Çka duhet të dish rreth gripit të derrit !

[Gloss]

Si të mbrohesh nga ky grip dhe, në rast të infektimit, çka të përdorësh, e çka jo?

1. Laj duart
Duket si një masë e rëndomte ndaj një situate katastrofike, por larja e duarve (vend e pa vend) është gjëja më e mirë që mund të bëni. Përdor ujë të nxehtë, shkumo duart fort për rreth 2 minuta të plota dhe shpëlaji duart mirë. Laji duart shumë më shpesh nga ç’e bën zakonisht. Imagjino sa shpesh do t’i laje duart nëse do të punoje në një spital infektiv...

2. Mbulo gojën kur
kollitesh apo teshtin
Janë pikëzat e pështymës dhe lëngjeve të hundës ato që përhapin sëmundjen. Këto mund t’i marrim duke prekur sende të ndryshme në vende publike. Është më mirë që pikëzat të mbeten në mëngët apo duart tua, sesa të fluturojnë drejt sendeve dhe njerëzve të tjerë.

3. Qëndro në shtëpi
Nëse ndihesh e sëmurë këshillohu menjëherë me mjekun por qëndro në shtëpi dhe mundohu të shmangësh kontaktet e tepërta me të tjerët. Në këtë mënyrë kursen energjitë që duhen për t’u shëruar dhe nuk infektoni te dashurit tuaj. Lani duart, në këtë mënyrë nuk riinfektoheni duke lënë virus në sendet e shtëpisë.

4. Mos prek fytyrën
Mundohu të mos prekësh flegrat e hundëve, gojën, sytë. Këto janë portat për hyrjen e virusit drejt e ne gjak.

5. Shmang të sëmurët
Është ide e mirë të qëndrosh larg njerëzve që shfaqin shenja sëmundjeje (edhe ne qofte një rrufë e zakonshme). Ndërkohë që në Shtetet e Bashkuara janë mbyllur 132 mijë shkolla dhe në shumë vende të botes po aplikohen masa ekstreme.

Mjekimi
Një eksperte e Universitetit të Meksikës, u ka bërë thirrje të gjithë personave që janë prekur nga virusi i gripit të derrit, A H1N1, të mos përdorin aspirinë, pasi mund të dëmtojë seriozisht mëlçinë. Sipas Suzana Lopes Çateron, dëmtimet që mund të shkaktojë aspirina në organizmin e prekur nga virusi, mund të jenë fatale. Ajo ka rekomanduar, që personat e prekur dhe që kanë temperaturë të lartë, të përdorin paracetamol./kosova-sot