Albin Kurti ka qenë në Binxhe, fakton policia

Mentor BUZHALA
Prishtinë – Dëshmitë e deputetit të Partisë Demokratike të Kosovës, Bekim Haxhiu – Kamishi se lideri i Lëvizjes “Vetëvendosje” (VV), Albin Kurti, ka mbajtur lidhje me strukturat kriminale të Serbisë, janë konfirmuar edhe nga faktet që dalin nga Policia e Kosovës. Gazeta “Lajm” ka siguruar raportin konfidencial brenda Policisë së Kosovës, në të cilën shihet qartë se lideri i VV-së, Albin Kurti, saktësisht më 17 janar të vitit 2004 është ndalur nga Policia e Kosovës, në fshatin Binxhë të Komunës së Klinës. Gazeta ka siguruar dy raporte të policisë, në njërin nga të cilët thuhet: “Ashte ardhur Albin Kurti duke biseduar me përfaqësuesit e fshatit Binxhë”. Ky raport është përpiluar nga Policia e Kosovës, Patrulla 1, rajoni 1, Fshati 2, në orën 17:33. Kurse, në raportin tjetër thuhet: “Rreth orës 17:40, në fshatin Binxhë është ndaluar Albin Kurti me automjetin 416 KS 989. Ai ka biseduar me Boban Donçiqin”. Raporti shihet se është përpiluar dhe shkruar nga patrulla e policisë. Nga origjinali i raportit të siguruar shihen edhe aktivitetet e tjera ditore të policisë. Sipas burimeve të Gazetës “Lajm”, Policia e Kosovës në Klinë i ka të gjitha detajet e takimit të Kurtit me serbët e Binxhës.
Ndërkohë që, faktet dhe raportet zyrtare policore konfirmojnë takimin e Kurtit që ka pasur në Binxhë në shtëpinë e Boban Donçiqit, kurse sipas burimeve të gazetës brenda Policisë, arsyeja ndaljes së Kurtit nga ana e Policisë ishte dyshimi se ai ishte i mbuluar me batanije brenda në veturë. Ajo zonë ishte nën mbikëqyrje të vazhdueshme të Policisë së Kosovës dhe patrullave të KFOR-it, që siguronin ardhjen e qytetarëve serbë në shtëpitë e tyre.
Burimet e gazetës thonë se fillimisht është dyshuar në ndonjë transport ilegal, por më pastaj është konfirmuar prania e Kurtit në veturë. Nga ana tjetër, gazeta ka provuar të kontaktojë liderin e VV-së, Albin Kurti, për të marrë reagimin e tij lidhur me të dhënat e raportit, por kontakti më të ka qenë i pamundur. Adonis Tahiraj, zyrtar për media në VV, i ka thënë gazetës se Kurti nuk prononcohet për këtë çështje, pasi që konsideron se janë shpifje.
“Nuk e di çfarë të them, ne jemi në organizimin të protestës dhe nuk besoj se Albini flet për këtë punë”, tha Tahiraj. Megjithëkëtë, në një emision televiziv, ku ishte mysafir së fundmi Albin Kurti, kur është pyetur për takimin e tij me serbët, me fytyrë paksa të ngrysur e ka mohuar atë.
Ndërsa ishte deputeti i PDK-së, Bekim Haxhiu, që kishte iniciuar këtë temë, duke iu drejtuar publikisht liderit të VV-së me tri pyetje: që të shpjegonte disa takime dhe korrespodenca që ai kishte me strukturat kriminale të Serbisë, që dyshohen të jenë pjesëtarë të BIA-së.
Haxhiu ka thënë për “Lajm” se ka qenë i sigurt në pyetjet e tij drejtuar liderit të VV-së. “Kam qenë i sigurt dhe i përgjegjshëm në atë se çka e kam pyetur Kurtin. Nga ai kam kërkuar që të jetë transparent, që të tregojë se më cilët serbë të strukturave paralele kriminale u takua në Binxhë dhe se cili ka qenë qëllimi i takimit. Pas konfirmimit edhe nga ana juaj, Albini ka obligim qytetar që të sqarohet para qytetarëve të Kosovës”, tha Haxhiu, i njohur ndryshe me nofkën e Kamishi. Ai thotë se faktet i ka dorëzuar në mënyrë institucionale me emra konkretë, komisionit parlamentar të mbikëqyrjes së Agjencionit Kosovar të Inteligjencës (AKI).
“Megjithëkëtë, kryetari i komisionit të mbikëqyrjes së AKI-së, Florin Krasniqi, nuk ka shprehur gatishmëri të merret më këtë çështje. Edhe pse disa individë me shumë dëshirë kanë dashur të merren me Kamishin, apo origjinën e llullës së gjyshit tim, që ka qenë bashkëluftëtar i Shaban Polluzhës”, tha Haxhiu.
Por, nuk ishte vetëm ky takim që Kurti pati me serbët, e që dëshmojnë lidhjet e tij të dyshimta me ta. Deputeti Haxhiu pati ngritur edhe dy pyetje tjera, që sipas tij ishin fakte për disa korrespondenca që lideri i VV-së mban me serbët.
“Kush ishte gruaja që është takuar me të kur ishte në burg, edhe se pse kishte mbajtur kontakte pas daljes nga burgu”, ishte pyetja tjetër që kishte bërë Haxhiu, por duke e vlerësuar lidhje intime, Haxhiu nuk e kishte zbuluar emrin e gruas që ishte takuar Kurti.
Ndërsa, pyetja e tretë që Haxhiu i kishte shtruar Kurtit, ishte se çfarë përmbante zarfi që lideri i “Vetëvendosjes” kishte pranuar më 28 shtator 2011, përmes linjës Beograd-Prishtinë. Deputeti Haxhiu kishte zbuluar emrin e vajzës që i kishte dërguar Kurtit një pako në zarf, e cila ishte vajza e ish-ministrit të kohës së Millosheviqit.
“Ishte vajza e ish-ministrit Sokoloviq, ajo që i dërgoi Kurtit pako në zarf nga Beogradi”, ka thënë Haxhiu, duke pohuar se pakon me zarf e kishte pranuar sekretari organizativ i VV-së, Dardan Molliqaj, në stacionin e autobusëve në Prishtinë. Por, Haxhiu nuk kishte zbuluar se çka kishte në zarf, duke ia lënë Kurtit që ai të tregojë se çka përmban zarfi.

Faksimilet e raportit të policisë për ndaljen e automjetit ku ishte Kurti dhe për takimin e tij me serbët e Binxhës






http://lajmonline.com/?nav=21.2&id=2866