbëdhjetëvjetorin e vrasjes enigmatike të kolonel Ahmet Krasniqit, ish-ministër i parë i mbrojtjes në Qeverinë e Kosovës, i shpallur Hero i Kosovës. Akademia u udhëheq nga Abedin Gashi, anëtar i Kryesisë së nëndegës së LDK-së në NRW kurse krahas bashkatdhetarëve, anëtarëve e simpatizantëve të LDK-së morën pjesë edhe familjarë të kolonelit Krasniqi në krye me vëllain e tij, Behxhet Krasniqin.
Ahmet Krasniqi bëri përpjekje të mëdha për bashkimin e faktorit politik dhe ushtarak të Republikës së Kosovës
Në emër të organizatorëve të Akademisë foli Muharrem Xhafolli, anëtar i Kryesisë së nëndegës së LDK-së në NRW. Ai ndër të tjera tha se për t’i pasur të qarta shkaqet e vrasjes së Ahmet Krasniqit, duhet pasur të qartë situatën politike që mbretëronte në gjithë hapësirën tonë kombëtare. Krijimi i Ministrisë së Mbrojtjes të Republikës së Kosovës në vitin 1998, krijoi bazën e një organizimi institucional të luftës çlirimtare të popullit tonë që ishte nënë robërinë serbe. Ardhja në krye të Ministrisë së Mbrojtjes të një atdhetari, që rrjedhtë nga një familje me tradita të larta të atdhedashurisë dhe të trimërisë, të kolonel Ahmet Krasniqit, njërit ndër ushtarakët shqiptarë me përgatitje të lartë profesionale, bëri që të alarmohen armiqtë tanë shekullor nga droja se krijimi i Forcave të Armatosura të Republikës së Kosovës, për të cilat punonte me përkushtim Ahmet Krasniqi, do t’ua prishnin planet dhe skenarët që i kishin thurë. Ahmet Krasniqi bëri përpjekje të mëdha për bashkimin e faktorit politik dhe ushtarak të Republikës së Kosovës, që ishte kushti i parë për të iu kundërvu me sukses makinerisë ushtarake të Serbisë, në realizimin e aspiratave të saja antishqiptare.
Ahmet Krasniqi edhe pse ishte i vetëdijshëm se kundër tij dhe SHP të FARK-ut po behën komplote të rrezikshme, nuk e ndali veprimtarinë e tij për bashkimin e subjekteve politike dhe ushtarake të Republikës së Kosovës. Ai dha shembull konkret se shqiptarët duhet harruar mosmarrëveshjet, xhelozitë dhe hasmëritë që i kishin në mes vedi për shkak se ishim në luftë me Serbinë. Në vitin 1992 familja Krasniqi në Zhilovodë ishin bër objekt kontrollimi dhe maltretimi nga policia serbe, ngase siç thoshte policia serbe "nipat e Aziz Zhilivodës, kanë formuar njësite guerile të cilat po veprojnë rrëzë Qyqavicës", dhe pas shumë peripecive dhe përpjekjeve arritën që Ahmeti e më vonë edhe Behxheti e të tjerë, të shpëtojnë kthetrave të policisë serbe dhe të largohen për në Shqipëri.
Në emër të Degës së LDK-së në Gjermani foli Myftar Halili – Dragidella, anëtar i Kryesisë dhe zëdhënës i saj. Ai pasi përshëndeti të pranishmit dhe pasi i falënderoi ata për pjesëmarrje në këtë akademi sikurse në të gjitha manifestimet që i organizon Dega e LDK-së në Gjermani foli edhe për kontributin e madh të Heroit të Popullit kolonel Ahmet Krasniqit. Ai tha se vrasja enigmatike në kryeqytetin shqiptar e ministrit të mbrojtjes dhe atë në kohë të luftës ishte sulm ndaj përpjekjeve të luftëtarëve shqiptarë për çlirimin e Kosovës. Kolonel Ahmet Krasniqi do të mbetet gjithmonë njëri prej personaliteteve më të çmuara shqiptare si në përpjekje për çlirimin e Kosovës ashtu edhe kudo ku ai jetoi e veproi. Apeli ynë, tha ai, do të ishte: Të zbulohet vrasësi i kolonelit dhe eshtrat e tij të kthehen në Kosovë, për të cilën ai e dha jetën.
Qazim Bajgoraliu, sekretar i Degës së LDK-së në Gjermani, ndër të tjera tha se kolonel A. Krasniqi ishte autor i shumë punimeve te shumta studimore dhe shkencore në lëmin e artit ushtarak. Karriera ushtarake e tij në armatën jugosllave ishte përplot barriera dhe pengesa, ishte degraduar disa herë, vetëm e vetëm se ishte shqiptar me shkathtësi të veçanta prej ushtaraku, e degraduan edhe me rastin e burgosjes së vëllait të tij Behxhetit në vitin 1982, nga se edhe ky iu kishte bashkangjitur dhjetë vite më vonë lëvizjes së cilës i takonte kolonel A. Krasniqi. Kolonel A. Krasniqi, kishte punuar me përkushtim të madh për të koordinuar aktivitetin e eprorëve shqiptarë me qeverinë e Republikës së Kosovës që nga viti 1993 dhe sidomos në vitin 1998, që me profesionalizëm të lartë për të ngritur bazat e një ushtrie e cila do t´i jepte grushtin dhe goditjen e fortë forcave serbe.

Eshtrat e Heroit Ahmet Krasniqit të kthehen në Kosovë

Kolonel A. Krasniqi, si komandant i përgjithshëm i shtabit të FARK dhe ministër i mbrojtjes punoi gjithashtu me përkushtim për institucionalizimin e ushtrisë dhe unifikimin e faktorit ushtarak dhe atij politik. Ishin rezultatet e punës së tij, që kolonel A. Krasniqi i sollën vdekjen e parakohshme nga se çdo ditë UÇK, po forcohej dhe profesionalizohej dhe për armiqtë e shqiptarëve po bëhej vonë, nëse UÇK ngrihej në dy këmbët, kështu qe pushteti i qeverisë së Nanos, në bashkëpunim me forcat tjera të errëta, mundësuan armiqtë e UÇK-së dhe popullit shqiptar të kryejnë atentatin që i mori jetën ministrit, komandantit, ushtarakut, shkencëtarit e atdhetarit, kolonel Ahmet Krasniqit dhe kjo ishte goditje e madhe për UÇK dhe popullin shqiptar në përgjithësi. Gjatë veprimtarisë së tij në Shqipëri ballafaqohej me vështirësi dhe ka qenë shumë herë i ndaluar dhe i kontrolluar nga policia e shtetit amë, si në Tiranë ashtu edhe ne Kukës e gjetiu dhe të gjitha këto i përballonte me shpresë se një ditë do të tejkalohen, por fatkeqësisht dora tradhtare ia mori jetën dhe dëshira e tij për atë që punoi nuk u realizua, pra të formonte një UÇK që në të vërtetë do të çlironte Kosovën. Një ditë eshtrat e kolonel A. Krasniqit duhet të kthehen në tokën e Kosovës, për të cilën aq shumë punoi dhe e deshi dhe së një ditë do të ndriçohen të gjitha ato pengesa dhe vështirësi. – tha Qazim Bajgoraliu.
Në këtë akademi folën edhe Refki Ahmeti, ish-ushtar i kolonelit Ahmet Krasniqi, Agush Balaj, ish-deputet i Kuvendi të Kosovës që në Kaçanik aprovuan Kushtetutën e Kosovës, krijuesi Faruk Tasholli, aktori Liman Zogaj recitoi për Heroin Ahmet Krasniqi sikurse që me një recitim u paraqit edhe e reja Bleona Muçolli.
Në emër të familjes Krasniqi, organizatorët e kësaj akademie dhe të gjithë pjesëmarrësit i falënderoi Dardan Krasniqi, nip i kolonelit Ahmet Krasniqit. Ai me duke iu drejtuar pjesëmarrësve ndër të tjera tha: Me pjesëmarjen tuaj në këtë tubim ju keni nderuar Ahmet Krasniqin, keni nderuar përpjekjet e tij dhe të bashkëpunëtorëve të tij për të bërë një ushtri të organizuar mirë dhe të depolizituar tërësisht, ushtri e cila do të ishte e denjë për t´u ballafaquar me armikun shekullor dhe jo vetëm për t´u ballafaquar por edhe për të triumfuar ndaj tij. Axha im Ahmeti, siç e dini edhe ju krahas detyrës sie ministrit ai ka bërë përpjekje që të bashkojë faktorin politik, sepse e dinte se vetëm të bashkuar mund ta bënin realitet ëndrrën shekullore për liri e pavarësi të trojeve shqiptare në përgjithësi, andaj unitetin e konsideronte armën kryesore. Për këtë unitet ai kishte sakrifikuar çdo gjë, pra edhe jetën. Ju duhet ta dini se ai ishte ekzekutuar nga ata që ishin kundër bashkimit tonë, e ekzekutuatn ata kriminelë që në kohërat më të vështira që kalonte populli ynë mendonin vetëm për përfitime materiale.

[Urata]

Halil Rrustemaj: Akademi pėr Kolonel Ahmet Krasniqin
E Merkure, 24-09-2008, 06:12pm (GMT)

Me një Akademi përkujtimore ,bashkatdhetarët me qëndrim në Gjermani, përkujtuan dhjetëvjetorin e vrasjes së ish Ministrit të Mbrojtjes së Republikës së Kosovës, kolonelit Ahmet Krasniqi ,tashmë “Hero i Popullit”.

Shkruan: Halil Rrustemaj

Në Örlinghausen afër Bielifeld-it të Gjermanisë, organizuar nga Kryesia e Nëndegëve të LDD-së në Landin gjerman të Westfalisë së Rinit Veriorë (WRV-NRW), dhe në bashkëpunim me kolegët e kolonelit , ish pjestarë të formacioneve ushtarake nga shtabi suprem i Forcave të Armatosura të Republikës së Kosovës është mbajtur akademi përkujtimore në përvjetorin e vrasjes së kolonel Ahmet Krasniqit, ish ministër i mbrojtjes së Kosovës .
Në akademinë ku morën pjesë qindra bashkatdhetarë u përkujtua 10-vjetori i vrasjes, tanimë të heroit të popullit Ahmet Krasniqi, i cili dha jetën për çlirimin e Kosovës.

Nikoqirë të Akademisë për kolonelin Ahmet Krasniqi, kësaj here ishin Nëndegët e LDD-së nga Bielefeld-i, Stukenbrock-u dhe Bünden-i , në bashkëpunim me kolegët e kolonelit , ish pjestarë të formacioneve ushtarake nga shtabi suprem i Forcave të Armatosura të Republikës së Kosovës (FARK) , me qëndrim në Diasporë.
Në akademinë për kolonelin Ahmet Krasniqi, krahas aktivistëve të LDD-së nga Gjermania , kolegëve të kolonelit , ish pjestarë të formacioneve ushtarake, morën pjesë edhe përfaqësues të partive kosovare që veprojnë në Evropë dhe të rinjë e të moshuar me qëndrim në Gjermani si dhe familjarë të familjes Krasniqi të rinjët; Hajriz Krasniqi dhe Besart Krasniqi.

Pas intonimit të himnit kombëtar , himnit të Dardanisë dhe atij të Kosovës , akademinë e shpalli të hapur aktivisti, Sali Berisha, nëkryetar i nëndegës së LDD-së për WRV.I cili
tha se përmes akademisë mëtojmë ta vëjmë në spikamë atë ngjarje makabër, sepse për një kohë u përmbysën ëndërrat, idealet dhe shpresat e shqiptarëve të Kosovës për ngritjen e një ushtrie moderne e profesionale e cila më së miri do t’u përgjigjej nevojave të luftës çlirimtare.

Muharrem Maliqi, kryetar i Nëndegve të LDD-së për Bielefeld, Stockenbruck dhe Bünden, në fjalën përshëndetëse në emër të nikoqirit, ka thënë: Kur në njëren nga Demonstratat e shumta që mbaheshin në Bon ,mësuam nga ish Kryeministri i Kosovës Bujar Bukoshi, se kishte emruar ministrin e mbrojtjes ne u gëzuam shumë , sepse kishim shpresen se Kosova do të çlirohej shpejtë, por lajmi për vrasjen e tin na pat piklluar shumë !

Në fjalën e rastit, Hilmi Gashi, kryetar i kryesive të Nëndegëve të LDD-së në Westfalinë e Rinit Veriorë (NRW), dhe ish epror ushtarak në Ministrinë e Mbrojtes të Republikës së Kosovës, pasi iu dëshiroi mirëseardhje pjesëmarrësve në akademi, ka theksuar:
U bënë dhjet vite, kur dora e zezë e tinzare i mori jetën, Ministrit, dhe strategut të artit ushtarak, kolonel Ahmet Krasniqit, dhe la familjen Krasniqi pa vëllanë, nipin, xhaxhain dhe babanë e dashur, la ushtarakët dhe kolegët pa Komandantin dhe udhëheqësin e tyre, la Kosovën dhe popullin shqiptar, pa një Shtatmadhor, dhe pa një Kolonel me aftësi dhe trimëri që rrallë kush mund ta kishte si Ahmet Krasniqi. Plumbi i drejtuar në drejtim të trupit të Kolonel Ahmet Krasniqit, nga dora e zezë e tradhëtare, ndërpreu dëshirën dhe vullnetin e Kolonelit për forcimin e mëtejmë të forcave të Armatosura të Republikës së Kosovës dhe lirimin e Kosovës, nga pushtuesi serbosllav. Ndërpreu udhëheqjen Komanduese dhe disciplinën në shtabin e përgjithëshëm të Forcave të Armatosura të Republikës së Kosovës. Ndërpreu rrugën e nisur qysh moti për lirimin e Kosovës, nga i pa harruari Aziz Zhilivoda, xhaxhai i Kolonel Ahmet Krasniqit, e që me siguri i kishte lënë edhe amanet që të vazhdojë, realizimin e aspiratave shekullore të popullit shqiptar, respektivisht popullit Kosovar. Familje me traditë që dha gjithmonë kontribut, dhe gjak për Kosovën tonë të dashur e të respektuar.Dora e zezë tinzare, i mori jetën Ahmet Krasniqi, i ndërpreu dëshiren që kishte për realizimin dhe përmbushjen e misionit të tij për Kosoven, dhe popullin e saj, por nuk mundi ta shuajë jetën dhe veprën e strategut të luftës kolonelit Krasniqi. Prandaj ne përkulemi me respekt para veprës dhe familjes së kolonel Krasniqit, dhe para të gjithë atyre që luftuan dhe ranë në altarin e lirisë ; si , Sali Çekaj e Agim Ramadani e shumë të tjerë.

Nga kjo Akademi përkujtimore kushtuar ish Ministrit të Mbrojtjes së Republikes së Kosovës kolonel Ahmet Krasniqi, iu drejtohemi edhe një herë organeve Shtetërore të Republikës së Kosovës; Presidentit Fatmir Sejdiu dhe Kryeministri Hashim Thaqi, që me ceremoni Shtetërore të barten eshtrat e kolonelit Ahmet Krasniqit, dhe të bëhet rivarrimi i tij në tokën që aq shumë e deshti për të cilën dha edhe jetën e tij. Njëherit nga organet Shtetërore të Republikes së Shqipërisë, Presidenti Bamir Topi dhe Kryeministri Sali Berisha, kërkojmë zbardhjen e rastit, dhe kërkojmë që aktorët e atij krimi të shëmtuar të marrin dënimin e merituar“ .

Sami Kutllovci,kryetar i Forumit Rinor të LDD-së, në WRV- duke folur rreth jetës së ish Ministrit Ahmet Krasniqi, ka thënë :
“Kolonel Ahmet Krasniqi ,u lind më 15 Janar 1948 në Zhilivodë, në kohën kur familja e tij ishin të internuar në Vushtrri. U lind nga një familje me tradita të qëndresës kundër pushtuesit serbosllav. Jeta e Kolonel Krasniqit dhe familjes së tij ishte e rëndë, por krenaria Kombëtare ishte e madhe. Shkollen fillore e kreu në vendlidje, duke vazhduar në shkollen e mesme Teknike „19 Nëntori”, në Prishtinë. Frymëzimi për patriotizëm dhe atdhedashuri i Ahmetit ishte lufta e xhaxhait të tij Aziz Zhilivodës, si dhe vuajtjet që përjetoi Familja e tij nga dhuna dhe diktatura e sistemit jugosllav.Kolonel Ahmet Krasniqi, si nxënës i shkollës së mesme teknike, mori pjesë aktive në demostratat e zhvilluara në vititn 1968 në Prishtinë.
Pas përfundimit të shkollës së mesme, vendosë të regjistrojë akademinë ushtarake, që një ditë të jetë i përgaditur të ndihmojë çlirimin e Kosovës si një strateg i artit ushtarak.

[Urata]

Kolonel Ahmet Krasniqi ishte autor i shumë punimeve dhe studimeve shkencore në lëmin e artit ushtarak.Karriera në armatën jugosllave ishte përplot barriera dhe pengesa, Nençmimi i aftësive të tij profesionale dhe degradimi që përjetoi iu bënë vetëm pse ishte shqiptar, si dhe për shkak të pjesëmarrjes në demostratat e vitit 1981, të vëllaut të tij Bexhet Krasniqi. Kolonel Ahmet Krasniqi punoi më përkushtim të madh për të koordinuar aktivitetin e eprorëve me qeverinë e Republikës së Kosovës që nga viti 1993 e sidomos me emrimin e tij Ministër i Mbrojtjes së Republikës së Kosovës. Kolonel Ahmet Krasniqi në vitin 1998 me profesionalizëm filloi ngritjen dhe forcimin e bazave ushtarake të Republikës së Kosovës, gjë e cila do ti ipte grusht dhe goditje të fortë, forcave serbe. Kolonel Ahmet Krasniqi, si Ministër i Mbrojtjes dhe Komandant i Forcave të Armatosura të Republikës së kosovës, punoi me përkushtim për institucionalizimin e ushtrisë dhe unifikimin e faktorit ushtarak dhe atij politik. Rezultatet e punës së Kolonel Ahmet Krasniqit, aftësia, guximi, vendosshmëria për Kosovën dhe profesionalizimi i UÇK-së, i sollën vdekjen nga dora tinzare, me datën 21 shtator 1998 pikërisht në mesin e Tiranës, para Kryeministrisë së Shqipërisë dhe afër Sheshit qendror.
Kolonel Krasniqi, gjatë veprimtarisë së tij në Shqipëri, ballafaqohej me shumë vështirësi, duke u kontrolluar dhe penguar disa herë nga organet e rendit shqiptar, si në Tirane, Tropojë e Kukës, ashtu edhe në vende tjera. Kolonel Krasniqi të gjitha pengesat që kishte i përballonte dhe i tejkalonte me shpresë se një dite do të kanalizohen gjërat dhe do të futen në një binar, por fatkeqsisht dora tinzare ia mori jetën dhe dëshira e tij, për ate që punoi, nuk u realizua. Pra 1. formimi i një Ushtrie Çlirimtare të Kosovës me një Shtab e një Komandë dhe me një disciplinë ushtarake siç i ka hije një Ushtrie të një Shteti, 2. Çlirimin e Kosovës nga pushtuesi serb, dhe, 3. formimin e Shtetit të Kosovës” .

Telegrame përshëndetëse akademisë i kanë arritur nga Hafiz Gagica Kryetar i kryesisë së LDD-së në Gjermani dhe anëtar i kryesisë qendrore të LDD-së, si dhe Agim Mehmeti ish zëvendës i Minstrit të Mbrojtjes së Kosovës.

- - - - - - - - - -

Aktivisti, Sali Berisha, ka lexuar telegramin nga Agim Mehmeti ku thuhet:
“Kolonel Ahmet Krasniqi – ky kolos i kombit ! U bënë plot dhjetë vite që kur plumbat e tradhëtisë u zbrazën në trupin e atdhetarit, ushtarakut dhe Kolonelit Ahmet Krasniqi. Kosova mbeti pa Ministrin e parë të Mbrojtjes, ne mbetëm pa shokun dhe kolegun tonë të shtrenjtë, familja e tij pa më të dashurin e vet. Kolonel Ahmet Krasniqi, për shumicën e shqiptarëve, është një figurë historike e kalibrit të Gjergj Kastriotit – Skenderbeut.
Strateg dhe vizionar i pashoq i artit ushtarak, i lindur në kohët më të vështira në të cilat kalonte kombi, në një familje shumë të shquar të Zhilivodës patriotike, i rritur me sakrifica dhe varfëri, i përndjekur dhe i përbuzur, ia doli të kryente shkollat më të larta në armatën jugosllave. Kur flakët e luftës e përfshinë Slloveninë, Kroacinë dhe Bosnën, ai e ndihmoi Kroacinë në ngritjen e ushtrisë së saj, pa u inkuadruar në majat e pushtetit dhe ushtrisë kroate, sepse synim e kishte popullin e vet dhe Kosovën. Në atë pritje, atij iu desh që të mbijetonte. Kreu punë të vështira nëpër Kroaci, si punëtor krahu, duke u përkujdesur për familjen, në veçanti për shkollimin e fëmijëve Teutës dhe Florentit. Kur flakët e luftës iu afruan Kosovës, ai nuk u hamend dhe pa asnjë hezitim iu përvesh punës në organizimin e Forcave të Armatosura të Republikës së Kosovës.
Me fillimin e shpartallimit të Jugosllavisë, pjesa e ndërgjegjshme e oficerëve shqiptarë, braktisi armatën jugosllave. Pjesa dërmuese e tyre u strehua në Zvicër dhe Gjermani. Prej vitit 1991, edhepse në rrethana të vështira, herë me mbështetje nga Qeveria në egzil, e më shpesh pa mbështetjen e saj, me një ndërgjegje dhe përkushtim të pamohueshëm, oficerët shqiptarë në këto shtete, me mbeshtetje edhe nga kolegët e tyre në shtet tjera, iu përveshën punës në organizimin e Sistemit të Mbrojtjes së Kosovës. Përkundër kushteve të vështira të veprimit, u bë një punë e mirë dhe me fillimin e rezistencës së armatosur në Kosovë, erdhi momenti i shumëpritur që të kryheshin veprimet e para taktiko-operative në terren. Me kalimin në shkallë më të lartë të veprimeve, duke i studiuar dhe vlerësuar rrethanat e përgjithshme, posaqërisht duke vlerësuar realisht potencialin e armikut, vendosëm që detyrën e ushtarakut më të lartë të Forcave të Armatosura të Republikës së Kosovës t´ia besonim Kolonel Ahmet Krasniqit, gjithnjë duke u bazuar në përgaditjen e tij profesionale, të kaluarën patriotike të tij, dhe të familjes së tij, e në veçanti përkushtimit të tij për të luftuar deri në sakrificë. Vlerësimi dhe vendimi ynë ishte me vend dhe shumë i qëlluar. Ishim të bindur se me Kolonel Ahmet Krasniqin do të ndërtonim një ushtri moderne çfarë i nevojitej Kosovës.
Në pranverën e vitit 1998, Kolonel Ahmet Krasniqi, së bashku me shumicën e bashkëpunëtorëve, kaloi në Shqipëri me qëllim fuqizimin e Forcave të Armatosura. Vështirësitë që haseshin në Shqipëri nga grupe të llojllojshme, sabotimet e përditshme dhe sistematike që bëheshin, nuk na trembnin. Por, siç dëshmoi koha më vonë, përkunder përpjekjeve sistematike të Kreut të Shtabit të Ministrisë së Mbrojtjes për sistemimin dhe unifikimin e rezistencës ushtarake, gjërat me kalimin e kohës morën rrugë jo të mbarë. Shantazhet, sabotimet, shpifjet, pengesat, kërcnimet me likuidime, na u bënë përditshmëri. Në ato kushte dhe rrethana, qe bërë i pamundur kalimi në faza më teë larta të organizimit të Forcave të Armatosura të Republikës së Kosovës. Vetëm vullneti i madh, obligimi dhe dashuria ndaj popullit dhe atdheut, na shtynin pandërprerë që të bënim lëshime dhe sakrifica, të cilat asnjë ushtarak i shkolluar, i asnjë ushtrie në botë, as në rrethana lufte e as në rrethana paqeje nuk do t´i bënte. Përkundër lëshimeve të shumta, të cilat bëheshin me qëllim unifikimi dhe ndergjegjesimi të njerëzve, pasi ishim para rrezikut të çfarosjes totale të qenies sonë biologjike, një pjesë jo e ndërgjegjshme e njerëzve, tentonin dhe vepronin parreshtur në shkatrrimin e Institucionit të Ministrisë së Mbrojtjes, me qëllim të dominimit të tyre në skenën politike dhe ushtarake. Kur gjitha ato trysni nuk bënë punë, ndaj stafit udhëheqës të Ministrisë së Mbrojtjes u aplikuan planet vrastare antikombëtare, e në veçanti ndaj Kolonelit tonë Ahmet Krasniqi. Fatkeqësisht, ato plane ogurzeza të përpiluara në kuzhinat më antikombëtare, dreqi e merr vesh prej sa e sa shërbimeve, u realizuan me ekzekutimin e Kolonel Ahmet Krasniqit, para 10 viteve, më 21 nëntorë të vitit 1998, në zemër të Tiranes, para syve të Shërbimit Intelegjent të Qeverisë shqiptare.
Me vrasjen e Kolonel Ahmet Krasniqit u zvoglua mundësia për ngritje në nivel të lartë të një force moderne ushtarake të Republikës së Kosovës. Fatkeqësisht, me vrasjen e tij shumë gjëra morën tatëpjetën. Kaluan dhjetë vite. Ekzekutorët dhe urdhërdhënësit e ekzekutimit të Ahmet Krasniqit nuk u zbuluan për t´u gjykuar dhe për të marrë dënimin meritor. Shumë gjëra kanë mbetur pezull. Një nxjerje para drejtësisë të kriminelëve. Shkruarja e drejtë e historisë, do të lehtësonte sadopak dhembjen për humbjen e Kolonel Ahmet Krasniqit. Shpresojmë se drejtësia e shtetit shqiptar do të nisë procedurën për zgjidhjen e kësaj vrasje të kryer nga tradhëtarët e kombit. Me një gjykim të drejtë, shumë gjëra, shumë paturpësi, shumë tradhëti, do të dalin në siperfaqe dhe populli do të ketë një pasqyrë të vërtetë të rrjedhave të përgjithshme të kohës së luftës, sepse historia me gënjeshtra, mashtrime e krime nuk shkruhet. Emri dhe vepra e Kolonel Ahmet Krasniqit do të shkruhen me shkronja të arta në historinë e popullit shqiptar ».

- - - - - - - -

Për të pranishmit në fund u shfaq një film ekskluziv dokumentar nga fjala përshëndetëse e Ahmet Krasniqi si kryetar i Bashkësisë Shqiptare në Rovinj, në festat e Nëntorit , organizuar nga bashkatdhetarët me qëndrim në Rovinj në vitin 1996 , përgatitur nga “ Studio Rini “ në Bon .

[Urata]

[Urata]

Agim Gashi: Ahmet Krasniqi Kolonel
E Hene, 15-09-2008, 05:02pm (GMT)



Ahmet Krasniqi
Agim Gashi
Ahmet Krasniqi KOLONEL

Në përvjetorët e rënjës së Kolonel Ahmet Krasniqit

U ngrys qielli n´at nat´ me hanë,
Krisi pushka në Tiranë,
Ogurzit edhe nji herë
Na e vran nji Kolonel.

U ngreh gishti i tradhëtisë
Dridhen malet nga termeti
Tue ja krye borgjin Kosovës
N´kry detyres ra Ahmeti.

Në Tiranë u vra Ahmeti
Ku ashtë besa e ku ashtë nderi,
Për nder të tij e për trimni,
Mbi Shqipni ka ra Ylberi.

O Ylber o i perëndisë
Që mban shpirt e kolonelin,
Që gjithëherë mallkon tradhëtinë
Shqipënisë po falja nderin.

Moj Shqipni moj diell e hanë
Je ba qerdhe e tradhëtisë,
N´ty sundon krimi e dhuna
T´ka humbe qehrja e bukurisë.

Ska mendu Ahmet Krasniqi,
Që nji ditë do ti bahesh varr,
Ai t´ka dashtë porsi Kosovën,
Në ty ishte njeri i gjallë.

Tash mbi qiellin e Shqipnisë
Nuri i tij shendrit si zjarr
Bashkë me shpirtin e Azemit
Të urojnë një dritë të bardhë.

[Urata]

Nebil Çika: Krasniqi, vrasja e pazbardhur e një heroi
E Merkure, 24-09-2008, 12:50pm (GMT)



Heroi i Kosovës - Ahmet Krasniqi
Krasniqi, vrasja e pazbardhur e një heroi

Nga Nebil Çika

Më mirë vonë sesa kurrë. Presidenti i Republikës së Kosovës ka nderuar dje me titullin “Heroi i Kosovës” ish-ministrin e Mbrojtjes së Kosovës, Ahmet Krasniqi, një nderim që me gjithë vonesën e patolerueshme, është sa i merituar aq edhe domethënës. Rasti i dekorimit të Krasniqit përbën një moment të veçantë në shkrimin, perceptimin dhe interpretimin e historisë së kombit shqiptar dhe kontributit të individëve në momentet kulmore të saj. Por nuk mendoj se një medalje pavarësisht vlerës së saj të padiskutueshme është e mjaftueshme për të vënë në vend nderin e një heroi vrasja e të cilit është ende një enigmë. Mendoj se nderi me i madh që mund t’i bëhej heroit Krasniqi dhe gjithë luftës historike për çlirimin e Kosovës do të ishte zbardhja e vrasjes së tij. Autoritetet e Kosovës dhe ato të Shqipërisë duhet të ndihen të turpëruar që janë të detyruar të nderojnë e të respektojnë një hero, ndërkohë që të paktën publikisht, nuk kanë kanë treguar as vullnetin më të vogël për vrasjen e tij. Ahmet Krasniqi u vra dhjetë vjet më parë në rrethana tejet të dyshimta ku u përfolën si autorë të mundshëm institucione të sigurisë kombëtare shqiptare në bashkëpunim me kundërshtarët politikë të Krasniqit në Kosovë. Nuk u vra në Prishtinën e pushtuar nga serbët, as në Beograd, por në qendër të kryeqytetit të Shqipërisë, në Tiranë, nën mbrojtjen e garantuar të shtetit shqiptar. Dihet publikisht që nuk u vra ,të paktën fizikisht, nga serbët. Koha në të cilën Krasniqi u vra ishte një periudhë e dominuar nga krimi politik shtetëror e denoncuar politikisht dhe publikisht nga opozita e asaj kohe. Vrasja e Krasniqit pasoi vrasjen e Azem Hajdarit dhe vrasjet apo arrestimet e një sërë ish-zyrtarësh të shtetit, sidomos të atyre që kishin punuar në institucionet e sigurisë kombëtare dhe përbën segmentin kohor e historik sa të zymtë, aq edhe enigmatik të periudhës post-komuniste të Shqipërisë. Por të kthehemi tek rasti Krasniqi. Në një shkrimin tim për problemet e drejtësisë rreth dy vjet më par,ë e kam radhitur zbardhjen e vrasjes së zotit Krasniqi si një nga detyrimet kryesore të drejtësisë shqiptare në mënyre të veçantë të prokurorisë. Natyrisht që në periudhën para ndryshimeve në krye të drejtësisë në gjë e tille ishte pothuaj e paimagjinueshme për shkak të përfshirjes së përfolur të drejtuesve apo segmenteve të institucioneve shtetërore të Shqipërisë. Por është në të njëjtën masë, e patolerueshme që edhe pas ndryshimeve në kreun e drejtësisë dhe sidomos të prokurorisë që zbardhja e një krimi me përmasa e implikime kaq të mëdha vazhdon të jetë ende një tabu për drejtësinë shqiptare. Kemi vene re që prokuroria këmbëngul për zbardhjen e krimeve nga më ordineret e banalet të ndodhura vite me parë, por vrasjen e një ministri, tani edhe një heroi, nuk guxon as ta përmendë as si statistikë e krimeve të pazbardhura. Nuk duket se ka ndonjë gjasë që prokuroria të ndërmarrë një iniciativë të tillë, megjithëse është detyre kushtetuese e saj, por politika në Prishtinë dhe Tiranë e ka detyrimin, por edhe mundësinë të kërkojë zbardhjen e këtij krimi. Zbardhja e vrasjes së Krasniqit dhe shumë krimeve politike në Shqipërinë e pas 1997-s përbën pa dyshim bazën e realizimit të dekriminalizimit të drejtësisë dhe institucioneve të tjera shtetërore, një angazhim politik e elektoral i mazhorancës së djathtë dhe Kryeministrit Berisha. Zbardhja e vrasjes së Krasniqit mendoj se është një detyrim politik e kombëtar edhe i politikës së djathtë në Kosovë në mënyrë të veçantë për Presidentin Sejdiu dhe LDK-në si parti në qeverisje. Mbase nuk kam informacionin e nevojshëm, por nuk kam dëgjuar qoftë edhe një herë të vetme që autoritetet e Kosovës t’u kenë kërkuar homologëve shqiptarë zbardhjen e këtij krimi. Mbase kanë qenë shumë të zënë me çështje të tjera më të mëdha, por momenti i dekorimit të të ndjerit Krasiniqi mund të kishte shërbyer për t’u kujtuar për zbardhjen e vrasjes së tij. Zbardhja e kësaj çështjeje është një detyrim më tepër se ligjor, politik, moral e njerëzor, është një detyrim kombëtar. Jo vetëm për të marrë vesh shkaqet dhe autorët e vrasjes, por edhe për të parë se ku janë sot ata. Mund të jenë deputetë e ministra, pjesëtarë të policisë apo shërbimeve sekrete në Shqipëri e Kosovë, mbase kanë qenë edhe në ceremoninë e dekorimit të Krasniqit “Hero i Kosovës! Në kushtet e moszbardhjes së krimit ata mund të jenë kudo në institucionet tona politike e shtetërore, të gatshëm për t’u dhënë shqiptarëve “heronj” të tjerë. Megjithatë, si shqiptar, ndihem mirë për nderimin e Krasniqit .Mirëpo .... ku(sh) janë vrasësit e heroit ?!

[Urata]

PERSONALITETE



Ahmet Krasniqi, dhjetë vite larg
E Diel, 21-09-2008, 08:00pm (GMT)



Ahmet Krasniqi
Agim Gashi
Dhjetë vjetë pa Kol. Ahmet Krasniqin

Këngë për
Ahmet Krasniqin


S´u skuq Bari as Selaniku
Kur nji trim nga jeta iku,
Iku trimi nën hije t`Nanës
Kur e vranë në mes Tiranës.

Tash sa vjet për kob t`Shqipnisë
Shprazen plumbat e tradhtisë,
Si në gjoks t`Hasan Prishtinës
Të Ramë Bllacës, Ahmet Shtimes.

Djalë kreshnik bir i Kosovës
Kishte gjak t`Aziz Zhilivodës
Kishte besën që kurrë s`e prishi
Koloneli Ahmet Krasniqi.

II.
Njiqind vjet nën kamë t`Serbisë
Dergjen krahët e Shqipnisë,
Dergjet koka që kurrë s`duron
Kah len dielli e perëndon.

Se mbi malet e Qyqavicës
Ngjiten trimat e Drenicës,
Shpërthejnë plumbat e lirisë
Tek ia kthejnë pushkën Serbisë.

Djalë kreshnik bir i Kosovës
Kishte gjak t`Azis Zhilivodës,
Kishte besën që kurrë s`e prishi
Komandanti Ahmet Krasniqi.

III.
O Ahmet, Ahmet Krasniqi
Gjoksin tand po kush e prishi,
Kush të vrau midis t`Shqipnisë?
- Do djem t`ligj- klysh të Serbisë.


Si kur vritet Bajram Curri
Gjon Serreqi kur thehet guri,
Si kur vritet pa i dalë fjala
Trimi ynë Jusuf Gërvalla.

Djal Kreshnik bir i Kosovës
Kishte gjak t`Aziz Zhilivodës,
Drejt Koshares e drejt Pashtriku
Ndër sy trimash Ahmet Krasniqi.

-----------
Në dhjetë vjetorin e vrasjes

Ahmet Krasniqi, dhjetë vite larg

Krasniqi ishte një njeri që e mirëkuptonte qëndrimin e shtetit shqiptar dhe të qeverisë së tij, të cilët duhej të respektonin marrëveshjet ndërkombëtare

Nga Ylli Polovina

Azem Hajdari e humbi jetën në qendër të Tiranës, në 12 shtator 1998, në orën 21.15. Nga efektet që prodhoi mbi historinë tonë ajo është thirrur, mbase me pak teprim dashamirës, si “vrasja e shekullit“. Nuk mund të quhet kurrsesi fat një vdekje, ca më tepër me në trupin e gruas grëmbin e një fëmije në prag të daljes në jetë, por njohja e madhe që kishte opinioni për personin dhe pasojat e dukshme që shkaktoi, i dhanë asaj shumë reliev. Ka ndodhur krejt ndryshe me një vrasje tjetër, të ngjarë nëntë ditë më pas, në 21 shtator, pak para se të binte mesnata. Edhe kjo vrasje u krye në një zonë kryesore të Tiranës. I godituri me plumba quhej Ahmet Krasniqi dhe qe shqiptar nga Kosova. Ishte një ushtarak profesionist me gradën kolonel. Kryente funksionin e Ministrit të Mbrojtjes së vendit të vet.

Ndërsa me Azem Hajdarin koha gjëmoi, me jetëhumbjen e Ahmet Krasniqit ndodhi e kundërta: pati fare pak jehonë. Kur një ngjarje nuk gjëmon si vullkan që në çastin kur ndodh e ka shumë të vështirë më pas të zërë vendin e saj real në histori. Sepse është i mbajtur disi larg nga kujtesa jonë u bë ky shkrim, aspak i vetmi dhe asnjëherë i fundit.

[Urata]

Njeriu që lindi në burg

Familja e Ahmetit ka qënë ndër më të njohurat në Kosovë në përkushtimin për lirinë e viseve të saj, po ashtu mjaft e dashuruar edhe me Shqipërinë. Zhilivodët, siç janë mbiemri rrënjë i fisit të tyre, e mëkuan njëri-tjetrin që nga djepi e deri sa u përcollën me këtë jetë, me Kosovë e Shqipëri që të qenë si dy krahët e një shqiponje. Po të thyhej njëri prej tyre shpendi simbol i kombit nuk çohej dot në qiell.

Xhaxhai i Ahmet Krasniqit, Aziz Zhilivoda, gjatë luftës së dytë botërore dhe pas saj ka qënë ndër atdhetarët më të spikatur të trevave të tij. Edhe pse vinte nga ajo që në Kosovë gjatë Luftës së Dytë Botërore quhej parti e Ballit Kombëtar (pas vitit 1944 thirrej Nacional Demokratike), mospajtimi ideologjik me regjimin e Tiranës nuk e pengoi, pas një ilegaliteti aktiv në Jugosllavi, në vitet pesëdhjetë të kapërxente kufirin dhe të jetonte në Shqipëri gjersa në fillim të viteve nëntëdhjetë ndërroi jetë. Aziz Zhilivoda qe një ndër ta, të paktën gjer në vitet 1972-73, që hyri në Kosovë disa herë me misione kombëtarie. Ishin disa të një grupi nacionaldemokrat, të cilët të strehuar në Shqipëri për t’i shpëtuar përndjekjes serbe, shkonin në trevat e vendlindjes për të vënë në vend ndonjë borxh që disa përdhunues serbë e kishin ndaj popullit të tyre. Kryenin atentatin kokëkrisur dhe tërhiqeshin në tokën shqiptare. Më pas ndodhi që nga autoritetet e Tiranës Azis Zhilivoda u arrestua, u dënua me dhjete vite burg, prej të cilave bëri vetëm një pjesë.

Nipi i këtij njeriu gjysmë legjendë, Ahmet Krasniqi, do ta niste jetën po ashtu, përtej reales, si në gojëdhënë kreshnikësh. Ai lindi në burg. E kishte mbiemrin Zhilivoda, si të prindërve të tij.

Në bodrume autoritetet serbe i mbanin të izoluar familjen. Kështu ai qe i prangosur akoma në barkun e nënës, ende jetë pa nisur. Në ato qeli do të ndodhte që të jatin t’ja mbytnin me torturën e futjes së tubit të ujit në gojë dhe njëkohësisht shtypjen e barkut me goditje të forta të këmbëve. Kur një krijese njerëzore që kur është foshnjë i shtypet dhe i gjymtohet dëshira për liri cilën gjë tjetër veç kërkimit për ta gjetur atë do ta ketë mision jete?

Ahmet Krasniqi e përfundoi shkollën e mesme në Vushtri dhe më pas në Prishtinë pa e hequr nga e gjithë qënia e tij detyrën e madhe të shpëtimit në liri, çka donte të thoshte çlirimin e Kosovës. Në shpërthimin e madh, në demonstratat e furishme të vitit 1968, ai u rreshtua në grupin e patriotit me famë Metush Krasniqi, njërit ndër organizatorët më kryesorë të tyre. Ishte porosia e këtij të fundit që e bëri Ahmetin të zgjidhte dhe hidhte hapin vendimtar që duhej të bënte. Ai u regjistrua në Akademinë Ushtarake të Beogradit. Këtu nuk vinte dot me mbiemrin Zhilivoda. Për të mos u bërë nga autoritetet e shkollës i diktueshëm lehtë dhe i dëbueshëm hodhi mbi vete mbiemrin Krasniqi, të cilin në Kosovë e kishin dymbëdhjetë fise, pra me mijra shqiptarë.

Për njeriun e lindur në burg e ku po në burg i patën vrarë të jatin nuk kishte zgjidhje më të mirë për ta shpëtuar Kosovën dhe veten se sa përgatitja profesionale si ushtarak karriere. Ishte koha kur grupet ilegale të rezistencës kundërserbe në Kosovë, Jugosllavi dhe kudo tjetër organizuan për qëllim të luftës së ardhshme çlirimtare, dërgimin e studentëve shqiptarë mjaft të talentuar e të fortë fizikisht të mbaronin akademitë ushtarake në Beograd, Zagreb e kudo ku qenë, por mundësisht më pas të realizonin të gjitha kualifikimet më të larta të këtij profesioni. Po ashtu grupet ilegale të rezistencës këshillonin ngjitjen e këtyre oficerëve në të gjitha shkallët e karrierës.

Në vitin 1981, kur ndodhi shpërthimi i dytë i madh i protestave, Ahmet Krasniqi qe tashmë oficer në garnizonin “Marshall Tito” në Zagreb. Vala e madhe e demonstratave të shqiptarëve të Kosovës, e cila kësaj radhe tronditi edhe tërë kontinentin, përfundoi me burgosjen e vëllait të vetëm të tij, Behxhet Krasniqit. Ngjarjen autoritetet beogradase nuk ia falën: e transferuan për në Gospiç, ku kishte pak ushtarë dhe mjaft armë. Dhjetë vite më pas, më 1991, gazerma ‘’Kanjizha’’, ku Ahmet Krasniqi tashmë ishte bërë komandant, kishte nga 10.000 deri 12.000 tyta këmbësorie të kalibrave të ndryshëm. Po ashtu artileri të mbrojtjes kundërajrore dhe kamiona transportues.

Kishte nisur thërmimi i federatës artificiale të jugosllavëve. Pas shkëputjes së Sllovenisë filloi lufta për mëvetësim të Kroacisë. Koloneli Ahmet Krasniqi ishte ndër kryesorët që bëri gjestin e rreshtimit jo me Beogradin e Sllobodan Millosheviçit, por me popullin kroat. “Kanjizha” ishte baza më e madhe e armëve në atë rajon dhe prej saj iu shpërndanë në front për vetmbrojtje të gjitha njësive ushtarake kroate mbi pesë mijë gryka zjarri të kalibrave të ndryshëm.

Këtë veprim bashkëpunëtorët e Sllobodan Millosheviçit nuk do t’ja falnin. Si pasojë e një kurthi ata e shtinë në dorë kolonelin shqiptar. Prej vjeshtës 1992 e deri kur nisi viti 1994 mbi fatin e tij godasin pabesi nga më tinzaret. Pasi serbët e arrestuan gjyqi i Armatës Popullore Jugosllave zgjati vetëm 12 minuta. Nuk u lejua të lexohej aktakuza e jo më t’i jepej mundësia për vetmbrojtje. Këshillimi i gjyqtarëve për dhënien e vendimit, ku përveç serbëve nuk mungonin as disa kroatë, zgjati vetëm tre minuta. Në pesëmbëdhjetë minuta proçes u dënua me dy vite burg. Për fat nuk i bëri të gjithë, sepse nëpërmjet shkëmbimit të të burgosurve, madje me rastin më të parë, kroatët u kërkuan serbëve t’u jepnin Ahmet Krasniqin. Kështu u kthye në Zagreb.

Këtu në fillim e lanë me shprehjen e mirënjohjes nëpërmjet shkëmbimit, duke e shpëtuar patjetër nga ndonjë eliminim fizik brenda burgut, por më pas përkujdesja për të ra. Nuk iu afrua punë. Kthimi i vëmendjes për njeriun që kishte kryer veprën e dorëzimit të gazermës së Gospiçit erdhi më pas, kur i propozuan detyra ushtarake. Me një ndjenjë pezmi i refuzoi të gjitha, por pa u ankuar. Ahmet Krasniqi ishte ushtarak dhe moral bashkë. Ai i donte kroatët dhe i tillë mbeti gjer në fund të jetës. Edhe gruaja e tij, Sllobodanka, edhe pse ishte serbe, qe e lindur në atë vend.

Për tre vite rresht e ndoshta më shumë se kaq koloneli profesionist i kaloi pothuaj në mjerim të thellë. Për muaj të tërë i papunë në Zagreb i ndodhi që uria t’i merrte fuqinë për të lëvizur, madje pati edhe ndjenja të fikti. Gjeti një çast punë si gurëthyes. Bëri atë zanat të rëndë gjersa disa miq të tij shqiptarë i ofruan një vend më të qetë, edhe pse jo të paguar sa kishte nevojë. Kishte dy fëmijë, Teutën dhe Florentin. Puna e re qe ajo e rojtarit të tregut të specave dhe bananeve në Rovinj.

E dhimbshme jeta e kolonelit deri sa në kapërcyell të viteve 1997-98 në Zvicër u mblodhën në një takim sekret mbi dyqind ushtarakë shqiptarë të ish-Armatës Popullore Jugosllave për të zgjedhur, me dëshirë të presidentit Ibrahim Rugova dhe kujdes të qeverisë Bukoshi, shtabin e luftës së armatosur për çlirimin e Kosovës. Në këtë kuvend Ahmet Krasniqin e zgjodhën njëzëri Ministër të Mbrojtjes. Koloneli u vlerësua nga kolegët e tij si grada më e lartë aktive që pati shërbyer me këmbësorinë. Kërkoheshin njerëz që kishin luftuar në terren dhe jo nga ata që artin ushtarak e patën dhënë vetëm në leksione. Këto cilësi Ahmet Krasniqi e plotësonte më mirë se kushdo nga pjesëmarrësit e takimit sekret të Zvicrës. Tani koha nuk priste, madje për njerëzit e Ibrahim Rugovës ajo po ecte tepër ngadalë dhe po rrezikohej të mbetej pas, duke dështuar në çastin më kyç. Pjesa dërmuese e popullit e patën kuptuar se tashmë kishte ardhur ora e kundërshtimit me armë. Në ditët e para të prillit 1998 Ahmet Krasniqi erdhi në Tiranë. Kishte mbushur dyzetë e shtatë vjeç. Ndoshta nuk ishte vonë për t’u shmallur me vendin amtar të cilin e donte aq shumë. E kishte patur ëndërr që kur kishte lindur. Në aeroportin e Rinasit, sapo zbriti, tokën e preku lehtësisht me pëllëmbën e dorës. E përkëdheli disa çaste, aq sa iu bënë të domosdoshme për të përmbajtur ngashërimin.

[Urata]

Në Tiranë, legal dhe ilegal

Në ditën e tretë të mbërritjes kërkoi të takohej me Flamur Gashin, një bashkëkombas, jeta e të cilit dhe e prindërve të tij ishte mëkuar për afro treçerek shekulli me vite të shumta në Kosovë dhe po kaq edhe në Shqipëri. Gashin e gjykonte si personin referues për njohje dhe takime të rëndësishme në kryeqytetin shqiptar. Ai qe këshilltar i Ministrit për Informatat të qeverisë Bukoshi dhe zotëronte lidhje me të gjitha krahët e politikës së Tiranës.

Me një shtat të gjatë e të bukur, me mustaqe të lehta e lëvizje hamonike të një trupi prej atleti, Ahmet Krasniqi u paraqit në takim në orën e caktuar, tre e pasdites, tek restoranti “Nëna Mbretëreshë”. Ndryshe nga pamja prej oficeri të mirëfilltë karriere, i pafjalë, i prerë dhe hijerëndë, tek i rrije afër koloneli dukej qënie mjaft e butë.

Të dy takoheshin për herë të parë dhe pinë kafe duke biseduar për çdo gjë, por jo për ushtrinë. Gjithçka më pas rodhi me shpejtësi. Krasniqi i vendosi lidhjet e nevojshme me ata që do t’i duheshin çështjes së kryengritjes së armatosur për çlirimin e Kosovës. Nisi mesazhe edhe drejt Kryeministrit shqiptar, po ashtu edhe për Ministrin e Mbrojtjes.

Ahmet Krasniqi ishte një ndër ata që e mirëkuptonte qëndrimin e shtetit shqiptar dhe të qeverisë së tij, të cilët duhej të respektonin një mori të pafund marrëveshjesh ndërkombëtare për mosprekje të sovranitetit të shteteve të tjera dhe se për luftën e armatosur të bashkëkombasve të vet, edhe pse totalisht qe për shpëtimin e tyre nga përdhuna e diktatorit Sllobodan Millosheviç, kishte vendosur të vepronte siç do ta gjykonte të arsyeshme bashkësia e vendeve të zhvilluara demokratike, BE dhe SHBA, patjetër edhe Organizata e Kombeve të Bashkuara. Ajo që në Tiranë ndonjëherë dukej si apati dhe thënie kontradiktore e një muaj më pas edhe si deklarata mjaft të qortueshme, ishte frut jo përherë i ëmbël i kësaj varësie të ndërlikuar e të domosdoshme.

Ndërkohë kryeqyteti shqiptar ishte bërë, për shkak të shndërrimit në një pozicion shumë afër konfliktit ato kohë më i nxehti në botë, rezidencë e pse jo edhe guvë shërbimesh të fshehta. Ato vepronin në përputhje me politikat e shteteve të tyre dhe doemos nuk kishte përse në Tiranë, krahas mjaft dashamirëve, të mungonin edhe antishqiptarët. Ishte përleshje e madhe që kryhej larg syve të njerëzve të thjeshtë dhe verbazi opinionit publik.

Këtë gjë Ahmet Krasniqi natyrisht e dinte. Ai nuk qe as shqiptar nga Shqipëria dhe as tiranas. Askush nuk e njihte dhe asnjë degë e fisit të tij nuk qe vendosur ndonjëherë në këto anë. Ahmet Krasniqi ishte dhe nuk ishte në tokën e tij ose më saktë në terrenin e vet. Në kryeqytetin shqiptar drejtues teknikë apo politikë të të dy ushtrive, UÇK dhe FARK, ishin legalë e njëkohësisht ilegalë. Ndiheshin të mbrojtur, por po aq edhe krahëzbuluar. Dyshime të pathemelta apo që dukeshin të arsyeshme herë vërtetoheshin dhe shumë herë të tjera delnin bllofe.

Ahmet Krasniqi e njihte fare mirë edhe rrezikun e marrjes së jetës së tij nga armiq të kryengritjes së armatosur, por kjo nuk i bënte shumë përshtypje sepse jeta, pra i dorëzimit të saj si kusht, është rregulli numër një i profesionit të një ushtaraku.

Nis operacioni i diversionit

Millosheviçi ishte mobilizuar tërësisht që ta fikte zjarrin e madh kundër, duke ia ndezur e hedhur atë flakadan vetë shqiptarëve. Armata serbe në korrik-gusht u kishte shkaktuar njësive të armatosura të UÇK-së dhe të FARK-ut dëme të mëdha dhe shumica e luftëtarëve tashmë patën kapërxyer kufirin e kishin hyrë në Shqipëri. Pjesa dërmuese e tyre qenë vendosur në Tiranë. Për ata që në Beograd përgatitnin e ndiqnin hap pa hapi planin sekret të diversionit dhe destabilizimit të Shqipërisë, veçanërisht pamundësinë e riorganizimit dhe të rikthimit të luftëtarëve të larguar sërish për në Kosovë, nuk kishte vend më të mirë për t’i vënë fitilin kaosit e përplasjes së vëllavrasjes gjithëshqiptare se Tirana. Në të shkuarën kishin tentuar pa rezultat përplasje mes jugut dhe veriut, mes të majtëve e të djathtëve, mes besimtarëve të kësaj apo asaj feje, por tani ishte shumë e lakmuar një përleshje mes shqiptarëve të Shqipërisë dhe atyre të Kosovës. Në këtë dinakëri të fundit, grackë shumë herë më e sofistikuar se më pas operacioni ushtarak i pastrimit etnik “Patkoi”, synohej nxitja e përplasjes mes dy ushtrive, UÇK-së dhe FARK-ut. Modeli kishte funksionuar shumë mirë shtatë dekada më parë, kur nga diversioni që iu bë Mukjes nisi përleshja e armatosur mes dy krahëve ushtarakë të Partisë Komuniste dhe asaj të Ballit Kombëtar.

Fara e keqe jeton gjatë. Po t’ja delnin një diversioni të ri, kacafytjes me armë mes dy ushtrive çlirimtare, mortja e luftës civile do të vërtitej edhe për dekada të tjera mbi fatin e shqiptarëve.

Ja përse në fundverë e fillim vjeshte 1998 shtabi tinzar i bashkëpunëtorëve të Sllobodan Millosheviçit punonte në ethe të mos realizohej nga shqiptarët asnjë bashkim i tyre. Po t’ja delnin të bëheshin një trup, një mendje e një shpirt, kudo ku qenë në trojet e tyre, kjo do të ishte fundi i qëndrimit të Kosovës nën kontrollin e Sërbisë.

Në një mbrëmje gushti të vitit 1998, koloneli telefonoi papritur këshilltarin e Ministrit për Informatat të qeverisë Bukoshi dhe i tha “Flamur, kam nevojë të takohemi urgjent!” Këshilltari ndërkohë në Tiranë edhe kryeredaktor i Radio Kontaktit, iu përgjegj “Jam në punë”. Ahmet Krasniqi nguli këmbë: “Do të vij afër radios, diku...”. Mbërriti me një frymë, madje u ngjit gjer në mjediset e brendshme të radios. Pas një minute të dy zbritën poshtë në një kafe. “Situata në terren në Kosovë është mjaft e vështirë, shumë e tensionuar”, tha koloneli. Shpjegoi se tashmë shqiptarët kishin praglufte mes njeri-tjetrit. Në Kosovë patën hyrë një grup oficerësh të FARK-ut në pararojë për të shpërndarë më pas në terren njësitë e ushtrisë së tyre, por mes njerëzve të UÇK-së kishte jo pak që u krijonin pengesa. Mes të dy palëve, tha, kishte shumë moskuptime. Në të vërtetë pas shtatëmbëdhjetë takimeve në Tiranë dhe një tjetri në Osllo të dy armatat kishin rënë dakort në parim për bashkëpunim ushtarak në luftë për të dëbuar serbët.

Në fund Ministri i Mbrojtjes shqiptoi me lutje: “Dua ta takoj zotin Berisha”. Gashi ra dakort dhe e telefonoi në çast ish-Presidentin, ato kohë drejtues i opozitës. Ky pranoi menjëherë, por atë moment ishte me temperaturë e në shtrat. Premtoi të çohej të nesërmen dhe në orën 11.00 e priste Ahmet Krasniqin në selinë e partisë.

Sapo hyri në zyrën e Berishës ai mori drejtqëndrim ushtarak dhe shqiptoi solemnisht “Zoti President, ju paraqitem me kërkesën time! Kolonel Ahmet Krasniqi, ministër i Mbrojtjes i Republikës së Kosovës”. Sali Berisha u emocionua dhe i bëri shenjë të ulej. Në pak fjalë Ahmet Krasniqi i shpjegoi si po organizoheshin në terren dhe çfarë vështirësish po ndeshnin. Pastaj tha “Unë ju kërkoj zoti Sali Berisha të thërrisni zotin Demaçi, përfaqësuesin politik të UÇK-së, të vijë në Shqipëri, të takohet me ju dhe të ndikoni sa më shumë që situata të qetësohet. Unë jam i gatshëm që në marrëveshje me të dhe me qeverinë e Kosovës të futem në terren ku të kërkojnë e thonë ata. Pa asnjë lloj problemi. Por nuk jam i gatshëm për të ngritur këmbën e pushkës për të vrarë shqiptarët mes vedit”. Berisha, të cilin gjatë gjithë kohës nuk i ishte larguar emocioni i fortë, u përgjegj po aq edhe ai solemnisht “Do të bëj të pamundurën!”

Takimi kokë më kokë mes Adem Demaçit dhe Sali Berishës u bë në Tiranë pas katër ditësh. Pas bisedës të dy mbajtën një konferencë shtypi. Gjendja në terren u çtensionua dhe gjakrat përgjithësisht u qetësuan.

Relativisht i mbarë për frymën e bashkëpunimit mes dy ushtrive çlirimtare, edhe pse jo pa probleme, nisi edhe shtatori. Gjersa mbërriti në fillim data dymbëdhjetë dhe pastaj njëzetë e njëshi.

Operacioni i diversionit, i prishjes së frymës bashkëpunuese mes shqiptarëve me ide e parti të ndryshme politike, nisi pa u vonuar. Në fillim u vra Azem Hajdari. Kjo ishte ndezja e fitilit të parë shpërthyes. Kishte për mision vëllavrasjen mes shqiptarëve të Shqipërisë. Fitili i dytë ishte planifikuar të vihej e do të kishte për objektiv shkallmimin jo ndërmjet shqiptarëve të Kosovës, por edhe mes bashkëkombasve këtej e përtej kufirit. Dy mina që parashikoheshin të plasnin njëra pas tjetrës.

Vrasjen e Azem Hajdarit Ministri i Mbrojtjes së qeverisë së Republikës së Kosovës do ta merrte vesh ndërsa ishte në Kukës duke inspektuar trupat dhe qendrat stërvitore të FARK-ut. Ngjarja si edhe gjithçka që pas saj, e tronditi shumë. Ajo iu duk si kanosje e drejtpërdrejtë e qendrueshmërisë së Shqipërisë.

Nuk u merakos për veten. Madje nuk u shqetësua fare. Në Tiranë kobit të ndodhur i dhanë disa shpjegime, që nga ato të hakmarrjes personale, motivet e brendshme politike e deri tek kontrabanda e armëve dhe ndarja e fitimeve të saj. Që mund të ishte dorë serbe u fol fare pak, paqartësisht dhe pa qënë të bindur. Ndoshta kjo bëri që Ahmet Krasniqi të vijonte mënyrën e mëparshme të jetës e punës. Asnjë masë vetsigurimi nuk i shtoi vetes. Asnjë masë shtesë ruajtjeje nuk mori nga kanale të tjera.

[Urata]

Takimi i dy kolonelëve

Në 20 shtator njeriu që pak muaj më pas do të bëhej ndihmës i shefit të Shtabit të Përgjithshëm të Ushtrisë Çlirimtare të Kosovës, koloneli i Ushtrisë Shqiptare, i nxjerrë para kohe në lirim, Dilaver Goxhai, do të shkonte në selinë ku në Tiranë punonte e jetonte Ahmet Krasniqi. Më 10 shtator shkrimi i tij i botuar një javë më parë te “Rilindja”, “Pse UÇK u detyrua të lëshojë territoret e saj”, u ripublikua në numrin e parë të një reviste të ilustruar ushtarake, organ i Ministrisë së Mbrojtjes të qeverisë së Kosovës. Redaksia e saj ishte në të njëjtën ndërtesë, rezidencë e Ahmet Krasniqit. Ajo ndodhej në rrugën ku më parë gjendej shtëpia në të cilën ishte themeluar PKSH. Vila trekatëshe ishte marë me qera. Kishte një portë të jashtme. Shtypje butonin e një zileje dhe ajo hapej pasi shërbimi i rojeve brenda sigurohej se cili qe. Në oborrin e brendshëm kishte edhe shërbim informacioni. Duke filluar nga rojet të gjithë punonjësit qenë nga Kosova.

Kolonel Goxhain e priti kryeredaktori i revistës, Ibrahim Shala. Pastaj të dy shkuan të pinin një kafe në një bar në hyrje të rrugicës.

Në bisedë bashkëkombasi që drejtonte botimin e revistës, i tha se shkrimin e tij e patën botuar me porosi të vetë ministrit, madje ai kishte ngulur kembë që të publikohej fjalë për fjalë, pa asnjë shkurtim. “Kush është ministri?”, e pyeti Goxhai, sepse deri atë çast për shkak të ilegalitetit nuk e dinte. “Ministri”, iu përgjegj kryeredaktori, “është Ahmet Krasniqi”. Koloneli shqiptar nga Tirana kishte filluar ato kohë lidhjen vullnetare me UÇK-në. Në vijim të bisedës Ibrahim Shala shtoi se ministri u ishte lutur që autorin ta gjenin dhe ta mbanin afër. Në intimitet madje pati shtuar “Ky paska edhe moshën time, edhe gradën time. Dua ta takoj!”

Dilaveri i la kryeredaktorit numrin e telefonit. Ishte e diel paradite.

Pasdite kolonelit nga Tirana i ra zilja e telefonit dhe Ibrahim Shala i komunikoi dëshirën e ministrit Krasniqi që të takoheshin po atë pasdite në të njëjtën kafe ku patën qëndruar bashkë në mengjez. Kur të dy kolonelët u gjendën përballë dhe u panë, menjëherë e ndjenë se mund ta donin shumë njëri-tjetrin. Bashkëkombasi nga Kosova u gëzua dukshëm dhe kur i dha dorën, duke qënë se ishte i lartë në shtat, për të shprehur afërsinë, bëri shaka dhe u përkul shumë. Kur u ulën me një vështrim të butë në sy i tha se atë mbrëmje bashkë nuk do të rrinin dot shumë dhe se i lutej me zemër në dorë që ta kuptonte. E shpjegoi menjëherë arsyen: “Më duhet të lëviz, mund të iki larg”.

Dilaver Goxhai këtë e kuptoi qartë. Ahmet Krasniqi donte të thoshte “Do të shkoj në veri”. “Erdha vetëm sa për të të falenderuar dhe do të kemi kohë të bisedojmë”, shtoi ministri pa e hequr nga sytë vështrimin e tij si një det që në perëndim mbushet i tëri me dritë. Pastaj e pyeti se ku i merrte informacionet mbi zhvillimet e luftimeve. Koloneli nga Tirana citoi burimet e tij: disa drejtues të UÇK-së që ndodheshin në Tiranë. Shtoi se merrte të dhëna edhe nga agjensi të ndryshme lajmesh si BBC dhe Zëri i Amerikës, gazetat “Zëri i Kosovës” dhe “Çlirimi”, përfshi edhe televizione si CCN dhe Euronews. “Po ke ndërmend të shkosh në luftë?”, e pyeti Krasniqi. “Ende nuk kam vendosur, por mund të vete me të UÇK-së”, iu përgjegj Goxhai. Tjetri nuk tregoi asnjë shenjë xhelozie. Vazhdonte të ishte fare i kthjellët në fytyrë dhe në vështrim. “Do bësh mirë të shkosh me ta, sepse ata janë në terren”, tha. “Shtabi i Përgjithshëm ekziston në terren, Ministria ekziston këtu dhe unë kam dhënë urdhër që Ministria të vejë në Kosovë”, vijoi, “U kam thënë të gjithë vartësve të mi të përgatiten se edhe ne do të hyjmë në Kosovë”.

Më 20 shtator 1998 në mbrëmje, kohë kur ndodhi kjo bisedë, për kolonelin në lirim nga Tirana, më pas vullnetar dhe drejtues në Ushtrinë Çlirimtare të Kosovës, ishte e qartë se qenë momentet më vendimtare të bashkimit të të dy krahëve ushtarakë e politikë të kryengritjes për pavarësim. Veprimi i Ahmet Krasniqit formohej sipas logjikës “Shtabin e Përgjithshëm e kemi, Ministrinë e kemi, duhet t’i bashkojmë bashkë që të institucionalizohet lufta”. Ai ishte sinqerisht dhe me gjithë shpirt për bashkim. Më pas Dilaver Goxhai do të mësonte nga vetë drejtuesit në Tiranë të UÇK-së se qeveria Bukoshi dhe ministri Krasniqi po ato ditë i patën dhënë asaj plot 20 milion marka gjermane.

Kacafytje informacioni e dizinformacioni

Në mbrëmjen e vonë të 20 shtatorit Ahmet Krasniqi pasi piu një kafe me Flamur Gashin, me makinën e vet e shoqëroi këtë të fundit në shtëpinë e tij në Laprakë. Më 21 shtator, të nesërmen, dëshmitë dhe fjalënajat pohojnë dhe mohojnë praninë e tij të vazhduar në qytetin e Tiranës. Informacioni dhe dizinformacioni këtë ditë kanë bërë një përleshje dhe spektakël të madh.

Atë mbrëmje dihet me siguri që Ministri i Mbrojtjes i Qeverisë së Republikës së Kosovës shtroi një darkë për të vlerësuar një grup ushtarakësh të FARK-ut. Ishte në një farë mënyre edhe mbledhje pune. U bë në restorantin “Nëna Mbretëreshë’’ . Takimi-darkë përfundoi rreth orës 23.00. Më pas të gjithë ushtarakët, të hipur në tri vetura, morën rrugën për në banesat e tyre. Karvanit të vogël rrugës i ndodhin rrethana të çuditshme dhe aspak miqësore. Makina ku ndodhej Ahmet Krasniqi, e vetme, me shoferin dhe një ushtarak shoqërues, më në fund hyri në rrugicën që të çonte tek rezidenca e Ministrisë së Mbrojtjes së Kosovës. Ndriçimi i saj qe i dobët, pothuaj gjysmëterr.

Për të hapur portën zbritën nga makina shoferi dhe ushtaraku, i cili qe gazetar. Befas u dëgjua britma e fortë “Mos luani!’’ E kishte nxjerrë nga fare afër një fytyrë me maskë të zezë. Ndërkaq dy të tjerë të maskuar, me kallashnikov dhe revole në duar, shfaqën fantazmat e siluetave të tyre. Ata kishin zënë edhe daljen nga rrugica. Në fillim ia drejtuan armët shoferit dhe ushtarakut e ndërsa Ahmet Krasniqi doli nga vetura për të mos lejuar dhunën ndaj të vetëve njëri nga maskat ia vuri ministrit tytën e automatikut në grykë. U dëgjua pyetja “A është ky?” Me një frymë erdhi edhe përgjigja “Është vetë ai’’. Pastaj u shkrehën plumbat. Ranë të rëndë. Muret anësorëe të rruginës së ngushtë i bënë të shurdhoheshin.

Ishte pothuaj mesnatë.

Ai që shtiu mbi Ahmet Krasniqin nuk e dinte mbi cilin person po dërgonte vdekjen. Thjesht i kishin thënë se do të vrisnin një tradhëtar të çështjes shqiptare dhe spiun serb. Që po i merrnin jetën pikërisht Ministrit të Mbrojtjes së Qeverisë së Republikës së Kosovës e dinte mjaft mirë personi i dytë, ai që i tregoi atentatorit personin-objektiv të shënjestrës. Ky ishte nga një qytet me emër të mirë nga Kosova. Deri atëhere njihej si njeri i mirë, por që më pas iu dha shumë pijes. Shumë muaj më pas nga mesnata e 21 shtatorit 1998 do të vritej. Gjendej në një betejë me milicinë e ushtrinë sërbe, por plumbin e mori në shpinë.

Lajmi i vrasjes së Ahmet Krasniqit në Tiranë u përhap vetëm me lajmet radiotelevizive të mëngjezit, sepse kur ajo kishte ndodhur gazetat me faqet e tyre të para kishin hyrë e dalë nga shtypshkronjat. Ngjau e njëjta gjë edhe në Prishtinë. Këtu u muarr vesh edhe një lajm tjetër: Adem Demaçi pati dhënë një “dorëheqje” të butë nga detyra e përfaqësuesi politik të UÇK-së. Këtë e bëri të ditur më 22 shtator gazeta “Bota sot” me shkrimin e titulluar “Adem Demaçi në pushim të gjatë mjekësor”. Fjalët e përhapura thoshin se ngjarja e papritur kishte ndodhur që në 20 shtator. Prej zyrës së tij qe thënë se “për shkak të stërngarkimit me punë mjekët kanë konstatuar se ai ka një tendosje të tepruar të nervave dhe një keqësim të diabetit. Për këtë arsye mjekët e kanë këshilluar zotëri Demaçin që të deaktivizohet nga të gjitha punët e veta të përditshme dhe të pushojë sa më gjatë”. Në vijim thuhej se të gjitha takimet e parapara me miq të huaj dhe të vendit si dhe takimet e caktuara me gazetarë do të shtyheshin për një afat të pacaktuar.

[Urata]

Që të mos binte harrimi

Njeriu i UÇK-së, koloneli Dilaver Goxhai, në shoqërinë e stafit drejtues të gazetës “Rilindja”, mori pjesë në varrimin e Ahmet Krasniqit. Aty ishte edhe Flamur Gashi. Ceremonia e nderimit të fundit dhe përcjelljes për në varreza do të bëhej në Shtëpinë Qëndrore të Ushtarakëve. Rrugës për atje një punonjës i gazetës “Ushtria” e pyeti Goxhain se për ku po shkonte. Ky u përgjegj se ishte nisur për në homazhin e Ahmet Krasniqit. “Ti do të vish?”, i tha tjetrit. “Jo”, iu përgjegj ky, “Na porositën të qëndrojmë sa më larg ceremonisë që të mos i jepet një pompozitet i madh zyrtar”.

Në homazh ishte edhe bashkshortja e të ndjerit, Sllobodanka. Rrinte pranë arkivolit bashkë me të dy fëmijët, Teutën dhe Florentin. Në qafë mbante një gjerdan me shqiponjën shqiptare.

Nuk qe i pranishëm asnjë autoritet qeveritar i Tiranës. Mes politikanëve u pa Pjetër Arbnori dhe Leonard Demi. Më pas u shkua në varrezat e Sharrës. Një skuadër e posaçme pushkatarësh e dërguar nga Ministria e Mbrojtjes e Shqipërisë shkrehu tre bataretë e nderimit. Ndërsa në ceremoninë e homazhit kishte edhe shumë shqiptarë të Tiranës, në varrim pjesa dërmuese qenë bashkëkombas nga Kosova. Në grupe të veçuara të tyre thuhej me zë të ulët “Na e ka vrarë Shqipëria”. Njëzetë e dy shtatori dhe për shumë kohë vijimi i saj do të provonte sa mirë ishte stisur e montuar ajo vrasje dhe dizinformimi i qëllimshëm për të prodhuar pikërisht atë të pavërtetë.

Por as kësaj rradhe diversioni i dëshiruar mes shqiptarëve këtej dhe përtej kufirit nuk shkaktoi asnjë përplasje, jo vetëm me armë, por edhe me dhunë fjalësh.

Kishte kaluar një javë nga vrasja kur kolonel Goxhain e telefonuan nga redaksia e revistës ushtarake të Ministrisë së Mbrojtjes të Kosovës. Kur shkoi atje Skënder Zogaj, shkrimtar por edhe politikan, bashkë me Ibrahim Shalën i thanë në intimitet se dëshironin të botonin dy libra të ministrit. Qenë me temë ushtarake. Njëri për qëndresën e luftën në gazermën e Gospiçit, tjetri me shkrime të ndryshme. Zogaj shtoi se të dy botimet qenë planifikuar të bëheshin sa Ahmeti qe gjallë, kurse tashmë, ndërsa nuk jetonte më, ishin më shumë të obliguar. Nga Goxhai kërkonin një redaktim teknik të dy librave, rishikim thjesht nga ana ushtarake. Të paktën të botohej ai për Gospiçin.

Koloneli nga Tirana u ktheu përgjigjen “Me gjithë dëshirë!” E mori lendën e shkruar. Kur pati mbaruar gjysmën e leximit të tyre, vendosi që punën e bërë të mos ua mbante të fshehur njerëzve të UÇK-së, me të cilët tashmë qe lidhur. “Vepro si ta gjykosh vetë”, i thanë disa prej tyre. Dy ishin më të ashpër “Lëre se ka qënë i serbëve!”

Përfolja e shumë ushtarakëve shqiptarë të Kosovës, të cilët gjatë punës nëpër garnizone të ndryshme në Federatën Jugosllave, u patën njohur dhe krijuar familje me gra serbe, përbënte një pikë të sulmueshme nga mosdashësit e tyre. Shumë herë i shqetësuar nga kjo mënyrë rivaliteti Ahmet Krasniqi pati thënë se kishte dëgjuar që nxiteshin fjalët se nuk duhej të bashkoheshin me FARK-un për shkak se ai e kishte gruan sërbe. “Po mirë“, thoshte “Unë e kam gruan shkinë, por i kam fëmijët me emra shqiptarë. Pra ata janë shqiptarë. Unë jam shqiptar dhe gruaja ime e pranon realitetin se ajo tani është shqiptare. Unë familjen time ka muaj që nuk e kam parë. Fëmijët e mi i kam lënë fillikat për të kontribuar për Kosovën dhe bëj vetëm dy-tri orë gjumë në ditë. Kurse këta që më marrin nëpër gojë dhe që i paskan gratë shqiptare pse nuk vijnë të luftojnë por sillen nëpër Perëndim dhe bëjnë propagandë?”

Pas bisedës së paqartë me disa nga drejtuesit e UÇK-së në Tiranë, Dilaver Goxhai shkoi te Skender Zogaj dhe i tha “Unë e lexova një pjesë dhe më pëlqeu. Megjithatë kam një sugjerim. Po deshët dëgjojeni! Ta botojmë librin e Ahmet Krasniqit në këtë moment duket sikur ju u bëni një karshillëk atyre të UÇK-së dhe në vend që të afroheni, siç e kishte qëllimin e vërtetë Ahmeti, do të thellohet ndarja. Ne nuk na intereson ndarje, sepse mund të shkojë kjo deri edhe në përplasje me armë, prandaj mendoj që t’ja lëmë kohës. Të mbarojë lufta ose të shohim si do të shkoj ky proçes. Dhe ja gjejmë çastin e duhur. Më pas edhe unë kam më shumë kohë, e shoh me më tepër vëmendje”.

Kur u bë kjo bisedë akoma nuk kishte dalë shtatori i vitit 1998. NATO do të hynte në luftë pas gjashtë muajsh.

“Më mirë kështu”, ra dakort Skënder Zogaj. Vrasja e Ahmet Krasniqit i kishte ftohur shumë marrëdhëniet mes UÇK-së dhe FARK-ut, krizë që do të zgjatëte e ndërlikuar për jo pak kohë. Vrasësit e kolonelit e kishin tronditur frymën e bashkëpunimit mes dy ushtrive dhe krahëve politikë nëpërmjet njeriut që për të kishte qënë më vetmohuesi.

Megjithatë kësaj here Mukja e re e shqiptarëve kishte funksionuar. Nuk u ra në luftë civile, siç edhe qe projektuar krimi i mesnatës së 21 shtatorit. Ndërhyrja me armë e NATO-s e mbylli përfundimisht iluzionin e disa pacifistëve se mund të ndërronte sjellja e Sllobodan Millosheviçit me bukurinë e fjalëve apo veprimet e vonuara e të ngathëta luftarake. Ngadhënjeu mes popullit shqiptar të Kosovës alternativa e UÇK-së, e cila nuk humbi asnjë minutë dhe nuk kurseu asnjë jetë për të dëbuar përfundimisht milicinë dhe armatën serbe.

Vazhduan të vetmohonin për shqiptarizëm edhe Krasniqët. Në luftën e zhvilluar në Maqedoni, i rreshtuar në rradhët e Ushtrisë Çlirimtare Kombëtare, mori pjesë dhe Iliri, një nip i Ahmetit.

Busti i munguar në Tiranë

Në 17 qershor 2002 Agim Mehmeti, një ish-zëvendësministër i Mbrojtjes i Republikës së Kosovës, u bëri një letër institucioneve më të larta të vendit dhe propozoi të inicohej, debatohej dhe aprovohej në formë institucionale rivarrimi në Kosovë i kolonel Ahmet Krasniqit. Po ashtu në një afat të caktuar kohor t'i ngrihej lapidari në njërën nga sheshet kryesore të Prishtinës.

Në shtator 2002 në Tiranë veproi edhe një komision parlamentar i ngritur për të hetuar vrasjen e Azem Hajdarit, Ahmet Krasniqit dhe gazetarit Ali Ukaj.

Shtatorin e mëpasshëm, 2003, pesëvjetor i rënies, në një akademi përkujtimore të mbajtur në Prishtinë, mori pjesë e foli edhe presidenti Ibrahim Rugova. Ai delte rrallë nëpër mbledhje, por Ahmet Krasniqin e donte shumë.

Tashmë, në vitin 2008, në Prishtinë komuna i ka dhënë familjes Krasniqi, Sllobodankës dhe dy fëmijëve të saj, që jetojnë në Kroaci, një apartament. Po të dëshirojnë mund të kthehen e jetojnë aty. Ndërkohë Florenti është fejuar me një shqiptare. Sllobodanka nuk e ka hequr gjerdanin me shqiponjën tonë.

Në Tiranë në varrezat e Sharrës vendi ku prehet Azem Hajdari dhe ai i Ahmet Krasniqit qëndrojnë në të njëjtën rradhë e parcelë, fare afër. Ashtu siç i vuri shtatori i vitit tronditës 1998.

Kanë kaluar dhjetë vite që prej atij muaji. Ata që në paraluftë dhe më pas në përleshjen me ushtrinë pushtuese serbe kishin mospajtime, kontradikta të mëdha e të vogla, keqkuptime e humor të mbrapshtë, tani e drejtojnë Kosovën e pavarur në një qeveri të përbashkët. Megjithatë ende për një nga bijtë më të mirë të çështjes shqiptare nuk ka asnjë lapidar, asnjë bust, asnjë përkujtimore të dukshme. Edhe eshtrat akoma nuk janë kthyer në viset e tij, në tokën për të cilën dha jetën.

Në Tiranë, ku edhe u krye e qëllimtë dhe antishqiptare pabesia kundër tij, mund të bëhet një gjest i qartë kujtimi e nderimi. Bust mund të jetë, pse jo edhe më tepër. Do të mbetet një nga simbolet tona të bashkimit. Dhe në rast se një gjë e tillë nuk ndodh, le të gjendet një burrë nga viset tona apo të Kosovës, nga brenda apo jashtë trojeve të shqiptarëve, të mbjellë në Tiranë, në hyrje të rrugicës ku e vranë, buzë rrugës së madhe që të çon atje apo edhe në një anëshesh a park, një fidan peme. Le të jetë ky bli, rrap, pishë apo ulli. Mjafton të jetë pemë që jeton gjatë. Sa më gjatë. Sepse emri i Ahmet Krasniqit me siguri do të jetojë akoma më gjatë.

[GURI SYLAJ]

"Ai që shtiu mbi Ahmet Krasniqin nuk e dinte mbi cilin person po dërgonte vdekjen. Thjesht i kishin thënë se do të vrisnin një tradhëtar të çështjes shqiptare dhe spiun serb. Që po i merrnin jetën pikërisht Ministrit të Mbrojtjes së Qeverisë së Republikës së Kosovës e dinte mjaft mirë personi i dytë, ai që i tregoi atentatorit personin-objektiv të shënjestrës. Ky ishte nga një qytet me emër të mirë nga Kosova. Deri atëhere njihej si njeri i mirë, por që më pas iu dha shumë pijes. Shumë muaj më pas nga mesnata e 21 shtatorit 1998 do të vritej. Gjendej në një betejë me milicinë e ushtrinë sërbe, por plumbin e mori në shpinë."
************************************************** **************
************************************************** ****





Sikur artikullshkruesi te merrte guximin dhe te deshifronte pjesen e skuqur te shkrimit dhe sikur organet perkatese te te dy Shteteve Shqiptare (njera multietnike) te kishin guximin dhe deshiren per te kry detyrat te cilat ua ngarkon ligji ,neve ketu, nuk do te kishim pas nevoje te shtyhemi si (kiet ne zgjedhe) por gjithecka do te ishte e kjarte!
Sido qe te jete Ahmet Krasniqi ,per peshen qe kishte ,nga ky President dhe nga kjo Qeveri eshte shpalle Hero i Popullit!!
Cdo ngaterrese, ne mes nesh sot , tregon papjekurin ton per te gjyku !
Nje gje bie ne sy se shume individ qe ishin pjese e strukturave te caktuara gjat luftes sot del se jan tipa mendjemdhenj dhe frigacak.Ne anonimitet shajne e pershajne here njerin e here tjetrin kurse ne realitet hiqen si burra te fjales e urtise!!
Te tillet nuk i duhen as Luftes e as Paqes!!