Autonomi për veriun në shkëmbim të njohjes nga Serbia

Autonomi për veriun në shkëmbim të njohjes nga Serbia


28-10-2011 15:12 CET


Raportuesi për Serbinë në Parlamentin Evropian, Jelko Kacin ka theksuar se një autonomi brenda Kosovës për pjesën e veriut, mund të ishte një zgjidhje që në fund do të çonte në njohjen e Kosovës nga ana e Serbisë. Sipas tij, çdo zgjidhje që pranohet nga serbët e veriut të Kosovës do të ishte e pranueshme edhe për Serbinë.
“Kosova dhe Serbia duhet të gjejnë një zgjidhje”, ka thënë deputeti i Parlamentit Evropian, Jelko Kacin për “Radio Dukagjini”, raporton Telegrafi.
Përderisa ditë më parë, për këtë radio ka theksuar se nuk është e nevojshme që të dyja vendet të hyjnë në bisedime politike, të premten eurodeputeti slloven Kacin ka pohuar se zgjidhja që mund të çonte në njohjen reciproke të dy vendeve mund të ishte autonomia për veriun, brenda Kosovës.
“Një lloj autonomie lokale, brenda Kosovës, për veriun mund të ishte hap para, që do të sillte në fund tek njohja e Kosovës nga ana e Serbisë”, u shpreh Kacin.
Kacin thotë që më e rëndësishmja është që serbët e veriut ta pranojnë këtë zgjedhje dhe atëherë sipas tij, Beogradi i bën “amin”, zgjedhjes që ata e pranojnë. “Përfundimisht, çdo gjë që është e pranueshme për serbët e veriut të Kosovës, natyrisht që një gjë e tillë do të pranohej edhe nga Serbia”, vlerëson raportuesi për Serbinë në Parlamentin Evropian.
Kacin ka theksuar se bisedimet mes Kosovës dhe Serbisë duhet medoemos të rinisin para dhjetorit, ndryshe, sipas tij, është e pamundur që Serbia të merr statusin e vendit kandidat.
0