Rezolutë për Kosovën

[Dilaver]

REZOLUTË PËR KOSOVËN


Kuvendi i Republikës së Shqipërisë, duke ndjekur me vëmendje të veçantë fazën përmbyllëse të përgatitjeve për diskutimin e statusit të Kosovës,

- duke përshëndetur vendimin e Këshillit të Sigurimit të Kombeve të Bashkuara për fillimin e bisedimeve për përcaktimin e statusit të Kosovës;

- duke vërejtur progresin e dukshëm në krijimin e bazave të një shoqërie të hapur dhe të konsolidimit të shtetit ligjor në Kosovë, pasqyruar edhe në Raportin “Aide”;

- duke vlerësuar përpjekjet e institucioneve të Kosovës, Presidentit, Kuvendit, Qeverisë, partive politike dhe banorëve të Kosovës në ndërtimin e një Kosove demokratike e multietnike;

- duke falënderuar bashkësinë ndërkombëtare dhe në veçanti NATO-n, për angazhimin në përballimin e krizës kosovare, si dhe UNMIK-un, KFOR-in dhe OSBE-në për kontributin në stabilizimin gradual të situatës në vend, si dhe në ndërtimin e institucioneve;

- duke shprehur bindjen se roli i bashkësisë ndërkombëtare do të vazhdojë të mbetet esencial edhe në të ardhmen për një Kosovë të integruar në strukturat europiane dhe euroatlantike;

- duke nënvizuar nevojën e kalimit nga statusi aktual në krijimin e një shteti të ngritur mbi parimet ndërkombëtare të paqes sociale, sundimit të ligjit e bashkëjetesës multietnike;

- duke vlerësuar rolin shumëplanësh të Shqipërisë qysh me përballimin e krizës politike, humanitare në Kosovë, si dhe në sigurimin e vazhdueshëm të paqes dhe stabilitetit në rajon;

- duke inkurajuar e mbështetur nisma e projekte konkrete të Qeverisë, që do të ndihmonin zhvillimin ekonomik, shoqëror dhe kulturor të Kosovës, si dhe do të intensifikonin dialogun dypalësh e shumëpalësh në rajon;

- duke mbështetur vullnetin e lirë të popullit të Kosovës, i cili tashmë është shprehur për pavarësi;

- duke vlerësuar rëndësinë që kanë qëndrimet e shtetit shqiptar për zhvillimet në Kosovë;

- mbetet i angazhuar në veprimin e tij politik diplomatik gjatë gjithë periudhës së negociatave për përcaktimin e statusit të Kosovës;

- shpreson fuqishëm se nga procesi i bisedimeve do të dalë një rezultat i qëndrueshëm, i cili reflekton aspiratat dhe vullnetin e lirë të qytetarëve të Kosovës për një shtet të pavarur, demokratik, europian;

- u kërkon institucioneve shtetërore dhe fton organizatat e shoqërisë civile dhe mediat të dëshmojnë kohezion dhe përgjegjësi gjatë këtyre zhvillimeve.

[Dilaver]

Miratohet Rezoluta për Kosovën, pa paragrafin për pavarësi

Telegrafi 24.01.2007.

Asambleja Parlamentare e Këshillit të Evropës, miratoi të mërkurën në Strasbourg Rezolutën për Kosovën, mirëpo të cilës iu hoq paragrafi që sugjeronte pavarësi të kushtëzuar për Kosovën. Rezoluta është miratuar me 99 vota pro, 36 kundër dhe 14 abstenime.

Po ashtu bëhet e ditur se nuk ka kaluar as amendamenti i deputetëve serbë, të cilët kanë kërkuar që në këtë rezolutë të futet paragrafi se gjatë zgjidhjes së statusit do të ruhet integriteti dhe sovraniteti territorial i Serbisë.

Nga rezoluta është hequr edhe pjesa ku thuhet se të gjithë akterët e regjionit duhet të marrin përsipër obligimin që nuk do të kërkojnë ndryshimin e mëtutjeshëm të kufijve në rajon dhe se kufijtë e sotëm të Kosovës pranohet si të përhershëm.

Në rezolutë theksohet se një marrëveshje e pranueshme nga të dyja palët është zgjidhje e vetme që nuk do të jetë destabilizuese. Megjithatë shtohet se nëse nuk arrihet marrëveshja, atëherë duhet sjell vendimin për një zgjidhje të imponuar.

Nëpërmjet kësaj rezolute serbëve të Kosovës u bëhet thirrje që të marrin pjesë në jetën publike e politike të Kosovës.

Tekstin e rezolutës ku përmendet pavarësia e Kosovës e ka parashtruar, Lordi Russel Johnston, mirëpo këtij teksti sot i janë shtuar edhe më shumë se 70 amendamente.

Sidoqoftë në tekstin e rezolutës për të ardhmen e Kosovës, që pritet të diskutohet javën e ardhshme në Parlamentin Evropian, mbështetet qëndrimi që Kosovës duhet dhënë pavarësinë, e cila për një kohë do të jetë e kufizuar me praninë ndërkombëtare.

Teksti i rezolutës, të cilën e ka përgatitur deputeti holandez, Joost Lagendijk, do t’i nënshtrohet diskutimit dhe me disa ndryshime dhe plotësime pritet edhe miratimi i saj nga Parlamenti Evropian.

“Sovraniteti i kufizuar me praninë ndërkombëtare është i domosdoshëm për ruajtjen e karakterit multi-etnik të Kosovës dhe ruajtjen e interesave dhe sigurisë të banorëve serbë të Kosovës si dhe pakicave të tjera etnike”, thuhet ndër të tjera në këtë tekst.