Shqiptarë dhe serbë, përleshen me gurë në Mitrovicë

[niemand]

Banorë shqiptarë dhe serbë në fshatin Suhadoll të Mitrovicës janë konfrontuar fizikisht rreth orës 10. Konflikti, i cili ka përfunduar me gjuajtje gurësh kundër njëri-tjetrit, ka nisur pasi një grup serbësh ka qëlluar në punëtorët shqiptarë që po kryenin punimet e hapjes së kanaleve të ujësjellësit.


MITROVICE- Konfrontim fizik i banorëve shqiptarë dhe atyre serbë në fshatin Suhadoll të Mitrovicës. Konflikti që përfundoi në gjuajtje gurësh kundër njëri-tjetrit, nisi pasi një grup serbësh qëlloi disa punëtorë shqiptarë që po kryenin punimet e hapjes së kanaleve të ujësjellësit. Incidentin e përleshjes me gurë në mes të serbëve dhe shqiptarëve e kanë konfirmuar edhe zyrtarë të policisë në Mitrovicë. Serbë të fshatit Suhadoll të Epërm kanë penguar punimet në hapjen e kanalit të ujësjellësit për fshatrat Gushafc, Vinarc dhe Vinarcë i Epërm të banuara me shqiptarë. Sipas serbëve të tubuar, punimet mund të vazhdojnë vetëm kur kryetari i Komunës së Mitrovicës, Bajram Rexhepi, të ulet dhe bisedojë për këtë problem me kryetarin e Komunës Serbe të Mitrovicës të dalë nga zgjedhjet serbe. Zëdhënësi i policisë në Mitrovicë, Besim Hoti, ka theksuar se incidenti në Suhodoll ka filluar pak pas orës 10. Sipas tij, serbët e revoltuar kanë filluar të gjuajnë me gurë punëkryesit si dhe shqiptarët që ishin tubuar. Pas kësaj, edhe shqiptarët janë kundërpërgjigjur me gurë.
Si pasojë e gjuajtjeve, disa banorë shqiptarë të Suhodollit kanë pësuar lëndime të lehta dhe kanë kërkuar ndihmën mjekësore në Mitrovicë. Hoti ka theksuar se gjatë këtij incidenti nuk ka patur të arrestuar.
Për qetësimin e situatës kanë marrë pjesë njësi të policisë ndërkombëtare, KFOR-i. Kjo është e 5-ta herë që punimet ndërpriten për shkak të reagimit të serbëve.