Hyseni:Turqia lobon për Kosovën

[Qorri]

Hyseni:Turqia lobon për Kosovën



Ministri i Punëve të Jashtme të Republikës së Kosovës, Skënder Hyseni, ka zhvilluar një takim me kryetarin e Kuvendit të Turqisë, Mehmet Ali Shahin.
Gjatë vizitës zyrtare që po zhvillon në Republikën e Turqisë, Ministri i Punëve të Jashtme i Republikës së Kosovës, Skënder Hyseni, ka takuar udhëheqësit më të lartë të shtetit turk.
Ministri i MPJ-së në Qeverinë e Republikës së Kosovës, Skënder Hyseni, vlerësoi lart rolin e shtetit turk për mbështetjen e vazhdueshme për vendin tonë. Po ashtu, ministri Hyseni, ka falënderuar kryeparlamentarin turk për mbështetjen dhe njohjen e shpejtë të pavarësisë së Kosovës. Ai ka theksuar se Kosovën e kanë njohur deri tash 62 vende, duke vënë në pah se rritja e njohjeve nga shtetet e tjera është jetike.
Sipas mediave turke, ministri i Jashtëm i Kosovës ka kërkuar nga Turqia të intensifikojë ndikimin e vet për njohjen e shtetit të Kosovës, veçanërisht te vendet arabe. Hyseni, gjithashtu, u ka bërë thirrje biznesmenëve turq që të investojnë në Kosovë. Nga ana tjetër, kryeparlamentari turk, Shahin, ka theksuar se Turqia e ka monitoruar nga afër procesin e pavarësisë dhe ka ofruar mbështetjen e shtetit të tij. Sipas tij, populli turk që jeton në Kosovë ka një rol të rëndësishëm dhe është urë lidhëse ndërmjet Turqisë dhe Kosovës.
Në kuadër të vizitës, Ministri Hyseni ka vendosur kurorë në mauzoleun e themeluesit të shtetit modern turk, Kemajl Ataturk.Gjatë qëndrimit të tij në Ankara, ministri Hyseni do të takohet edhe me Presidentin e Republikës së Turqisë, z. Abdullah Gül.